Walang nga Ubbing—Adda Aya Solusion?
DAGITI tattao a pudno a maseknan kadagiti padada a tattao dida kayat ti sumuko a kasla awanen ti mabalin a maaramidan kadagiti walang nga ubbing. Mabigbigda a saan laeng a pagtaengan ti kasapulan dagiti walang nga ubbing. Rumang-ay dagiti ubbing no addaanda iti talna iti panunot, makaparagsak a trabaho, nasayaat a salun-at, ken ti panagtalek iti bagida met laeng. Dagiti napudno a lallaki ken babbai situtulok nga ipaayda dagiti bagbagida a tumulong iti pagimbagan dagiti walang, ket makomendaran dayta. Ngem nupay adda ti kasta a panangikagumaan, agtultuloy pay laeng ti parikut kadagiti walang nga ubbing.
Ti makagapu ket ti agdama a sistema a mangpatpataud iti kasasaad a mangpataud kadagiti walang nga ubbing ket saan a matarimaan. Daytat’ kas iti nadadael a kotse a din mabalin a tarimaanen. Kinapudnona, ditay kadi bigbigen a ti kinamanagpataud ti tao saanna mismo a maiyeg ti nalinteg a natauan a kagimongan?
Nakaragragsak, nupay kasta, posible ti maysa a panagbalbaliw—ngem saan a babaen iti tao. Ti laeng Mannakabalin-amin a Dios ti addaan iti kabaelan ken ti kinasirib a mangpukaw nga interamente ti aniaman a makadangran ditoy daga. Ti Saona, ti Biblia, isalaysayna kadatayo maipapan iti administrasion ti nailangitan a Pagarianna ken no kasano a dayta tungpalennanto ti tarigagay ti tao a maipaay kadagiti nalinteg a kasasaad ditoy daga a mismo.—Daniel 2:44.
Mangipateg ti Dios
Pagarupenyo kadi a posible iti Dios ti panangikkatna ti agdama a sistema ket rugianna ti maysa a baro a wagas ti panagbiag? No kasta, laglagipenyo a saan laeng a ti pannakaisalakan ti tao no di ket, kangrunaanna, ti nagan ti Dios a ni Jehova ti nairaman. Kas ti Namarsua, ti natan-ok nga ulidan iti kinaurnos ken kinaumiso iti oras, impanamnamana kadatayo nga isut’ agtignay iti umiso a tiempona ken pamay-anna, ket daytoy aramidenna babaen iti Pagarianna. Kinapudnona, dayta a Pagarian ket saan a banag a di masinunuo ken di maawatan no di ket maysa a nailangitan a gobierno, a makabael a mangipaay iti panangaywan ken agtultuloy a mangisuro tapno mangtaming kadagiti pudno a kasapulan ti tao.—Isaias 48:17, 18.
Mabalin nga ipapuso ti walang nga ubing dagiti sasao ni David idiay Salmo 27:10: “No da ama ken ina baybay-andak, ni ngad Jehova pidutennakto.” Makaparegta met ti pannakaammo a ti nababa a kasasaad iti lubong di mangdiskualipikar iti maysa nga umammo maipapan iti pagayatan ti Dios. Kunaen ti Proverbio 22:2: “Dagiti nabaknang ken napanglaw agsasarakda. Ni Jehova ti Namarsua kadakuada amin.” Wen, dagiti daksanggasat, no napasnekda, makasiguradoda a situtulok ni Jehova a tumulong kadakuada.—Salmo 10:14, 17.
Interesado ni Jehova iti pagimbagantayo ket ammona no kasano a pennekenna dagiti nainkalintegan a tarigagaytayo. Naminsan inimtuodna dagiti Israelitas babaen ken mammadto nga Isaias: “Saan a daytoy aya ti panagayunar a pinilik? . . . Saan aya a tapno iwarasmo ti tinapaymo iti mabisin, ken ti panangalam iti balaymo iti napanglaw a napagtalaw? No makitam ti silalamolamo, tapno isu kawesam?” (Isaias 58:6, 7) Daytoy ti panagpapada ken kinahustisia nga iyegto ti Dios babaen iti gobierno ti Pagarianna. Awanto ti di maikankano wenno matrato a kasla isut’ di timmaud. Gapuna, ti Salmo 145:19 ibagana kadatayo: “Tungpalennanto ti tarigagay dagiti agbuteng kenkuana, denggennanto met ti ikkisda, ket isalakannanto ida.” Ti ayat iti Dios ken iti pada a tao isunto ti kangrunaan a puersa a mamagkaykaysa ti natauan a pamilia. Kas banagna, ti parikut kadagiti walang nga ubbing marisotton. Awanton ti mabaybay-an nga agmaymaysa!
