“Saan a Pudno Dayta!”

“TI Mayo 31, 1982, ket maysa a nagsayaatan nga aldaw. Naraniag ti init, asul ti langit, ket pagarupko a daytoy ket nagsayaatan a gundaway a mangdalus iti paraangan. Nabiit pay a pinukanmi ti lakayen a Chinese elm, ket addada pay nabati a rutruting ken sangsanga iti paraangan. Kalpasanna nalagipko a ti gayyemmi a ni George addaan iti mulcher a mamagbalin a nalaklaka iti trabaho, gapuna immawagak kenkuana.

“Ni George ket maysa nga aduanen ti kapadasan a piloto, ket pagay-ayatna ti agpatayab. Gapuna di nakaskasdaaw idi imbagana kaniak a mangilugan kadagiti gagayyem ket sinaludsodna no kayatmi ti makilugan. Ti asawak a ni Dianne ken siak inkeddengmi a nagsayaatan a panagbaliw ti aramid dayta kalpasan ti panangdalus iti paraangan. Intugotmi ti tallo-ti-tawenna nga anakmi a babai. Ni Maria, maysa a nakaay-ayat, nalaing nga ubing nga addaan nasudi a kolor kape a buok ken mata ket maragsakan iti kasta unay.

“Idi nakagtengkami iti eropuerto, ti sabali a gayyem agur-uray iti turnona nga aglugan, gapuna limmugankami amin iti uppat a pasahero nga eroplano. Timmayabkami a nangballasiw iti danaw ket nagturongkami kadagiti kabambantayan. Nakapimpintas. Timman-awkami ket nakitami dagiti ammomin a pakailasinan ti lugar. Dadduma a tattao ti addaan iti piknik iti tuktok ti maysa a turod. Naragsakan ni Maria. Kalpasanna, idi lumasatkami iti tuktok iti maysa a turod, kellaat a sineppeg ti napigsa nga agpababa nga angin ti eroplano. Simmardeng a nagandar ti makina, ket natnag ti eroplano!

“Ti laeng mapanunotko isu ti panangpadasko a makagteng iti baet ti asawak, a nakasaklot ken ni Maria, ken iti tugaw iti sango. Diak pulos naaramid dayta​—natinnag ti eroplano iti sikigan ti bantay.

“Pinadasko ti tumakder ngem diak makagunay. Mangngegko ni Dianne nga agik-ikkis a maipaay iti tulong, ngem awan ti maaramidak. Ti laeng maaramidko isu ti panagpukkawko a maipaay iti tulong.

“Kamaudiananna, dagiti grupo dagiti mangngagas a maipaay iti emerhensia immaydakami innala manipud iti bantay. Nupay no naaramidanmi ti amin nga umiso a pamay-an iti crash landing, natay ni George ken ti gayyemna. Ti dadduma kadakami ti nagsagaba iti nakaro a pannakadangran. Ni Maria nadangran ti ulona ken ti uneg ti bagina. Ti katugangak a lalaki ti natudingan iti narikut a trabaho a mangipudno kaniak iti kamak iti ospital nga isut’ natay​—daytat’ maysa a duyok iti pusok. ‘Apay nga isu pay ti natay? Apay a saan pay laeng a siak? Saan a nainkalintegan a ti ubing a kas kenkuana ti matay,’ kinunak. No koma no diak inawat dayta a panaglugan . . .

“Narigat met ti adda a kasasaad ni Dianne nga addaan iti natukkol a dori. Tallo a lawas kalpasan ti pannakatnag ti eroplano, isut’ natay met. Napukawko ti anakko ken ti asawak iti naminsan laeng a pannakatinnag. Impagarupko a napukawkon ti isuamin. Kasano itan ti panagbiagko?”​—Kas insalaysay ni Jess Romero, New Mexico, E.U.A.

“Ti anakko a lalaki a ni Jonathan napan idiay Long Island a sumarsarungkar kadagiti gagayyemna. Ti asawak, ni Valentina, dina kayat nga isut’ mapan sadiay. Gapuna kankanayon nga agnernerbios maipapan iti trapiko. Ngem pagay-ayatna ti electronics, ket dagiti gagayyemna addaanda iti shop a sadiay isut’ makagun-od iti praktikal a kapadasan. Addaak iti pagtaengan idiay West Manhattan. Napan simmarungkar ni nanangna iti pamiliana idiay Puerto Rico.

“Makaturturogak iti sanguanan ti TV. ‘Di agbayag sumangpetton ni Jonathan,’ kinunak. Kalpasanna naguni ti batingting ti ruangan. ‘Siguradoak nga isu daytan.’ Ngem saan. Dayta ti polis ken dagiti paramedics.

“‘Mabigbigmo kadi daytoy a lisensia ti tsuper?’ inimtuod ti polis. ‘Wen, dayta ti lisensia ti anakko, ni Jonathan.’ ‘Adda dakes a damag a maipaay kenka. Adda aksidente, ket . . . ti anakmo, . . . ti anakmo natay.’ Ti damo a tignayko ket, ‘Saan a mabalin a kasta! Saan a mabalin a kasta!’​—saan a pudno dayta!

“Dayta a makapakellaat a damag ti nangsugat kadagiti pusomi isu nga agim-imbag pay laeng, dua a tawenen kalpasanna.”​—Kas insalaysay ni Agustín Caraballoso, Nueva York, E.U.A.

“Idiay España idi 1960’s, dakami ti maysa a naragsak a pamilia​—nupay no adda relihiuso a panangidadanes gapu iti panagbalinmi a Saksi. Adda ni María, ti asawak, ken dagiti tallo nga annakmi, da David, Paquito, ken Isabel, nga agtawen iti 13, 11, ken 9 nga agsasaruno.

“Maysa nga aldaw idi Marso 1963, nagawid ni Paquito nga agrekreklamo iti nakaro a sakit ti ulo. Masdaawkami no ania ti gapuna​—ngem saan a nagbayag. Tallo nga oras kalpasanna isut’ natay. Ti cerebral hemorrhage ti nangpapatay kenkuana.

“Natay ni Paquito 24 a tawtawenen ti napalabas. Uray pay kasta, ti nakaro a leddaang gapu iti dayta nga ipupusay adda pay laeng kadakami agingga ita. Awan ti pamay-an a dagiti nagannak a pimmusay ti anakda ket saanda a marikna nga adda banag a napukawda​—kasano man ti kaadu ti tiempo a limmabasen wenno kasano man ti kaadu ti dadduma nga annakda.”​—Kas insalaysay ni Ramón Serrano, Barcelona, España.

Dagitoy ket sumagmamano laeng kadagiti minilion a trahedia a mapaspasamak kadagiti pampamilia iti isuamin a lubong. Kas paneknekan dagiti kaaduan kadagiti agladladingit a nagannak, no alaen ni patay ti anakyo, pudno a daytat’ maysa a kabusor.​—1 Corinto 15:25, 26.

Ngem kasano a nakaibtur dagitoy a natayan a tattao kadagiti kaso a kaad-adaw pay laeng? Mabalin kadi ti agbiag iti gagangay a panagbiag kalpasan iti kasta nga ipupusay? Adda kadi aniaman a namnama a makitatayto manen dagiti pimmusay nga inay-ayattayo? No kasta, sadino ken kasano? Dagitoy ken dadduma pay a mainaig a salsaludsod ti mausigto kadagiti sumaganad nga artikulo.

[Picture Credit Line iti panid 3]

The Daily Herald, Provo, Utah