Naarimbangaw a Niebe

NATAKUATAN dagiti sientista a no agtinnag ti niebe iti danum, aguni ti tunggal niebe ngem di mangngeg ti tattao. Kas iti wengweng ti sumungsungad a trak ti bombero, pumigsa daytoy nga uni agingga a madanon ti kapigsaan ket kalpasanna in-inut nga agsardeng, iti agarup maysa ket kakasangapulo a ribu ti maysa a segundo.

Sumalput iti rabaw ti danum ti maysa a tedted ti tudo wenno uraro, ngem tumpaw ti nalaglag-an a niebe. Ngem marunaw inton agangay isu nga adda mangngegan a “panagriaw,” a nadakamat iti ngato. Nadlawen daytoy agarup 15 a tawen ti napalabas, ngem awan ti naginteres. Nupay kasta, kadagiti kallabes a tawen, ti arimbangaw ket makapasuronen kadagiti biologo idiay Alaska nga agus-usar iti sonar tapno matuntonda ti iyaakar dagiti salmon. No napigpigsa ti uni ti panagtinnag ti niebe ngem iti uni a patauden dagiti ikan, masapul a maisardeng ti panangtunton. Ania ti makagapu iti daytoy a nakaskasdaaw a pasamak?

Ilawlawag ti magasin a New Scientist a bayat a tumpaw ti niebe iti danum, bassit ti uni iti baba. Ngem apaman a marunawen ti niebe, masusop ti danum babaen ti capillary attraction. Nalabit nga iti daytoy a kanito, adda dagiti labutab ti angin nga aggapu wenno di makaruar iti niebe gapu iti iyaadalem ti danum. Agdayyeg ti tunggal labutab ket ikagumaanna ti makibagay iti aglawlawna. Iti panangaramidna iti dayta, adda dagiti pataudenna a sound wave, a medio kaasping ti uni ti kampana​—ngem nasingsinggit nga amang.

[Picture Credit Line iti panid 31]

Snow Crystals/Dover