Lapdanto Kadi ti Kinaimperpekto ti Panggep ti Dios?
Saan, ti dakes a pagannayasan ti tao saanto a mapalubosan a manglapped iti panggep ni Jehova a mamagbalbaliw iti daga a maysa a paraiso iti ragsak. Dagidiay addaan iti pribilehio nga agbiag iti baro a lubong ti Dios, agsipud ta nakalasatda iti gubat ti Armagedon, kas nadeskribir iti Biblia, wenno agsipud ta napagungarda manipud kadagiti natay tapno agbiag manen ditoy daga, maparegtadanto a mangaramid iti kasayaatan a kabaelanda.—Juan 5:28, 29; Apocalipsis 16:14, 16.
Awan ti siasinoman a makasarakto iti trabahona nga awan ti mamaayna. Magunggonaanto ti trabahona. Pangngaasiyo ta paliiwenyo, ti kari ti Dios: “Isuda didanto mangbangon, ket sabali ti agnaed; didanto agmula ket sabali ti mangan; ta kas kadagiti al-aldaw ti maysa a kayo kastadanto dagiti al-aldaw ti ilik; ket dagiti pinilik agrasakdanto iti mabayag iti aramid dagiti im-imada. Isuda didanto agtrabaho iti ubbaw, didanto agpasngay a maipaay iti didigra; ta isuda ti kapuonan ti binendisionan ni Jehova, ken ti putotda makiadda kadakuada.” (Isaias 65:22, 23) Dikay kadi kayat ken ti pamiliayo a makita ti kaitungpalan dagitoy a sasao? Ket anian a rag-o ti makaammo nga iti daytanto dikayton makasarak iti bisin, kinapanglaw, kinaawan ti pagtrabahuan, wenno dagiti walang nga ubbing!
Awan duadua, dagidiay agdama nga agsagsagaba kadagita a kinakurang, kas kadagiti walang nga ubbing, ad-adda nga ipatpategdanto dagiti bendision iti naragsak a pamilia ken ti nanam-ay a pagtaengan. Kas ti mabasatayo idiay Isaias 65:17: “Dagiti immun-una a bambanag didanto malagipen, didanto mapanunoten.” Dagiti tattao nga addaan ti pribilehio nga agbiagto iti dayta masarakandanto nga awanen dagiti dakes a kasasaad iti agnanayon ket dagiti tattao iti amin a nasnasion, pagsasao, ken rasa agtrabahodanto a sangsangkamaysa a buyogen ti naayat a panagkakabsat. Dagiti pamilia a makalasat a sumrek iti dayta a tiempo awan duadua nga itultuloydanto ti mangipaay iti dayaw iti Dios. Kuna ti Salmo 37:11 maipapan iti dayta naindagaan a Paraiso: “Ngem dagiti naemma tawidendanto ti daga, ket maay-ayatandanto iti kinaruay ti talna.”
Kasano a Makapagsaganakayo Maipaay iti Masanguanan?
