Panangmatmat iti Lubong
Ipapatay gapu iti Sab-ong
Nabiit pay a nagsennaay ti India Today iti aramid dagiti mabisin iti kuarta a nobio a mangkalikagum iti nakangatngato a sab-ong manipud kadagiti mainanama a katuganganda, a deskribirenna dayta a kas “ti nasikap a kinadakes iti sosiedad nga Indian.” Dayta a komento maipapan iti daytoy nga aramid ket dimteng kas resulta iti tallo a trahedia a nabiit pay a napasamak iti agtengnga-klase a pamilia idiay Kanpur, India. Dagiti tallo nga agkakabsat a babbai ket pinatayda ti bagida met laeng babaen ti panangibitinda kadagiti bagbagida met laeng idi ti amada ket napasanguan iti nakangatngato a kalikagum a sab-ong. Dagiti mainanama a nobio dida inawat ti sab-ong nga intukon ti ama nga agingga iti Rs80,000 ($7,000 E.U.). Kas kunaen ti India Today: “Ti kamaudianan a trahedia ket dagidiay a makimbiang dida makarikna iti basol—dayta ti pakairamanan dagiti 800 million a tattao.”
Kuarta a Plastik
Kapatpataud pay laeng ti Australia iti sangapulo-doliar a kuarta a naaramid iti secret mix iti polymer fibers. Sigun iti The Times iti London, ti Australian Reserve Bank kunaenna a ti plastik a kuarta ket nalaglagda ngem ti maipadis iti dayta a papel, nangnangruna no usaren kadagiti napudot ken nadagaang a pagpagilian. Ti kangrunaan a pakaawisan iti kuarta, nupay kasta, isu dagiti bambanag a pagtalgedanna. Mainayon iti naisiguden iti dayta a watermark, ti kuarta addaan iti naisangsangayan nga OVD (optical variable device) isu a mangisiasi iti silnag iti init a mangiparang kadagiti kolor iti bullalayaw iti tunggal panagbaliw ti anggulo, isu a mangipalgak kadagiti nadumaduma a padron iti kolor. Ti panangpalsipikado iti kuarta kaipapananna ti panangiprenta ken panangtarimaan iti OVD, “ket dayta,” kunaen ti opisial ti banko, “ti nakangingngina unay gapu ta ti teknolohiana ket moderno unay.”
Dakes a Tawen Para kadagiti Banko
Dagiti pannakalugi dagiti banko idiay Estados Unidos nakagtengen iti “rekord ti napalabas a Panagbaba ti ekonomia idi 1987,” ket inanamaen dagiti opisiales “iti kasayaatana ti bassit laeng nga irarang-ayna iti daytoy a tawen,” kuna ti report idiay Daily News iti Nueva York. Sigun iti FDIC (Federal Deposit Insurance Corporation), isu a mangisigsiguro kadagiti komersial a banko iti pagilian, 184 kadakuada ti nalugi idi 1987, ket 19 a dadduma a banko ti makasapul iti tulong tapno makapagtalinaed nga agandar. Ti Chairman a ni L. William Seidman inawaganna ti tawen a “maysa kadagiti karirikutan ken saan a gagangay a tawen iti panagbanko nanipud idi nagnegosio daytoy a korporasion.”
Ad-adu a Daga—Ad-adu a de Lana
Nabiit pay, dagiti managsirarak idiay University of New England idiay Australia kunaenda a nakaaramidda iti nakaskasdaaw a nasarakan. Bayat ti panagsapulda iti pamay-an a manglapped iti nakaro a sakit ti tian a gagangayen kadagiti karnero iti Australia, nasarakanda a ti “bassit a gagangay a mapataud a pitak, a maawagan bentonite, a nailaok iti inumenda a danum” saanna laeng a pasayaaten ti panagtunaw ti animal no di ket paaduenna pay ti panagtubo iti de lana, kuna ti The Australian. Maysa kadagiti managsirarak, ni Propesor Ron Leng, kinunana a ti inaldaw a maipainum a 15 gramo iti bentonite a mailaok iti inumenda a danum ket nagbanag iti irarang-ay agingga iti agarup kakasangapulo iti 2 a gramo iti inaldaw iti iyaadu ti de lana ti karnero. Mainanama a ti panangusar iti daytoy a templa kadagiti karnero iti isuamin a nasion mangiyeg iti irarang-ay iti pannakapataud ti de lana nga aggatad iti minilion a doliar.
Gatad iti Kinaubbaw
“Ti liposuction nagbalinen a gagangay unay a porma iti cosmetic surgery a maar-aramid idiay Estados Unidos,” kuna ti The New York Times Magazine. Ania ti liposuction? Dayta ket pamayan ti panagopera a nadisenio a mangsusop iti taba iti bagi kas iti rupa, patong, luppo, tumeng, ken tian. Dagiti pasiente kaaduanna ket dagiti tattao nga agedad iti nagbaetan iti 20 ken 40 a tarigagayanda ti naginangay nga itsura nupay no iti medikal a panangmatmat saanda a nalukmeg. Ngangngani sangagasut a ribo a liposuctions ti naaramid idi 1986. Nupay no kunaen dagiti dadduma nga autoridad a “natalged ken epektibo,” dagiti tattao nga agpaopera babaen iti liposuction agpeggadda iti nakaro a pannakapabassit iti pluido ti bagi, panagbalay ti dara, ken dagiti adu nga impeksion, ti pannakasugat iti uneg ti bagi, ken ti ipapatay. Dagiti report ipakitada a 11 kadagiti ipapatay ti maigapu iti daytoy a pamay-an nanipud idi dimteng dayta idiay Estados Unidos manipud Francia innem a tawenen ti napalabas.
