Parikut dagiti Napasnek a Katoliko

Idi 1984 nangipatulod ti Vaticano iti maysa a bilin a nangkondenar iti “liberation theology,” ket ni Leonardo Boff, maysa kadagiti “kontrobersial unay” a teologo a Katoliko, ti nasentensiaan iti makatawen a “penitensia a panagulimek”​—maysa a dusa nga impaay ti iglesia isu a mangiparit ti panangipablaakna wenno panagsaludsodna wenno panangipaulogna iti aniaman a pamay-an ti suspetsana a teolohia.

Ngem idi 1986, makabulan sakbay nga agpatingga ti ‘makatawen a panagulimek,’ naikkan ni Boff ti amnestia. Ti Instrucción Sobre Libertad Cristiana y Liberación (Instruction on Christian Freedom and Liberation) naipaulog, a kunkunana a “naan-anay nga umiso a dagidiay nga agsagaba iti pannakailupitlupit manipud kadagiti agik-ikut iti kinabaknang wenno napolitikaan a pannakabalin ket agtignayda a buyogen iti maawat iti moral a pamay-an . . . ” “Ti naarmasan a pannakidangadang” ket naanamongan kas “maudi a pamay-an.” Ti kadi iglesia korkorehirenna ti bagina met laeng?

Saan sigun iti autor iti baro nga instruksion, ni Joseph Cardinal Ratzinger, pangulo iti Vatican’s Sacred Congregation for the Doctrine of the Faith. “Ti immuna nga instruksion dina pukawen ti pategna,” kinunana. “Ti maikadua a dokumento ket katuloyan.” Ngem dagiti dadduma, kas ti pagiwarnak, dipinarenda ti maikadua nga instruksion a kas maysa a “baro a takder iti ‘liberation theology.’” Apay nga adda ti panagsuppadi?

Ti naannad a pannakaisao ti baro nga instruksion ti mabalin nga ipatarus iti nadumaduma a pamay-an. Kas pangarigan, kunaenna a “dayta ket saan a maipaay kadagiti papastor iti iglesia tapno makinaminda a direkta iti napolitikaan a pannakabuangay ken pannakaorganisar ti sosial a biag.” Kas ti napaliiw a naimbag ti magasin a Newsweek: “Dayta a kita ti pagsasao ti mangipaay iti adu a lugar tapno dagiti nasikap a papadi . . . mabalinda a tenglen dayta.”

Kuna ti maysa a report a ‘ngangngani tunggal maysa iti iglesia ti mabalin a makasarak iti banag nga anamonganna.’ Ti manganamong iti wayawaya kas ken ni Gutiérrez mabalinnan a kunaen a ti “liberation theology ket maysa a pagilasinan ti tiempo idiay Latin America, ket ti iglesia bigbigenna dayta a kasta,” nupay ti maysa a konserbatibo a Katoliko mabalin nga agragsak a ti iglesiana ti kaskasdi a “sibibileg a mangbusor iti panangtengngel dagiti Marxist iti pannakailibak iti wayawaya ti tao.” Nupay kasta, dagiti nadumaduma a kapanunotan maipapan iti liberation theology suppiatenna ti tradision iti iglesia ket itultuloyna a pagbibinnusoren dagiti Romano Katoliko.

Nupay kasta, binalakadan ni apostol Pablo dagiti pudno a Kristiano: “Sawenyo amin koma ti maymaysa a banag, ket awan koma dagiti panaglalasin kadakayo, . . . agtitimpuyogkayo . . . iti pammati ken aramid.” “Agmaymaysa koma ti pammatiyo . . . adda agmaymaysa a panggep ken agmaymaysa a nakem.” (1 Corinto 1:10; Filipos 2:2)a Ania ti patpatienyo? Dagiti kadi Romano Katoliko ‘agkaykaysada iti pammatida’?

[Dagiti Footnote]

[Dagiti ladawan iti panid 7]

Ti kadi iglesia ‘agkaykaysa iti pammatina’?

[Credit Line]

Ladawan ti NU