“Long-Distance” nga Awag ti Elepante
TI ABILIDAD dagiti elepante a mangsapul iti maysa ken maysa a dagdagus no agaddayoda iti adu a milias ti nangriribuk kadagiti sientista iti adu a tawtawen. Itan, kasla, ti sekreto ti kadadakkelan a sibibiag nga an-animal iti daga naipalgaken—mangusarda iti infrasound! Dayta dagiti timtimek a nakabangbangag tapno mangngeg dagiti tao.
Dagiti elepante isuda dagiti immuna a mamalia iti daga a nasarakan a makiuman iti maysa ken maysa babaen iti infrasound, kuna ti Focus, ti pagiwarnak iti World Wildlife Fund. Ti managsirarak a ni Katharine Payne iti Cornell University (E.U.) naammuanna ti “sekreto” a panagsasao dagiti elepante tallo a tawenen ti napalabas idi napaliiwna dagiti elepante iti Asia idiay zoo. Nadlawna ti panagpigerger iti aglikmutna a kaasping ti patauden “ti kabangagan a timek ti organo.” Kamaudiananna, maysa a naisangsangayan nga alikamen a pagirekord ti nangipakita a dagiti elepante iti Asia ken dagiti daddadakkel nga elepante iti Africa ti agsisinnukat kadagiti nakaad-adu nga infrasonic nga awag. Yantangay dagiti nabangag a timtimek ti agdaliasat iti nawatwatiwat a distansia ngem ti nasinggit a timtimek, ti naammuan ti mabalin a mangilawlawag no kasano a dagiti elepante makiumanda iti maysa ken maysa ket mabalinda ti agtignay a kas ti nakasingsinged a grupo ti pamilia.
Kadagita a grupo, maysa a baketen nga elepante ti mangipaay iti bilin. Dagiti kakabsatna a babbai ken annakna a babbai ti umimdeng a buyogen ti panagraem iti inada. Ngem ti ubing nga elepante ti di mangikankano no dadduma iti aniaman nga awag, infrasonic wenno saan. “Uray no pumanawen ti pangen,” kuna ti Focus, “no ti ubing nga elepante tarigagayanna ti maturog, ti intero a pamilia ti agsardeng ket agurayda agingga a mariing ti ubing sakbay ti iyaakarda.” Daytoy a gagangay a pannakaseknan iti 200-libra (90 kg) nga ubing ti saan a pakairamanan ti nataenganen a lalaki nga elepante. Agbukbukodda nga agbiag. Ngem “no sisasaganadan a mangasawa,” innayon ti pagiwarnak, ti infrasound ti kasla mangipaay kadagiti lallaki “ti nakaskasdaaw nga abilidad a mangsapul a dagdagus kadagiti babbai.”
Wen, ti infrasonic a komunikasion ti sabali pay a pangarigan ti kinasirib ti Namarsua kas naiparangarang iti pagarian dagiti animal.—Salmo 104:24.