Ti Pagsidsiddaawan nga “Snowflakes”

Nagsiddaawkayon aya kadagiti minilion a napino, kasla dutdot a flakes nga agtinnag bayat ti panagtudo iti niebe? Gagangay a dagitoy ti tumtumpaw iti angin iti maysa nga oras wenno ad-adu pay, tunggal snowflakes ket obra maestra ti pannakabukelna. Nakaskasdaaw, awan ti dua nga agpada, ket addada umdas a kumbinasion iti pannakabukel nga awanto a pulos ti kasta a masarakan. Kaskasdi, aminda ket addaan iti innem a sikigan!

Apay nga amin dagiti snowflakes addaanda iti innem a sikigan wenno takkiag? “Adu a tattao ti mangipagarup nga adda mekanikal a katupag iti maysa nga agtugtugaw iti tengnga iti snowflakes a mangibaga amin kadakuada a kasta ti aramidenda,” kuna ni Dr. James S. Langer iti Institute for Theoretical Physics idiay Santa Barbara, California.

Pudno unay, no ad-adu a sientista ti mangadal iti snowflakes, ad-adda ti panangapresiarda, kas ipadamag ti “The New York Times” nga Enero 6, 1987: “Dagiti snowflakes tungpalenda dagiti matematikal a linlinteg a nakaskasdaaw ti kinarikutna.” Saankay kadi nga umanamong a dagiti snowflakes ket maysa a pakaidayawan iti kinasirib iti Nangaramid kadakuada? “Ta kunana iti niebe, ‘Agtinnagka iti daga.’”​—Job 37:6.

[Picture Credit Line iti panid 31]

Dagiti snowflakes, Bentley ken Humphreys