“Inay-ayatko ti Dios. Inaramidna Daytoy a Kayo”

Adu ti makakitkita kadagiti kayo ken makitada ti kuarta. Daytoy dua ti tawenna makitkitana daytoy a kayo ket inay-ayatna ti Dios. Bayat nga isut’ dumakdakkel, ad-adu pay ti makitana ken ad-adda pay nga ayatenna ti Dios. Adtoy ti sumagmamano a makin-uneg nga impormasion iti puon ti kayo nga ar-arakupenna.

Napunno kadagiti “pagayusan a tubo.” Dadduma ti mangrugi manipud ramut agingga kadagiti bulong, dadduma manipud kadagiti bulong nga agturong kadagiti ramut. Dagiti agpangato addada idiay tutot ti kayo. Awitenda ti danum ken dagiti mineral iti tunggal bulong nga adda iti kayo. Dagiti agpababa ket addada laeng iti uneg iti ubbak. Agawitda ti taraon manipud kadagiti bulong nga agturong kadagiti ramut.

Ti murdong ti tunggal bassit a ramut ti addaan natangken, nabasa a murdong ket dayta ti agturong iti kaunggan iti daga, a dayta ti agpuspusipos kas maysa a panglussok iti tapon bayat nga agpababa. Iti likudan ti murdongna isu dagiti ginasgasut a muldot ti ramut a mangsagepsep ti danum ken dagiti mineral. Daytoy a danum ti agdaliasat iti ginasut a pie agingga iti kangatuan a bulong ti katatayagan a kayo.

Ti bulong ti mangipauneg iti carbon dioxide manipud iti angin ken enerhia manipud iti init, ket babaen iti danum ken kadagiti mineral manipud kadagiti ramut, daytat’ mangaramid ti taraon nga agpaay iti mula. Ti “pagayusan a tubo” ti taraon ti mangiyallatiw iti dayta iti tunggal selula iti kayo. Ti pannakabalin ti bulong a mangaramid iti daytoy ket saan a maaw-awatan. Naawagan dayta ti milagro.

Paset laeng dayta no aniat’ mapaspasamak iti puon ti kayo nga ar-arakupen ti agtutubotayo a managayat ti kayo.

Itan isut’ agtawenen iti pito. Napalawanan ti panangmatmatna a mangawat iti intero a kayo​—dagiti bulong ken dagiti ramut agraman ti puonna. Kaskasdi nga inay-ayatna pay met laeng ti Dios, kaskasdi nga Isut’ makitkitana kas ti Managaramid ti kayo, ket ngarud ad-adu ti makitkitana ngem kadagiti mamasirib ti lubong.​—Roma 1:20; 1 Corinto 3:19, 20.