Nakangatngato a Panagpatayab
Maysa a walo ti tawenna nga ubing a babai ti kellaat a naipangato iti angin bayat ti panagpatayabna iti ullaw, kuna ti The New York Times. Nalawag, ti 90-kilogramo-a-test nylon a tali a nausar a tali iti ullaw ti naawid ti dua ti makinana nga eroplano a kataytayabna pay laeng manipud iti Palo Alto Airport agarup 50 kilometros iti abagatan iti San Francisco. Kuna ti piloto a ti eroplanona ket nakatayab iti agarup a 240 kilometros pay laeng idi a ti agtaytayab nga ullaw nga addaan iti kalawa ti payak a 3.7 metros ket naipulipol kadagiti paligpalig ti eroplano. Ti ubing a babai ket kellaat a naipangato iti 3 metros iti angin ket naitayab iti agarup 30 metros. Kamaudiananna pinalubosanna dayta idi ngangngani naidungpar iti maysa a kayo. Ti ubing a babai nalisianna ti nakaro a pannakadangran.
Baro a Pamay-an
Ti panangraut dagiti dudon ti gagangay a nasabet babaen ti panangipugsit iti adu a pestisidio. Ngem kas itudo dagiti dadduma, daytoy ket makadangran agpadpada iti tao ken animal ta dagiti insektisidio makagtengda agingga iti panagkakawing dagiti taraon. Gapuna apay a saan nga apiten dagiti dudon? isaludsod dagiti dadduma nga autoridad. Dagitoy nasustansiada agpadpada iti tao ken animal. Dagiti Africano sidsidaenda idan iti adun a siglo, ket dadduma a mannalon ti nangusaren kadakuada kas taraon iti manok ken baka. “Bigbigentayo dayta a kas protina nga addaan kadagiti innem a saka ket usaren dayta imbes nga abusuen ida babaen iti panangrugit iti kemikal,” kuna ni Dr. John Ledger, direktor iti Endangered Wildlife Trust idiay Sud Africa. Iti panagsuratna iti pagiwarnak nga African Wildlife, inanamaenna nga addanto “irarang-ay nga agturong iti baro a panawen iti pannakaawat maipapan iti milagro nga adda iti planeta a Daga ken dagiti amin a parparsua kenkuana, dadakkel ken babassit, nga agbibiag iti nakarasrasi a rabawna.”
Mangpaturog nga Awag
Maysa a manangipaay iti pagpipikel idiay Roodepoort, Sud Africa, ti addaan iti nadayaw nupay no mapagsusuppiatan a pamay-an iti panangpatalna kadagiti ubbing iti kuarto a pagoperaan. Bayat ti kaaddana iti kuarto, dumngeg ti ubing iti tape recording dagiti nalatak a timek dagiti pagpaturog kadagiti ubbing babaen iti maysa nga ay-ayam a telepono. No ilawlawag ti doktor iti bassit a pasiente no anianto ti mapasamak iti kuarto a pagoperaan, ibagana met nga adda ti telepono sadiay tapno mabalin ti ubing ti umimdeng kadagiti tapes. Dina ibaga, nupay kasta, a ti gas a pagpipikel ket rummuar iti auditibo ti telepono!
Dagiti ubbing maragsakanda unay iti daytoy nga ay-ayam ta alaenna laeng iti agarup maysa a minuto tapno agepekto ti gas. “Nangnangruna nga agkurri daytoy kadagiti ubbing nga agedad iti nagbaetan iti tallo ken 10 a tawen,” kuna ti manangipaay iti pagpipikel, “ket adu nga ubbing ti agtarigagay nga agsubli.”
Kabbaro a Kaputotan iti Japan
Nalatak dagiti Hapones iti sangalubongan gapu iti panagtalinaedda iti maymaysa a kompania iti intero a panagbiagda ken iti panagayatda iti trabahoda imbes a ti panaglinglingay, ti panagbiag iti komunidad, ken ti panagwaywayas. Ngem main-inoten nga agbalbaliw dagiti bambanag kadagiti kabbaro a kaputotan. “Gapu iti kinarang-ay agtrabaho dagiti dadakkelda iti kasta unay a mangpataud, kadagiti agtutubo a saan a makarikna iti kasta met laeng a pannakasapul iti kankanayon a panagtrabaho wenno panagtalinaed iti maymaysa a kompania a maipaay iti kinatalged,” kuna ti International Herald Tribune. Maysa a 23-años nga empleado ti nangilawlawag: “Ikkandakami ti kuarta dagiti dadakkelmi. Itan agtrabahokamin a maipaay kadagiti bagbagimi. Panunotenmi nga umuna dagiti bagbagimi, ket ania ti dakkel a nagdumaanna iti nagbaetanmi.” Dua a nabiit pay a surbey a naaramid kadagiti agtutubo a Hapones ti nangpatalged iti daytoy a kapanunotan. Ipadamag ti Tribune a ti “laeng 38 porsiento ti mangipangpangruna iti trabaho ngem ti pamilia” ket “55 porsiento ti mangpanunot nga umun-una iti pagimbaganda ngem iti sosiedad.”