Manipud Managbasatayo
Ti Lubong Nanipud 1914
Masapul a komendarak iti kasta unay dagiti artikuloyo a “Ti Lubong Nanipud 1914.” (Marso 8 agingga iti Hunio 22, 1987 nga Awake!) Daytoy ti nangipaawat kaniak no apay a dagiti nasnasion pawpawadanda, patpatayenda, idaddadanesda, ken mangiyegda iti rigat kadagiti bagbagida met laeng. Ti pudno nga utek iti pabuya—ni Satanas a Diablo.
O. P. I., Nigeria
Binasbasak a buyogen iti kasta unay a panaginteres ti serie dagiti artikuloyo maipapan iti lubong nanipud 1914. Iti damdamo unay iti biagko, naikkanak iti panangsirmata iti historia iti kaputotantayo iti sumagmamano laeng a ruar.
E. E., Côte d’Ivoire
Nasinasina ti Sangakabbalayan ni Luther?
Nasdaawak! (“Apay a Nasinasina ti Sangakabbalayan ni Luther?” Setiembre 8, 1987) Nasingedak kadagiti kakabagiak nga adda pay laeng idiay Alemania. Agtawenakon iti 40 ken maysa a Luterano. Ti lolok maysa a ministro a Luterano ket agpada dagiti kakabsatko a babbai naasawaanda kadagiti ministro a Luterano. Ti mangpasiddaaw kaniak maipapan iti artikuloyo ket dikay dayawen ti pammatik ken ti pammati dagiti ammak. Anian nga awan asiyo! Kaaduan a parparikut a dinakamatyo ket parparikut iti ngangngani aniaman a kongregasion iti rabaw ti daga. Addaanak kadagiti adu a teolohikal a pannakisarita iti bayawko, dagiti mannursuro iti klase iti Biblia—Luteranoda amin. Awan met ti nasabsabetko a siasinoman a nakapuy wenno aglalaok wenno aniaman a dadduma pay a manglais a pangdeskribir a piniliyo nga usaren.
R. D. B., United States
Naibaga iti pangrugian iti serie a ti kasasaad a nadeskribir, nupay no tamingenna ti Iglesia Luterano iti Alemania, ket mangirepresentar iti pudno a kasasaad iti Protestantismo iti kaaduan iti lubong. Ti deskripsion a Protestante a teolohia a kas “aglalaok” ken “daytoy agraman dayta” ket naadaw manipud iti makinruar a gubuayan ket kaaduanna bigbigen dagiti adu a Protestante a pannakangiwat iti Europa. Ti panggepmi iti panangipablaak iti material ket maysa a napasnek a panangikagumaan a tumulong kadagiti managbasa iti amin a pammati a mangusig iti pammatida iti lawag ti kinapudno iti Biblia. Kinuna ni Jesus: “Maammuanyonto ti kinapudno, ket ti kinapudno luk-atannakayto.” (Juan 8:32) Uray pay ti nalatak nga Aleman a klero a Luterano a ni Dietrich Bonhoeffer impaganetgetna iti sermonna: “Iti relihion maymaysa laeng ti nasken ti kinapategna, a dayta ti pudno.” “Dayta [ti iglesia] masapul nga ikagumaanna ti kinadalus ti sursuro.” ‘Iti Aldaw ti Panangukom, pudno nga imtuodento ti Dios: “Immimdengka kadi iti Saok ket sinalimetmetam dayta?”’—ED.
Pagyaman iti kasta unay kadagiti artikuloyo nga “Apay a Nasinasina ti Sangakabbalayan ni Luther?” Daytoy ti nangiyebkas kadagiti rikriknak a mismo. Laglagipenyo a ni tatangko ket maysa a ministro a Luterano agingga a nagpension dua a tawenen ti napalabas, ni nanangko ket mannursuro iti relihiuso nga edukasion, ket agingga a 18 ti edadko nalikmutak kadagiti ar-aramid ti maysa a pagtaengan a Luterano. Ngem uray pay idi agtawenak laeng iti 11 wenno 12, dagiti di nasungsungbatan a salsaludsod, kinamanaginsisingpet, ken ti espiritu iti kinaawan ti namnama ti namagbalin kaniak a makarikna iti nakaskasdaaw a kinakawaw. Kalpasan ti makabannog a panagsapsapul iti kinapudno, kamaudiananna nasarakak ti tinartarigagayak idi ubingak pay laeng, dagiti tattao a pudno a mangayat iti Dios ken mangtungpal kadagiti linlintegna, dagiti Saksi ni Jehova.
D. B., Pederal a Republika iti Alemania