Malagipyo Kadi?

Naragsakankay kadi a nangbasa kadagiti kallabes a ruar ti Pagwanawanan? Bueno, kitaenyo no masungbatanyo dagiti sumaganad a saludsod:

• Apay a rumbeng a mausig uray ita dagiti napataud a saludsod iti Job kapitulo 38?

Adu kadagiti nakaskasdaaw nga aramid ti Dios ti saan a naan-anay a maawatan uray dagiti moderno a sientista. Karaman kadagitoy no kasano a ti grabidad pagtalinaedenna ti daga iti pagrikusanna, ania a talaga ti lawag, apay nga awan patinggana ti kita dagiti arbis ti niebe, no kasano a maporma ti tudo, ken no kasano a nainaig ti enerhia iti nagurruod a bagyo.​—4/15, panid 4-11.

• Ania dagiti ulidan iti Biblia a makatulong kadatayo a mangparmek kadagiti negatibo a rikna?

Adda dagiti tiempo a naupay wenno negatibo ti rikna da Asaf, Baruc, ken Noemi, ket matulongannatayo dagiti Nainkasuratan a rekord maipapan iti naballigi a panangdaerda kadagiti kasta a kasasaad.​—4/15, panid 22-4.

• Ania dagiti sumagmamano a praktikal a pamay-an a matulongan dagiti Kristiano a balo?

Siaayat ken madadaan a makatulong dagiti gagayyem. Dagiti kapamilia wenno sabsabali mabalin a kabaelanda ti mangipaay iti pinansial wenno material a tulong, no talaga a kasapulan. Makatulong met dagiti pada a Kristiano babaen ti naayat a pannaranayda kas gagayyem, a mangipaayda iti naespirituan a suporta ken liwliwa.​—5/1, panid 5-7.

• Apay a napateg ti pannakiasawa ‘a mayalubog iti apo,’ kas ibalakad ti 1 Corinto 7:39?

Masansan a napaneknekan a makadidigra ti pannakiasawa kadagiti di kapammatian. Maysa pay, ti panangsurot iti daytoy nadiosan a balakad ket kaipapananna ti kinasungdo ken Jehova a Dios. No agtungpaltayo iti Sao ti Dios, dinatay kondenaren ti pusotayo. (1 Juan 3:21, 22)​—5/15, panid 20-1.

• Yantangay ni Jehova ti makapakawan kadagiti basoltayo, apay nga ipudno dagiti Kristiano ti nadagsen a basolda kadagiti panglakayen iti kongregasion?

Wen, ti pammakawan ni Jehova kadagiti nadagsen a basol ti nasken a sapulen ti maysa a Kristiano. (2 Samuel 12:13) Ngem no kasano a tinulongan ni propeta Natan ni David, dagiti nataengan a papanglakayen iti kongregasion matulonganda dagiti agbabbabawi a nagbasol. Ti panagpudno kadagiti panglakayen ket maitunos iti bilin a mabasa iti Santiago 5:14, 15.​—6/1, panid 31.

• Ania ti pammaneknek a rumbeng a taripatuentayo dagiti ulila ken balo nga agkasapulan?

Ti rekord ti historia ipakitana a ti kasta a panangasikaso ket paset ti pudno a panagdayaw nga ar-aramiden idi dagiti nagkauna a Hebreo ken dagiti immuna a Kristiano. (Exodo 22:22, 23; Galacia 2:9, 10; Santiago 1:27) Inraman ni apostol Pablo iti Kasuratan dagiti nalawag nga instruksion kadagiti Kristiano nga aywananda dagiti agkasapulan a balo. (1 Timoteo 5:3-16)​—6/15, panid 9-11.

• Ania ti tulbek iti naragsak, addaan panggep a biag?

Masapul a patanoren ken taginayonentayo ti umiso a relasion ken Jehova, ti nailangitan nga Amatayo. Iti panangaramidtayo iti dayta, dakkel ti maitulong ti panagadal iti Biblia.​—7/1, panid 4-5.

• Addaan kadi ti tunggal tao iti imortal nga espiritu nga agtultuloy nga agbiag kalpasan ti ipapatay?

Nupay patien ti dadduma nga imortal ti espiritu​—saan a ti kararua​—saan nga isursuro ti Biblia ti kasta nga ideya. Ipakitana a no matay ti tao, agsubli iti tapok ken agpukaw. Ngem kabaelan latta ti Dios nga isubli ti biagna, isu nga aniaman a namnama para iti masanguanan a biag, babaen ti panagungar, ket agpannuray iti Dios. (Eclesiastes 12:7)​—7/15, panid 3-6.

• Sadino ti ayan ni Daniel idi nasuot dagiti tallo a Hebreo iti tanap ti Dura?

Saan nga ibaga ti Biblia. Mabalin a saan a naobligar ni Daniel nga agparang sadiay gapu iti saadna, wenno mabalin nga adda nakaibaonanna. Ngem makapagtalektayo a saanna nga inkompromiso ti kinamatalekna ken Jehova.​—8/1, panid 31.