1987—Tawen dagiti Awan Pagtaenganna
NO RUMABIIN, rinibribo a tattao idiay Bombay, São Paulo, Siudad ti Mexico, Siudad ti Nueva York, ken pinulpullo pay a dadduma a siudad ti maturogen kadagiti pagsangladan ti barko, iti sirok dagiti rangtay, ken kadagiti bangketa. Agkukutda kadagiti kahon a karton, agiddada kadagiti nakuneskunes a diario, wenno maturogda kadagiti basta semento. Dagiti sangagasut a milion nga awan pagtaenganna iti lubong addadan iti “pagtaengan.”
Kaskasdi, minilion ti awan pagtaenganna iti sabali a kaipapanan. Dagitoy agnanaedda kas squatters iti saan a nainkalintegan ken di nasayaat a buyaen nga ili dagiti kalkalapaw, slums a sadiay dagiti agay-ayus a kalkalsada isu dagiti banioda ket dagiti kanayon nga adda a buitre dagiti managkolekta kadagiti basura. Dagiti sinsinan a “pagtaengan” isu dagiti agtedted a paglinongan a naaramid kadagiti saksako, linaga a runruno, dagiti linasang a drum, pitak, ken batbato. Nasurok a kagudua kadagiti amin nga agnanaed kadagiti Rumangrang-ay a Pagpagilian ti agnanaed iti kasta a nakaap-aprang a kasasaad.
Tapno ipamaysa ti atension ti lubong iti kasasaad dagiti awanan ti pagtaengan kadagiti siudad ken tapno pasayaaten ti kasasaad ti panagbiagda, ti organisasion ti Naciones Unidas indeklarana ti 1987 kas ti Internasional a Tawen dagiti Awan Pagtaenganna.
“Iti intero a lubong, masapul a bigbigentayo a saantayon a makasarak iti pamay-an a pangrisot iti daytoy a parikut,” kuna ni Max van der Stoel, tsirman iti CLE,Dutch National Committee of the Year of the Homeless.CLIL, “Dayta ti kaseseriosuan a parparikut ti lubong.” Ket kumarkaro ti parikut. NieuwsBrief voor het International Jaar van de Daklozen (Newsletter for the International Year of the Homeless) pattapattaenna nga iti umay a dekada wenno iti labesna pay, maysa a bilion pay a tattao ti manginayon kadagiti kalapawda iti napuspuseken nga slums iti siudad—a mangdoble iti bilang ti populasion kadagiti adu a siudad dagiti Rumangrang-ay a Pagpagilian!
Ania ti maaramidan maipapan iti parikut? Ti panangdalus kadagiti ili dagiti kalkalapaw ti mangpaadu laeng kadagiti tattao nga awan ti pagtaenganna. Imbes ketdi, pinili ti NU, ti panangpasayaat kadagiti slum, a mangipaay kadagiti luglugar dagiti slum kadagiti kangrunaan a probision, a kas kadagiti pasilidades iti panagdalus. Ket imbes a mangipatulod kadagiti buldoser—a mangibati kadagiti pakailasinan dagiti narakraken a paglinongan ken dagiti maup-upay a tattao—dagiti gobierno ti mangipaay kadagiti squatters ti natalged a pagtaengan, nalabit babaen iti panangiprenda. Irekomendar pay ti NU a dagiti pundo ti panangpasayaat ti mapaadu iti kasta unay ta, kas kinuna ti newsletter, “ti pagtaengan, agraman ti taraon ken kawes, nairaman kadagiti kangrunaan unay a kasapulan ti tao.”
“Ti taraon ken kawes” ti pudno a kangrunaan a kasapulan. (1 Timoteo 6:8) Ket ti Dios paregtaennatayo a mangaramid kadagiti ar-aramid iti natauan a kinamanangngaasi a mangipaay iti tulong kadagidiay nga agkurang, nangnangruna kadagiti pada a manamati. (1 Juan 3:17; Galacia 6:10) Nupay kasta, tulongannatayo ti Sao ti Dios a maaddaan iti napudno a panangmatmat kadagiti parparikut ti tao. Napaliiw ni Ari Salomon: “Ti killo saan a mapalinteg.” (Eclesiastes 1:15) Gapuna, dagiti proyekto a kas ti Internasional a Tawen dagiti Awan ti Pagtaenganna, nupay no awan duadua nasayaat ti panggepna, saanna a naan-anay a marisot dagiti parparikut ti tao.
Daytoy kadi awan ti maipaaynan a namnama a maipaay kadagiti awan ti pagtaenganna? Maisupadi ketdi! Bayat iti maikanem a siglo K.K.P., impadto ni Jehova a Dios ti maysa a “proyekto ti panagbalay” a maibangon idiay Juda—maysa a daga nga umuna a “malangalang, nga awan a pulos ti agnaed” bayat iti 70 a tawen. (Jeremias 9:11; 29:4, 5, 10; 32:43) Kasta met, dagiti awan pagtaenganna ita makasiguradoda a pasayaatento ni Jehova ti kasasaad ti sangatauan iti sangalubongan a kasaknap. (Isaias 65:21) Anian a makaliwliwa ti pannakaammo, a ti Tawen dagiti Awan Pagtaenganna ti sarunuenton ti maysa a milenio a mangiyegto iti pudpudno a talna, kinatalged, ken ti umdas a pagtaengan!—Apocalipsis 20:4; 21:3, 4.