Awan Pagtaenganna​—Ngem Sibibiag!

Babaen ti koresponsal ti “Agriingkayo!” iti Japan

DAGITI immuna a bilog a nangkarga kadagiti nagkamang simmangpetda iti puerto iti igid ti Izu Peninsula bayat ti rabii iti Nobiembre 21. Kalpasanna naikeddeng a dagitoy a tattao ti masapul a maibaon idiay Tokyo, agsipud ta ti Oshima adda iti sidong ti panangaywan iti gobierno ti siudad ti Tokyo. Ti gobierno ti siudad a kadua ti nasional a gobierno ti nangala iti addang a nangorganisar iti trabaho a panangtulong. Dagiti Saksi ni Jehova kadagiti luglugar iti Izu ken Tokyo agraman dagidiay adda iti hedkuarters iti sanga, nga adda iti Siudad ti Ebina nga agarup 50 milias laeng (80 km) manipud iti Mount Mihara, nangorganisarda met ti trabaho a panangtulong.

Bayat a ti damag iti pasamak ti mangsinga kadagiti gagangay a programa iti telebision, dagiti Saksi ni Jehova nga agnanaed iti asideg nagbalinda a nangnangruna a maseknan kadagiti naespirituan a kakabsatda a lallaki ken babbai iti isla. Ni Nobumasa Obata iti Kongregasion ti Ito ken dagiti dadduma nakiumanda kadagiti Saksi idiay lugar ti Izu ket inorganisarda ti trabaho a mangawat kadagiti nagbakuit. Idi alas 6:30 t.r. iti dayta nga aldaw, dagiti Saksi ni Jehova addada iti tunggal puerto iti Izu Peninsula ken idiay Atami, a sisasagana nga umawat kadagiti kakabsatda manipud idiay Oshima.

Idi ni Jiro Nishimura ken dagiti uppat a dadduma pay simmangpetda idiay Atami iti agarup alas dies iti dayta a rabii, dagiti Saksi idiay Atami, nga addaan kadagiti Pagwanawanan ken Agriingkayo! kadagiti im-imada, ti nangsabet kadakuada. Agsipud ta dagiti autoridad ti gobierno saanda pay a naikeddeng ti aramidenda, dagiti nagbakuit ti napalubosan a makipagnaed iti siasinoman a tarigagayanda. Dagitoy ti nagturong a napan idiay Yugawara, a sadiay ti pagserserbian ti anak a lalaki ni Nishimura kas panglakayen iti lokal a kongregasion. Ti apartment a pagnanaedanna ti nagbalin a sentro a pagtitiponan dagiti nagbakuit iti kongregasion ti Oshima.

Iti alas 8:00 iti sumaganad nga agsapa, ti Branch Committee idiay hedkuarters iti sanga iti Watch Tower Society idiay Ebina, ti nangikeddeng a mangibaon a dagus ti dua a pannakabagi ti sanga iti lugar ti Izu ken dua iti Tokyo a mangorganisar iti trabaho a panangtulong.

Bayat ti panangisalaysay dagiti pannakabagi ti sanga ti trabaho a panangtulong a kadua ni Nishimura, simmangpet ni Mitsuo Shiozaki nga addaan kadagiti abasto a tulong manipud iti kongregasionna idiay Numazu. Dagiti nagbakuit ti nangnangruna a nangapresiar kadagiti kawes a naiwaras kadakuada, ta adu kadakuada ti awanan kadagiti kawes malaksid kadagiti adda a suotda idi pinanawanda ti isla. Buyogen iti panagyaman inawatda met ti taraon nga inyegna.

Naituding dagiti komite iti panangtulong idiay Izu ken Tokyo tapno mangiwaras kadagiti kasapulan a pundo kadagiti miembro iti Kongregasion iti Oshima. Dagita a komite ti mangaywan met iti naespirituan a kasapulan dagiti nagbakuit.

Ti Trabaho a Panangtulong Idiay Tokyo

Idi alas 9:55 t.r. idi Nobiembre 21, idi nakapanawen dagiti dadduma a barko nga addaan kadagiti nagbakuit a para kadagiti siudad iti Izu Peninsula, ti gobernador iti Tokyo ti nangibilin nga amin dagiti nagbakuit ti masapul a maipan idiay Tokyo. Ni Yoshio Nakamura, ti panglakayen idiay Kongregasion dagiti Saksi ni Jehova iti Mita idiay Tokyo, ti nakalikaguman a mangorganisar iti trabaho sadiay. Ti apartment ni Nakamura, ti nagbalin a hedkuarters a maipaay iti trabaho a panangtulong idiay Tokyo.