Uray pay itan, posible ti manggun-od iti makaited-biag a pannakaammo ken mangparang-ay kadagiti matarigagayan a kualidad, kas iti ayat ken kinamanangngaasi. Kasano a kasta? Inay-ayat ni Jehova ti natauan a pamilia, ket babaen iti Anakna, ni Jesu-Kristo, ‘iyadanina dagiti tattao ken Kristo’ babaen ti pannakaiyam-ammoda iti Saona ken iti ilina. (Juan 6:44) Isut’ addaan met ti maysa nga organisasion ditoy daga nga addaan iti programa ti panangisuro a makatulong kadakayo a mangaramid iti pagayatan ti Dios tapno mainanamayo iti naragsak ken addaan panggep a panagbiag iti agnanayon. Gapuna, naikasaba ti naimbag a damag ti Pagarian kadagidiay agkasapulan. (Mateo 24:14) Kuna ti Sao ti Dios: “Ti mangumsi iti kaarrubana makabasol, ngem naragsak daydiay mangipakita ti asi kadagiti napanglaw.” (Proverbio 14:21) Makapabileg-puso ti pannakaammo nga uray pay dagiti daksanggasat makaadanida iti Dios no umiso ti motiboda. Nagsurat ti salmista: “Ngem napanglawak ken nanumo. O Dios, darasem ti umay ditoy dinnak. Sika ti tumulong ken Mangisalakan kaniak. O Jehova, dika kadi agtaktak.”—Salmo 70:5.
Wen, ti Sao ti Dios makaipaay kadakayo iti pudno a namnama maipaay iti masanguanan. Kaskasdi, ti gagangay a pannakausar iti sao a “namnama” dina kankanayon a kaipapanan a sigurado. Idiay Brazil masansan a mangngegan ti ebkas nga: “A esperança é a última que morre” (umasping iti Ingles nga “Hope springs eternal”). Ti kapanunotan isu ti panagtalinaed a manginanama uray pay no awan ti pakaibatayan dayta. Maisupadi iti dayta, ti Kasuratan mangipaay iti natibker a rason iti panangtaginayon iti nabileg a pammati iti Dios ken ti namnama kadagiti karina. Mabasatayo idiay Roma 10:11: “Isuamin a mamatinto kenkuana saanto a mabainan.” Ti kasta a naibatay-Biblia a namnama saanto nga agturong iti pannakaupay. No kasano a pudno dagiti pakaskasdaawan ti dagatayo, isu a mangpaneknek iti kinasirib ken ayat ni Jehova, kasta met ti kaitungpalan dagiti padpadto ti Biblia palubosannakayo a maaddaan iti positibo a panangmatmat, maysa a napudno a namnama maipaay iti masanguanan.—Roma 15:13.
Ti Pagarian ti Dios isu ti pudno a solusion maipaay kadagiti walang nga ubbing, wen, maipaay kadagiti amin nga agayat iti umiso. Ti pananggun-od iti umiso a pannakaammo iti Biblia itan ti mamagbalin kadakayo a mangtagiragsak iti naragsak ken agnanayon a biag iti baro a lubong ti Dios. Ti pananginanama kadagitoy a karkari ket saan laeng nga ar-arapaap. Kas ibaga ti Proverbio 11:19: “Ti sitatalinaed iti kinalinteg makagtengto iti biag.”
[Kahon iti panid 11]
Temporario a Solusion?
Ti maysa a nakaunnat nga ima manipud iti walang nga ubing ket mabalin a makaallukoy iti puso. Ngem dagiti maseknan nga indibidual dida ammo no kasano ti itutulong iti walang nga ubing. Tapno saanda unay a makarikna iti pannakabasol, dadduma ti mangited iti ubing ti sumagmamano a sinsilio ket dagusen a pumanawda. Kaskasdi, mammano a dagiti naipalimos ket magastos a maipaay iti taraon wenno pagtaengan. Imbes ketdi, daytat’ mausarto a panggatang iti droga wenno alkohol. Ngarud, dadduma a sibiko ti panagpampanunotna a nataengan ipaayda ti atension ken kuartada kadagiti lokal a programa nga itantandudo ti gobierno a mariknada a makatulong kadagiti walang nga ubbing. Dadduma a tattao ti mamati a ti ad-adda a praktikal a pamay-an isu ti panangiturong iti walang nga ubing iti umiso nga ahensia a maipaay iti tulong. Iti kastoy a pamay-an, dagiti maseknan nga umili mariknada a padpadasenda a pagbalinen ti komunidadda nga ad-adda a manangngaasi.
[Ladawan iti panid 9]
“Ta kas kadagiti al-aldaw ti maysa a kayo kastadanto dagiti al-aldaw ti ilik.”—Isaias 65:22
[Credit Line]
FAO photo
[Ladawan iti panid 10]
“Didanto agmula ket sabali ti mangan.”—Isaias 65:22