Dagiti Obispo a Katoliko ken ti “Matmaturog a Higante”
DAGITI kadi ordinario a Katoliko masapul nga agbalinda nga ebanghelista? Wenno ti kadi panangasaba mabaybay-an kadagiti bumasbassiten a bilang dagiti papadi? Dayta ti maysa nga isyu a naipasango kadagiti obispo a Katoliko iti sangalubongan a synodda, wenno gimong, a naangay idiay Roma idi napan a tawen. No maysaka a Katoliko, kasano ti panagriknayo maipapan iti trabaho a panagebanghelio?
Agingga laeng iti sumagmamano a dekada a napalabas, adda ti negatibo a kapanunotan kadagiti laigo. Idi umuna a paset daytoy a siglo, kas pangarigan, ni Papa Pio X kinunana: “Ti Iglesia iti nakaisigudanna ket maysa a di natimbeng a sosiedad . . . a buklen dagiti dua a kategoria dagiti tattao: dagiti Papastor ken ti Arban, dagidiay nga addaan iti saad iti herarkia, ken ti bunggoy dagiti matalek. . . . Ti umariwekwek awanen ti sabali rebbengenda no di ti panangipalubos iti bagbagida a maiturong ken sumurot.”
Ti kasta a deskripsion ket saanen a maawat itatta. Maysa a moderno a teolohikal a diksionario kunaenna a “ti pasurot ket saan a maysa a manangpalabas laeng a puntiria, kas panangibilang kenkuana idi nabayagen a napalabas,“ no di ket “isu ti aktibo ken responsable a tema.”
Addada agarup 700 milion a pasurot a Katoliko iti lubong, ket deskribiren ida ti Irish a kardinal a ni O’Fiaich a kas “matmaturog a higante.” Ania ti kayatna a sawen? Sigun iti obispo, dagiti pasurot masapul nga agbiagda a maitunos iti pammatida iti ad-adda nga aktibo a pamay-an. Ti panggep iti synod isu ti panamagbalin iti pasurot a sipapanunot kadagiti rebbengenda. Ngem dagiti kadi panagbalbaliw ti pudno a dimteng iti Iglesia Katolika tapno mangriing iti daytoy “matmaturog a higante“?
Ti Paset dagiti Babbai. Adu a Katoliko namnamaenda dagiti panagbalbaliw iti paset dagiti babbai iti iglesia. Maysa a dokumento nga impablaak dagiti babbai a Katoliko ti nangirekomendar kadagiti obispo: “Dagiti mangidumduma nga artikulo iti sagrado a linteg maipapan kadagiti babbai, wenno dagiti naibatay iti maipagarup a limitasion maipapan iti ‘kasasaad’ ken ‘paset’ dagiti babbai, ti masapul a marebisar ken makorehir, agraman ti no. 1024 a mainaig iti pannakaordin.” Ti Artikulo 1024 iti sagrado a linteg kunaenna: “Ti sagrado a pannakaordin ket umiso nga awaten laeng ti nabautisaran a tao iti lalaki a sekso.”
Nupay kasta, ti Katoliko a publikasion a Rocca kinunana a ti Vaticana ‘dina kayat nga imdengan itatta ti aniaman a mabalin a mangbalbaliw iti tradisional a panangilaksid kadagiti babbai manipud iti kinapadi.’ Dayta ket maysa a “ruangan a nairikep iti imatang dagiti babbai,” kinuna ti maysa a padi.
Mammano a Papadi. Iti dayta met laeng a tiempo, ti Iglesia Katolika ket mapadpadasanna ti nakaro a krisis iti bokasion: Ti bilang dagiti papadi bumasbassiten iti sangalubongan. Ni Papa Juan II ibilangna daytoy a “ti kangrunaan a parikut iti Iglesia.” Kas pangarigan, adda “bumassit a bumassit a papadi idiay Italia,” insurat ti La Repubblica. Ket ti La Civiltá Cattolica kunaenna a ti panagpababa iti bilang dagiti papadi idiay Netherlands ket “nakadidillaw.”
