Nakalapsutak iti Narelihiusuan a Panangal-allilaw

MALAGLAGIPKO daydi immuna a “milagro” a nakitak. Agtawenak idi ti innem ket kagudua. Siak ken ni nanangko addakam idi iti maysa a gimong a Pentecostal a naangay iti maysa a balay. Ti manangaskasaba ti agkankanta, ket isut’ addaan iti espiritu, ti ar-aramiden dagiti Pentecostal no agkankantada. Panawen ti kalam-ekna idi, ket adda ti maysa a dakkel a nagbukel a dalikan idiay tengnga ti kuarto. Isut’ nakitak a gimmaw-at idiay dalikan, nga agkankanta pay laeng ken agpukpukkaw bassit, ket isut’ nangiruar iti maysa a dakkel a beggang a daytat’ nakalablabaga gapu ti kapudotna. Inngatona dayta iti dua nga im-imana, nga aw-awiten dayta iti aglawlaw ti kuarto ken agpukpukkaw bassit kadagiti pukkaw ti panagballigi ken agkankanta met. Kabayatan amin daytoy dagiti dadduma met ti agkankanta ken agpukpukkaw ken agsalsala iti aglawlawna. Kalpasan ti gimong, tunggal maysa ti kumitkita kadagiti im-imana tapno kitaen no dayta ti nasinit. Awan pulos ti marka dagita!

Ket daytoy ti maysa laeng kadagiti pagilasinan iti daytoy nga iglesia Pentecostal idiay Kentucky a napanan ni nanangko. Mamatida iti maika-16 a kapitulo ti Marcos, mangrugi iti bersikulo 17, a sadiay sawenna ti panagsao kadagiti babbaro a pagsasao, panangagas kadagiti masakit, panagpidut iti ul-uleg, ken pananginumda ti sabidong. (Dagitoy a bersikulo ti awan kinapudnoda, kayatna a sawen, dagitoy saanda a masarakan kadagiti kadaanan a manuskrito ti Biblia.) Saan nga amin nga iglesia a Pentecostal ti mamatpati kadagitoy a bambanag. Ngem no makitayo ida a mapaspasamak, maallukoykayo a mamati, bueno, ti Dios ti adda iti iglesia a makaaramid kadagitoy a pagilasinan ket dagiti tattao saanda a masaktan.

Kalpasanna immakarkami idiay Indiana. Nabautisaranak idi agtawenak ti 12, idi 1953. Naadalko ti agtokar ti guitara ken mangakompaniar iti panagkanta ti grupo kadagiti panaggigimong. Mamatiak a daytat’ paset ti panagserserbik iti Dios​—babaen iti daytoy a panagkankanta a dagiti Pentecostal magun-odanda ti espiritu. No magun-odak ti espiritu ken agsao ti nagduduma a pagsasao, diak ammo no ania ti ibagbagak, ngem daytat’ nagsayaat a rikna.

Diak pulos nangpidpidut kadagiti uleg, ngem malagipko iti maysa a ngudo ti lawas idi bimmisitaak iti maysa a kapilia idiay Kentucky a dati a pagat-atenderak. Ti bumisbisita a predikador nagun-odanna ti espiritu ket nangiruar iti maysa a dakkel a rattlesnake manipud iti kahon ti uleg nga inkuyogna kenkuana. Imputipotna dayta iti imana ken agpukpukkaw. Addaak idiay entablado iti likudanna a kadua dagiti kumakanta, ket malaglagipko pay ti innak pannakakita iti dara nga agaruyot manipud nagbabaetan ti ramramayna. Kalpasanna ti predikador a nakitak nga agig-iggem iti apuy adu a tawenen ti napalabas nagun-odanna ti espiritu, ket isu met ti immuli ket innalana ti uleg manipud iti ima ti sabali a mangaskasaba ket sana insubli idiay kahon. Ngem daydiay lalaki a nakagat ti di pulos nagsakit. Malaglagipko pay, nupay kasta, a tallo kadagiti tattao nga ammok a nakagat dagiti uleg ket natayda. Ti katugangak a lalaki ti maysa kadakuada.

Idi agtawenak ti 19, nakiasawaak iti maysa nga agtutubo a lalaki a naipagarup a naisalakan metten. Ngem isut’ saan a maysa a napigsa a Pentecostal. Isut’ nakitak a naminsan a nangiggem kadagiti uleg, ngem isut’ awanan ti espiritu nga umasping kaniak. Isut’ nakasaysayaat a Pentecostal iti apagkanito, ngem kalpasanna isut’ agsardeng, mangrugi nga agsigarilio, agaramid kadagiti dadduma a bambanag a dikam patpatien. Daytoy banag maipapan kadagiti espiritu, nupay kasta, ket isut’ maysa a banag a mangrirriribuk kaniak. No magun-odan dagiti Pentecostal ti espiritu, dagiti espiritu ket saanda nga agpapada. Dadduma ti napigpigsa, dadduma ti saan a maibagay, ken ti sumagmamano lumabanda pay kadagiti dadduma met.

