No Kasano a ti Lubong Makapagkaykaysanton
KANKANAYON a napaay ti panangikagumaan ti tao a mangituray iti bagina a sibaballigi. Awan duadua nga umanamongkayo iti napaltiingan a panangipapan: “Ti maysa a tao iturayanna ti sabali a maipaay iti pagdaksanna.” (Eclesiastes 8:9) Apay kasta unay ti pannakapaay dagiti tattao a mangituray iti bagbagida?
Ipaay ti Biblia ti rason, nga ilawlawagna: “Saan nga agtaud iti tao a magna ti panangiturong kadagiti addangna.” (Jeremias 10:23) Saan, saan a biang, wenno kalintegan ti tao, ti mangituray iti bagina wenno ti padana a tao. Daytat’ naisangsangayan a kalintegan ni Jehova a Dios, ti Namarsuatayo, a maipapan kenkuana naibaga kadatayo: “Ni Jehova isu ti Ukomtayo, ni Jehova isu ti Mangmangted iti linteg kadatayo, ni Jehova isu ti Aritayo.”—Isaias 33:22.
Agkaykaysanto laeng ti lubong inton awaten dagiti amin a tattao ni Jehova a Dios kas Agturay. Ngem mapasamakto kadi dayta? Nabayagen maysa a mammadto ti Dios sinaritana “ti maudi nga al-aldaw,” inton adu a tattao sapulendanto ni Jehova a maipaay iti pannakaisuro.
Ti Naipadto a Sangalubongan a Kappia
“Ket maaramidto kadagiti maudi nga al-aldaw,” insurat ni mammadto nga Isaias, a “ti balay ni Jehova maipasdekto a sititibker iti tapaw dagiti bambantay . . . ket amin dagiti nasnasion agayusdanto kenkuana. Ket adu dagiti inilin-ili a mapanto ken agkuna: ‘Umaykayo, ket sumang-attayo iti bantay ni Jehova, iti balay ti Dios ni Jacob; ket isuronatayonto kadagiti danana.’” No ituloytay pay a basaen, makitatayo ti resulta ti panangsapul iti panangisuro ni Jehova. “Ket pandayendanto dagiti kampilanda a pagbalinen a dingding ti arado, ket dagiti pikpikada pandayendanto a komkompay,” kuna pay ti padto. “Ti maysa a nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano.”—Isaias 2:2-4.
Wen, ti resulta ti panangipangag itoy a nadiosan a panangisuro isut’ pannakapukaw ti panagdadangadang, kinaranggas dagiti tribo, panaggugubat. Impagarup dagiti tattao nga agtuturay a matungpalda daytoy a padto ti Biblia ket insuratda pay ti maudi a pasetna iti pader ti Plasa ti Naciones Unidas idiay Siudad ti Nueva York. Kaskasdi, immadu latta ti gubat ken panaggiginnura kadagiti nasion ken tribo agingga iti pagnguduan ti 1993. Gapuna ibagayo kadi a napaay ti padto ti Dios?
Saan, saan a napaay—ta dagiti tattao manipud iti amin a nasnasion agay-ayusdan nga agturong iti balay ni Jehova tapno umawat iti nadiosan a pannakaisuro. Kinapudnona, anian a naindaklan a pammaneknek daytoy “Nadiosan a Panangisuro” a Kumbension dagiti Saksi ni Jehova itoy a kalgaw kas kaitungpalan daytoy a padto! Ti sangalubongan a panagkakabsat dagiti Saksi ni Jehova dina palubosan—uray ti rasa, nasionalidad, wenno nagtaudan a tribo—a mangpataud iti gura wenno panagpipinnatay iti maysa ken maysa. Piguratibo a pinandaydan dagiti kampilanda a pinagbalin a dingding ti arado ken dagiti gayangda a komkompay.
‘Ngem,’ mabalin nga adda agkuna, ‘dika inanamaen nga ipangag ti tunggal maysa ti bilin ti Dios a mangayat iti maysa ken maysa.’ Nupay daytoy ket pudno, adda pannakabalin ti Dios a mangpukaw kadagiti amin a bumusor iti nadibinuan a pagayatanna.
Ti Aramidento ti Dios
Ikarkararagyo kadi ti insuro ni Jesus kadagiti pasurotna, nga isut’: “Amami nga addaka sadi langit, Madaydayaw koma ti naganmo. Umay koma ti pagariam. Maaramid koma ti pagayatam, kas sadi langit kasta met ditoy daga.”? (Mateo 6:9, 10, King James Version) No ikarkararagyo daytoy, agtalekkayo a ti naayat a nailangitan nga Amatayo sungbatannanto dayta a kararag. Kasano ti panangaramidna iti dayta?
Tinudinganen ti Dios ti Anakna, “Ti Prinsipe ti Kappia,” kas ti pinilina nga agturay iti “gobierno[na],” ti pagarian a naisuro nga ikararagtayo. (Isaias 9:6, KJ) Kasapulantayo ti kasta a nabilbileg ngem tao nga espiritu nga agturay, ta isu laeng ti makabael a mangpukaw iti dakes nga impluensia ni Satanas ken dagiti demoniona iti sangatauan. Dagiti agtuturay a tattao, kasano man ti kasayaat ti panggepda, saanda a maaramid ti kasta.—1 Juan 3:8; Apocalipsis 12:7-12.
Ngem, anianto ti mapasamak kadagiti gobierno itatta a di agpaituray iti nadibinuan a panangituray? Ti sabali pay a padto ti Biblia a mangdeskribir ti Pagarian nga insuro ni Jesus nga ikararagtayo kunaenna: “Ti Dios ti langit mamangonto ti maysa a pagarian a kaanoman dinto madadael . . . [ti nailangitan a Pagarian ti Dios] burakennanto ken ibusennanto amin dagitoy a pagarian, ket isu agtalinaedto iti agnanayon.” Gapuna ti panangikararag nga umay ti Pagarian ti Dios kaipapananna nga ikarkararagtayo ti maysa a sangalubongan a gobierno iti sidong ti panangituray ti “Prinsipe ti Kappia.”—Daniel 2:44; Isaias 9:6.
Kalpasanna, no nagkaykaysanton ti natauan a pamilia iti sidong ti Pagarian ti Dios, amin ayatennanto ti maysa ken maysa aniaman ti rasa wenno nagtaudanna a tribo. Anian a nagdayagto dayta a tiempo! (Apocalipsis 21:3, 4) Awisendakayo a mangtagiragsak iti panangkita uray itan iti dayta natalna a kasasaad iti ummong dagiti Saksi ni Jehova ken manginanama a kaduada agingga iti tiempo a ti intero a lubong agkaykaysanton iti kappia.
[Ladawan iti panid 15]
Pagkaykaysaento ti Pagarian ti Dios dagiti amin a tattao iti kappia