Nagkalikagum kadagiti dadduma manipud iti kongregasionna ken dadduma manipud iti Kongregasion iti Shinagawa a makikadua kenkuana. Sangapulo kadagitoy ti pimmanaw iti apartment ni Nakamura iti agarup alas dos iti agsapa ti Sabado ket nagturongda kadagiti pier a sadiay ti naiyeskediol a pagsangladan dagiti bilog manipud Oshima. Dagiti kakabsat addaanda kadagiti karatula a kunkunana: “Dagiti miembro iti kongregasion dagiti Saksi ni Jehova iti Oshima, pangngaasiyo ta makiumankayo kadakami.”

Agingga a simmangpet ti naudi a bilog, nagsublisublida iti nagbaetan dagiti dua a pier a sinangladan dagiti bilog. Idin ket kalpasanen iti alas 10 t.b. idi agsapa ti Sabado. Dagiti Saksi ni Jehova idiay Kongregasion iti Chuo napanda met iti sabali a pier a sadiay ti sinangladan dagiti barko manipud Oshima. Gaput’ dida ammo no ania a barko ti addaan kadagiti nakalugan a kapammatianda, dagiti Saksi idiay Tokyo pinadasda a sinabet dagiti amin a barko a simmangpet idiay Tokyo.

“Dagiti Saksi ni Jehova,” nalagip ni Kazuyuki Kawashima, “isuda laeng dagiti pannakabagi iti relihiuso a grupo nga immay nangsabet kadagiti kapammatianda idiay pier. Ti laeng sabali a grupo a nangsabet kadagiti nagkamang isut’ manipud ti union dagiti mannursuro.”

Idi rabii ti Sabado, dagiti miembro iti kongregasion iti Shinagawa ti siboboluntario a nangurnong kadagiti kawes ken dadduma pay nga abasto a tulong a dagdagus a maiwaras kadagiti naespirituan a kakabsatda manipud Oshima. Dagiti Saksi inluganda dagitoy nga abasto iti van ket sinarungkaranda dagiti paglinongan a sadiay ti nagnaedan dagiti nagbakuit a Saksi. Dagiti Saksi manipud Oshima agraman dagiti saan a Saksi nga adda sadiay nagunggonaanda manipud kadagiti abasto a tulong.

Naparegta iti Pannakaseknan dagiti Dadduma

Maysa a nagbakuit a Saksi ti nangisalaysay: “Idi pimmanawak idiay Oshima, dakami a mismo dikam ammo no sadino ti papananmi. Idi dimsaagkami iti barko, nupay kasta, nakitami dagiti karatula a kunkunada, ‘Saksi ni Jehova.’ Panunotenyo laengen ti siddaawmi ken ti pannakaparegtami! Nagarubos dagiti lulua iti mata ti asawak ta naringbawan iti pannakabang-ar iti pannakasarakmi kadagiti kakabsatmi sadiay nga immay simmabet kadakami idiay pier.

“Di nagbayag idi addakamin idiay Sports Hall iti Koto Ward ken nagteleponokami ken Kabsat Nakamura dimteng ti pannakabagi ti sanga a mangparegta kadakami. Daytoy ti pudno a nangparegta kadakami, ket awan dagiti sasao a masarakanmi a mangiyebkas iti panangapresiarmi.”

Bayat iti lawas, dagiti miembro ti komite iti panangtulong ti nangsarungkar kadagiti amin a pagtaengan dagiti Saksi ket kinitada dagiti kasapulan dagiti kapammatianda. Nasarakanda a dagiti nagbakuit a Saksi ti inaywanan a naimbag dagiti lokal a kongregasion. Dadduma nga estudiante ti Biblia ti naawis kadagiti pagtaengan dagiti lokal a Saksi a maipaay iti inaldaw a taraon, ket inapresiarda dagita nga ar-aramid iti kinamanangngaasi nga impakita kadakuada dagiti Saksi a dida am-ammo sakbay daytoy a didigra.

Daytoy a panagbakuit ket naballigi gapu iti umiso a pakdaar a naipaay ken impangag dagiti tattao ida. Ngem amin a sangatauan sangsanguenna ti dakdakkel pay a peggad nga um-umay a sipapartak. Maipapaayen ti pakdaar, a mangipakpakita kadagiti tattao no kasano ti makalasat iti daytoy a peggad ket isalakan ti biagda. Ipangagyonto aya daytoy a pakdaar?

[Ladawan iti panid 7]

Ni Jiro Nishimura a mangkitkita iti ayan dagiti padana a manamatia

[Dagiti Footnote]

[Dagiti ladawan iti panid 8]

Agiwarwaras ni Mitsuo Shiozaki kadagiti abasto a tulong

Adu a nagbakuit naturogda kadagiti nalammiis a datar dagiti gymnasium