Diak pulos a maaw-awatan daytoy. Pinagpampanunotnak no apay a nakaad-adu dagiti nagduduma nga espiritu. Malaglagipko pay ti panagkarkararagko nga interamente kabayatan a maysaak a Pentecostal: “Daytoy ti kakaisuna a relihion nga ammok, Dios, nga isut’ umiso. Ngem no saanak nga agserserbi kenka iti pamay-an a makaay-ayo kenka, Dios, kayatko a maammuan dayta. No saan a daytoy ti umiso a relihion, pangngaasim ta ipakitam kaniak daydiay umiso.” Inkarkararagko dayta a kararag iti namin-adu a daras.

Kabayatan daytoy umuna a panagasawak a nakitak dagiti magasin a Pagwanawanan ken Agriingkayo! Immakarkami idiay Cincinnati idi 1962, ket immay dagiti Saksi ni Jehova iti ruanganmi. Kaay-ayo ni lakayko ti makisarsarita kadakuada, ngem diak kayat ti makisasao. Agyanak idiay kusina no umayda. Nagsuskribir ni lakayko kadagiti magasin, ngem dina pulos binasbasa ida. Ngem siak ti agbasbasa. Ammok a saanko koma a rebbeng a basaen dagita, kasla sibabasolak no agbasaak, ngem diak matngelan ti aniaman nga adda iti aglawlaw a di basaen dayta. Ipalladawko pay dagiti magasin idiay pagbasuraan ket kalpasanna mapanko alaen ida ken basaek ida!

Naammuak manipud Ti Pagwanawanan ken Agriingkayo! maipapan iti panagtultuloy nga agnanayon ti daga​—maysa a naindagaan a paraiso a mapunnonto kadagiti nalinteg a tattao. Daytat’ kadadakkelan a banag a nangngegak pay laeng. Daytat’ nangtiro a sipipigsa kaniak agsipud ta kas maysa kadagiti Pentecostal dikam patien dayta maipapan iti daga. Malaglagipko pay a nabasak maipapan iti daytoy a Paraiso a daga a daytat’ agtalinaed iti agnanayon, ket pinampanunotko, ‘Saan nga umiso daytoy!’ Ngem kaay-ayok a basbasaen ida. Maysa a pannakidangadang ti maar-aramid iti unegko. Agkarkararagak maipapan iti daytoy. Kamaudiananna, indawatko ken ni lakayko a sardengannan ti panagaw-awatna kadagiti magasin, ket insardengna nga agpayso.

Adu a babbai ti nakairamramanan ni lakayko, ket kalpasan ti pito a tawen a panagasawa, nagsinakami. Dagiti dua nga annakko a lallaki ken siak ti napan nakipagtaeng ken ni Olene, maysa a nabayagen a gayyem a nakiasawa iti ulitegko. Isut’ maysa a naglaing a kumakanta, ket agkuykuyogkami a mapmapan kadagiti panaggigimong a Pentecostal ken nagkankanta iti nagduduma a kapilia. Ni Olene ket maysa met nga anak a babai ti maysa a manangasaba nga agig-iggem iti apuy.

Namindua a “naagasanak.” Umuna idi naalisanak ken agpadpadara. Agpapan pay iti daytoy, napanak iti maysa a gimong a Pentecostal. Nakakapkapuyak a pagarupko siakto ti pumanaw. Kalpasanna nangngegko ni Olene ken ni tatangna a mangrugidan nga agkanta. Nagun-odanda ti espiritu. Iggamanda dagiti ab-abaga ti tunggal maysa. Immayda ket impatayda ti im-imada kaniak. Dagus a naawan ti puotko. Idi makapuotakon, nasayaaten ti riknak! Awanen ti panagpadara!

Ti maikadua a daras ket isu idi agsakit dagiti gugotko. Agus-usarak iti pustiso manipud pay agtawenak ti 15. Itan, sumagmamano a tawenen iti kamaudiananna, mangrugin a lumteg ti ngiwatko iti babaen ti makingngato a pustiso. Tallo a bulan nga awan ti ngipenko ket likido laeng ti pagtartaraonko. Maladingitanak ket napanak iti maysa a doktor medikal. Kinitana ti ngiwatko. “Saan a siak ti kasapulam; kasapulam ti maysa nga oral surgeon a mangopera.” Ninagananna ti sakitko, papillomatosis, ket nangirekomendar ti maysa a dentista.