“Napattapatta a kadagiti tallo gasut a ribo a lokal a komunidad a Katoliko iti intero a lubong a rumbeng nga agtitipon a sangsangkamaysa iti tunggal Domingo kadagiti ritual nga asamblea, nasurok a kagudua ti awanan kadagiti agnanaed sadiay a padi,” pinatalgedan ti maysa a pagiwarnak.
Banag a Nangnangruna a Pakaseknan. Ti isyu a nangnangruna a nakaawat iti panangasikaso ditoy a synod isu ti panagebanghelio. Sakbay iti synod, ti papa a mismo impaganetgetna a “tunggal Kristiano . . . ket nasken a maysa nga apostol.”
Kaskasdi, adu nga obispo ti agkuna a dagiti Katoliko a mismo masapul nga “agebanghelioda manen.” Sigun kadakuada, daytoy ket kasapulan gapu iti makuna a “ti karit dagiti sekta ken dagiti baro a relihiuso a grupo.” No saanda a nakasagana a naimbag, kuna ti obispo manipud Ecuador, ‘dagiti Katoliko palpalubosanda ti bagbagida a silalaka a ringbawan dagiti sekta.’
Maysa kadagiti maudi a singasing nga inanamongan ti obispo kunaenna: “Dagiti sekta rumangrang-ayda kadagiti adu a luglugar iti daga. . . . Dagiti matalek masapul a mariingda babaen iti katekismo, tapno makaipaayda iti rason a maipaay iti pammatida.” Ti synod binalakadanna dagiti Katoliko a ‘mapan ken mangaramid kadagiti adalan kadagiti amin a nasion.’ Ngem kasano a ti “matmaturog a higante” a 700 milion a Katoliko makaaramidda kadagiti adalan no dida ammo no kasano ti agebanghelio?
Nalawag ti panangipakita ti Biblia a ti trabaho dagiti pudno a Kristiano isu ti panangsapul kadagiti maikari “manipud iti balaybalay.” (Aramid 5:42; 20:20; Mateo 10:11) Ket siasinoda dagiti makipaset iti dayta? Amin a Kristiano. Maipapan iti pamay-an ti panangisaknap dagiti immuna a Kristiano iti pammatida, ti historiador a Pranses a ni Gustave Bardy kunaenna:
“Masarakan ti indibidual a panagtignay iti mismo a nagtaudan iti iglesia, ket nalabit iti kastoy a pamay-an, a bayat ti umuna a dua a siglo, . . . ti Kinakristiano naparmeknan ti kangrunaan a paset dagiti matalekna. Tunggal manamati ket nasken a maysa nga apostol. . . . Amin ket mabalin nga ipaayda ti bagbagida iti daytoy a kinaapostol, uray pay dagiti kapapanglawan, ti kaignorantean, ti malalais unay.”
Kinapudnona, dagiti amin a pudno a Kristiano ket ministroda iti Sao ti Dios. Kadakuada, awan dagiti pagdudumaan iti nagbaetan ti klero ken dagiti pasurot. Ti kasta a panagduduma dimteng kalpasan laeng ti pannakatnag manipud iti dati a Kinakristiano. (Aramid 20:29, 30) Dadduma a gubuayan kadagiti Katoliko ti mangbigbig a ti nagdudumaan ti klero-pasurot iti Iglesia Katolika “ket awan ti teolohikal a pamunganayanna.” Sigun iti managpaliiw iti Vaticana a ni Giancarlo Zizola, dagiti immuna a Kristiano “awananda kadagiti papadi, dagiti ministroda ket presbitero, kayatna a sawen, dagiti panglakayen . . . Awan dagiti herarkia kadakuada.”
Dagiti pudno a Kristiano itatta siririingda ken aktiboda iti Nakristianuan a trabahoda, a sireregtada a mangaskasaba iti “naimbag a damag“ iti Pagarian ti Dios. Mabalin, nga imbatida daytoy a magasin kadakayo.—Mateo 24:14; 25:13; 1 Corinto 15:58.