Manipud Managbasatayo
Panagliday
Binasak a buyogen ti panaginteres dagiti artikuloyo maipapan iti “Panagliday—Agballigikayo iti Pannakidangadang!” (Oktubre 22, 1987) Ti panangiparangyo iti material ket umiso unay ket umiso dagiti panagadaw ken makatulong. Nupay kasta, nupay nakasaysayaat ti panangdeskribiryo kadagiti sintomas ken rikrikna a napadpadasan ti malidliday a tao, mariknak a ti panangipaganetget ti material ket isu ti “panangiduron iti bagim met laeng.” Dagita a tattao ti basta saanda a “maiduron ti bagida met laeng” kasano man ti panangikagumaanda. . . . Ti singasing a ti maysa ti masapul a “makidangadang” iti panagliday agserbi laeng a mangpakaro kadagiti saan a kasapulan a mapasamak a rikrikna iti pannakabasol ken ti kinaawan ti mamaayna. . . . Ti naibagan nga immuna ket saan koma nga awaten a kas direkta a pangbabalaw, imbes ketdi adda dagiti punto a patiek a kasapulanna ti panangipaganetget, iti panangikagumaantayo a mangpataud iti pannakaawat ken ti umiso a panangaywan iti malidliday ken dagiti pampamiliada. Ti magasinyo adut’ pagsayaatanna iti panangiparangna kadagiti tema iti pamay-an a makatulong kadagiti adu a manggun-od iti nasaysayaat a pannakaawat iti tema maipapan iti panagliday.
D. L., Depressives Associated, England
Pudno a dikam itantandudo ti “panangiduron iti bagim met laeng” a kita iti panangagas. Dagiti artikulomi ipakitada nga addada dagiti nadumaduma a kinakaro iti panagliday ken nadumaduma a makagapu. Saan nga amin a panagliday ket patauden iti panagpampanunot ti maysa, ket kadagiti nakaro a kaso kasapulan ti propesional a tulong. Nupay kasta, nalawag nga ipakita dagiti panagsirarak a ti panagbalbaliw ti panagpampanunot ti maysa ket masansan a nasken tapno mapagballigian a naan-anay ti panagliday. Nupay no pudno a ti malidliday a tao ket kasapulanna ti tulong iti panangbalbaliw iti panagpampanunotna, iti dadduma a tukad iti panagliday ti maysa a tao adu ti maaramidanna a manglapped iti kasta unay nga ikakaro ti kasasaadna babaen ti panangaramid kadagiti panagbalbaliw a nadakamaten. Pinulpullo a tattao, a nakiumanan ti “Agriingkayo!” bayat ti panangurnongna kadagiti impormasion iti artikulo, ti nangdakamat a ti napaut a pannakabang-ar nagtaud iti panangbalbaliwda iti panagpampanunotda. Dagiti artikulo ti basta nangpaalerto kadagiti managbasa iti kita ti panagpampanunot a mabalin a mangpataud iti parikut wenno mabalin a mangparmek iti dayta.—ED.
Dagiti artikuloyo maipapan iti panagliday dimtengda iti apag-isu a tiempo. Makapatalna iti isipko ti pannakabasak iti dadduma kadagiti sasaona. Iti adun a tawtawen nakidangadangakon iti kinamanagbabain, ket no dadduma ti tukad ti panagraemko iti bagik mapukawko nga interamente. Adu kadagiti material a naiparang ti nangiyebkas kadagiti rikriknak a naan-anay. Mabigbigko a kadagiti dadduma a pamay-an masapul a balbaliwak ti pamay-an ti panagpampanunotko.
S. G., Federal Republic of Germany
Agyamanak unay kadakayo gapu kadagiti artikuloyo maipapan iti panagliday. Nagsagabaak iti nakaro a panaliday manipud pay kinaubing a nagtultuloy, a kankanayon ti pannakidangadangko kadagiti makadadael a panagpampanunot. Idi laeng addaakon kadagiti tawtawen a 30’s a nasursurok babaen iti panangsubok iti allergy a babaen iti panangtimbeng iti taraonko mabang-aranak iti dakkel unay iti parikut. Ngem dagiti artikuloyo ti nangipabigbig kaniak iti dakkel unay no aniada dagiti makapaliday a panagpampanunot nga adda pay laeng, isu a mangikkat iti rag-ok ken, ti napatpateg pay, mamagbalin kaniak a mangipasa kadagiti makapaliday a padron kadagiti annakko gapu iti pamay-an ti panangtratok kadakuada. Ti artikulo a “Panangabak iti Pannakidangadang iti Panagliday” ti nangited kaniak iti namnama nga adda ti pamay-an iti panangtaming iti parikut. Makitkitakon dagiti positibo a resulta iti bagik ken kadagiti annakko babaen ti panangiyaplikarko kadagiti nagsayaatan a singasing nga imparangyo.
R. G., United States