Diak pulos napnapan. Siak ken ni Olene agturturongkami iti kapilia idiay Kentucky. Iti dayta a rabii agkankantaak, a maigamgamer unayen iti espiritu. Impatay ni Olene dagiti im-imana kaniak, nagsipnget ti panagkitak, ket napasagak iti datar. Idi makapuotak, siak ti nangitupra kadagiti kasla namagaan, nginatngat a karne. Idi makapagawidakon, mabalinkon nga ikabil dagiti pustisok. Diak naaddaanen ti aniaman a sakit nanipud idi.

Nagadu a panagbasbasa ti Biblia ti inar-aramid ni Olene. Di nagbayag kalpasan a nakikabbalayak kenkuana, inawagannak idiay kuarto a pagbasbasaanna. Isut’ addaan ti maysa a saludsod. Nabasana ti Eclesiastes 1:4: “Maysa a kaputotan mapan, ket umay ti sabali a kaputotan; ngem ti daga agtaeng ti agnanayon.” (King James Version) Kalpasanna kinunana: “Kayatko nga ilawlawagmo daytoy a kasuratan kaniak. Ditay patien daytoy. Gapuna aniat’ sasawen dayta?” Nariribukanak unay.

“Kayatko a maammuan,” indawatna, “apay a mariribukanka maipapan iti daytoy a kasuratan. Adda iti Biblia, ket kasapulan a maammuantayo no aniat’ kaipapananna!” Gapuna inlawlawagko: “Nabasbasak daytan iti Ti Pagwanawanan ken Agriingkayo!, ket diak kayat a maammuam a basbasaek dagidiay a magasin nga ipabpablaak dagiti Saksi ni Jehova.” Dagdagus a kayatnan a biruken dagidiay a Saksi.

“Dika pakadanagan,” kunak. “No agyantay ditoy iti mabayag, addadanto kadagiti ruangantayo. Kanayon a masarakandaka.” Dua a lawas iti kamaudiananna idi naggapuak iti trabaho, isut’ adda idiay ruangan nga agur-uray kaniak, nga umis-isem. “Pugtuam no asino dagiti adda ditoy itatta?” Awan ideak. “Dagiti Saksi ni Jehova! Nakitulagak maipaay ti panagadal ti Biblia a para kadata!” Diak pay nakatagari. Diak kayat ti makipagadal kadakuada. Mabutbutengak kadakuada.

Ngem nakipagadalkami. Inawisdakami kadagiti gimong. Di kayat ni Olene ti mapan, ngem siak ti napan. Ti anakko a lalaki a buridek ti agtawen idi ti tallo, ket napankami idiay Kingdom Hall. Idi nalpasmin a mapagadalan ti libro a Kinapudno iti panagadal ti Biblia iti pagtaengan, agpadpada a nabigbigmi ken ni Olene a ti iglesia Pentecostal ti di umiso. Nupay kasta, insardeng ni Olene ti makipagad-adal, gapuna insardengko met.

Daytat’ 1972 idi. Idi 1974 immawag ni Olene kaniak​—saankamin nga agkabkabbalay idi. Insaludsodna no kayatko ti makiasawa ken ni tatangna​—daydiay lalaki nga agig-iggem ti apuy idi agtawenak iti innem ket kagudua pay laeng. Bueno, ti panagasawak iti immuna a lakayko ti nagpatingga kalpasan ti pito a tawen, gapuna nakiasawaak iti ama ni Olene idi Enero 1975.

Isut’ aggigian idiay Kentucky, a dumna iti isu met laeng a kapilia ti Pentecostal a napnapanak kas maysa nga ubing. Idi nakiasawaak kenkuana, imbagak kenkuana a diak pulos agsublinton kadagiti Pentecostals, a no mairamanakto manen iti aniaman a relihion, daytanto ket kadagiti Saksi ni Jehova. Isut’ immanamong iti daytoy. Ngem agkabkabbalaykam pay laeng iti sumagmamano a bulan idi kayatna a siak ti mapan iti gimong dagiti Pentecostal. Napanak naminsan. Diak mapaleppas dayta. Ti kaadda dagiti demonio ti nagpigsa!

Iti daytoyen naammuak a ni Satanas, dagiti demoniona, ken dagiti ministrona ditoy daga ket agar-aramidda kadagiti pagilasinan ken datdatlag ket ti pannakidangadang dagiti Kristiano ket maibusor kadagita a nademonioan a puersa kadagiti nailangitan a disso. (Exodo 7:11, 22; 8:7, 18, 19; 2 Corinto 11:13-15; Efeso 6:11, 12) Kasta met, naammuak a dagiti namilagruan a sagsagut ti immuna a kongregasion Kristiano ket agpaay laeng iti panangipasdek iti dayta iti kinaubingna ket iti kamaudiananna, iti ipupusayen dagiti apostol, dagita a sagsagut ket aglabasda metten. Maipapan iti sagut ti panagsao ti nagduduma a pagsasao, kas pangarigan, adda a naisurat: “Ket dagiti dildila, agsardengdanto.” Ti ayat, pammati, ken inanama isuda itan dagiti kangrunaan a suporta ti nataengan nga iglesia Kristiana.​—1 Corinto 13:8-13.

Ti padpadasen nga aramiden ni lakayko isu ti panangallukoy kaniak nga agsubli kadagiti Pentecostal ken makipagkanta a kaduana ken agtokar ti guitara. Imbes ketdi, rinugiak ti agsubli manen idiay Kingdom Hall. No isut’ agawid manipud iti ngudo ti lawas a panagpalpalawag kadagiti kapilia a Pentecostal, isut’ mangiparang ti maysa a pitaka a napunno ti kuarta nga inawatna manipud kadagiti koleksion dagiti Pentecostals nga agpaay kenkuana. Isut’ agkatawa ta dagiti tattao ti mangted kenkuana kadagitoy amin a kuarta, ket isut’ awan inaramidna a banag a maikari iti dayta.

Kamaudiananna, ti inaudi nga anakko a lalaki ti napan kadagiti gimong a kaduak ket nagbalin nga aktibo a Saksi. Agalimuteng ni lakayko no agawidkami a naladaw manipud kadagiti gimong. Maysa a rabii nagawidak iti agarup alas dies, ket siak ti sinerraan ni lakayko iti balay. Siak ken ti anakko a lalaki ti nangpalabas ti rabii idiay kotse. Napasamak daytoy iti namin-adu a daras. Isut’ agaw-awit iti paltog iti kotsena, ket no makitanak nga agbasbasa wenno agad-adal, alaenna ti paltogna ket paltoganna ti sirok ti tugaw nga ayanko iti uppat wenno lima a daras. No siak ti agawit ti botbotelia ti soft drinks idiay balkon, paltoganna dagiti botelia idiay karton. Saannak met a padpadasen a patayen; siak laeng ti padpadasenna a pagungeten. Ngem nagkarkararagak ken ni Jehova ket nagtalinaedak a kalmado, ket dayta ti nangpauyong kenkuana.

Maysa nga aldaw agsagsaganaak a mapan iti paggigimongan, ket insaludsodna: “Talaga kadi a kayatmo ti agbalin a maysa kadagiti Saksi ni Jehova? Talaga kadi a kayatmo ti mapan agpasiapasiar kadagiti ruangan a mangaskasaba?” Ket kinunak, “Wen, dayta ti aramidek.” “Bueno,” kinunana, “ikkanka ti dua a lawas a rummuar iti balay.” Gapuna siak ken ti anakko rimmuarkami. Napankami iti maysa a bassit a balay a di napagtataengan iti adun a tawen. Awan danum, nagbassitan ti muebles, ken awan kuarta.

Ngem nagsayaat ti maaddaan ti wayawaya a mapan iti panaggigimong ken di agaburido maipapan iti pannakaserra manipud iti balay wenno mapalpaltogan ken makapagserbi ken ni Jehova babaen iti panangaskasaba iti balaybalay. (Aramid 20:20) No addada masarakak a Pentecostals kadagiti ruruangan, masansan a mariknak ti kaadda dagiti demonio. Kalpasanna ikunak: “Jehova, ammok a napigpigsaka ngem dagiti demonio. Ammok nga addaanka ti pannakabalin a tumulong kaniak, ket kasapulak ti tulongmo. Kasapulak ti nasantuan nga espiritum a mangparmek iti daytoy.” Ket isut’ kanayon a tumulong.

Nabautisaranak idi Setiembre 1976. Ti anakko a lalaki nabautisaran idi Hulio 1977. Ti kabsatko a babai ket maysa a dedikado a Saksi. Ni nanangko ti nakipagadal ken nangrugi met a mangaskasaba iti binalaybalay. Gapuna aduanak ti pammaregta manipud pamiliak ken adu a tulong manipud ken Jehova ken ti ilina. Ni Jehova ti nakaan-anus unay kaniak. Sapay koma ta isu met ti addaan ti mabayag a panagitured kadagiti minilmilion a dadduma pay a ‘ti kinaimbag ti Dios padpadasenna nga iturong ida iti panagbabawi.’ (Roma 2:4)​—Kas sinalaysay ni Ireta Clemons.

[Blurb iti panid 11]

Tallo a tattao nga am-ammok ti kinagkagat dagiti uleg ket natayda

[Blurb iti panid 12]

Iti daytoyen a tiempo naadalko a ni Satanas, dagiti demoniona, ken dagiti ministrona ditoy daga makapagaramidda kadagiti tanda ken datdatlag

[Ladawan iti panid 10]

Ni Ireta Clemons, a maysa a Saksi itan