Ti Panangmatmat ti Biblia

Kasapulan Kadi ti Lubong ti “Baro a Panagebanghelio”?

Babaen ti koresponsal ti Agriingkayo! idiay Italia

NARIING manen ti relihion bayat ti napolitikaan a panagbalbaliw idiay Makindaya nga Europa. Tapno magunggonaan iti daytoy a naespirituan a gundaway, nagtitipon ti Special Assembly for Europe of the Synod of Bishops idiay Vatican manipud Nobiembre 28 agingga iti Disiembre 14, 1991. Naguummong dagiti 137 nga “Amma ti Sinodo,” a manangitandudo iti hirarkia Katolika idiay Europa, tapno irusatda ti “baro a panagebanghelio.” Nanipud idi naipakaammo ti sinodo idi Abril 22, 1990, idiay Velehrad, Czechoslovakia, naiwaragawag dayta kas maysa a historikal a pasamak. Nupay kasta, saan a kaskari a panunoten a naballigi ti sinodo, gapu ta ti RAI, ti sangapagilian a network ti telebision idiay Italia, inwaragawagna idi Disiembre 14, 1991: “Nalpasen ti sinodo dagiti pannakapaay.” Apay a maysa a pannakapaay ti sinodo? Ken ti kadi Europa, wenno ti lubong, kasapulanna ti “baro a panagebanghelio”?

“Baro” iti Ania a Pamay-an?

Pagarupen ti hirarkia Katolika a kasapulan ti baro a panagebanghelio gapu iti baro a narelihiusuan a kasasaad. Iti pananglukatna iti taripnong, ginupgop ni kardinal Camillo Ruini ti panangmatmatna iti kasasaad idiay Europa. Kinunana nga idiay Daya “riniwriw ti saan pay a nabautisaran ken saan a mangikabkabilangan kadagiti pamunganayan a kinapudno ti Nakristianuan a pammati.” Gapu itoy “ti pannakarpuog ti Komunismo a turay ipaayanna ti Iglesia iti dakkel a gundaway maipaay iti panagebanghelio.” Iti sabali a bangir, ti pasamak idiay Makinlaud nga Europa ket minarkaan ti inawaganna a “praktikal nga ateismo.” Saanen a maawat ti sao ti Iglesia Katolika kas kinapudno a nagtaud iti Dios.

Ti pannakariing manen a mismo ti relihion mangipasango ti sabali pay a karit kadagiti obispo. Kasano? Madanagan dagiti obispo idiay Europa ken Latin-America iti panagsaknap ti sabali pay a narelihiusuan a ganwat. Apay? Gapu ta napukaw ti iglesia ti adu a natatan-ok a saadna idi, ket ita daytat’ “rirriribuken dagiti napeggad a kasalisal.” Ti pagiwarnak ti Jesuita a La Civiltà Cattolica tinukoyna dagiti Saksi ni Jehova kas maysa kadagita a kasalisal gapu iti “nakakadkadlaw a kaadu dagiti Katoliko ken Protestante a mapasurotda.”

Dagiti sasao ti pangserra a “Deklarasion” ti sinodo kunaenna a ti baro a panagebanghelio tignayenna ti “panangtakuat manen kadagiti Nakristianuan a ramut ti maysa.” Apay a kasapulan dagiti Europeo a takuaten manen dagiti “Nakristianuan a ramut[da]”? Kinuna dagiti obispo a maibilbilangen dagiti Nakristianuan a prinsipio nga awan pategna. “Kadagiti adu a nabautisaran nga Europeo,” kinuna ti La Civiltà Cattolica, ti relihion “ket inuubingan, maysa a nasayaat a sarsarita para kadagiti ubbing nga iyaleng-aleng la ketdi dagiti nataengan, a kaslat’ tay maysa a banag a mangapektar iti biagda. . . . Matmatan dagiti dadduma nga Europeo ti Kristiano a relihion kas maysa laeng a kaugalian, a naikeddeng nga aglabas bayat a rumang-ay ti sibilisasion . . . Ibilang dagiti dadduma pay nga Europeo a makadangran ti Kristiano a relihion.”

Gapuna patien dagiti obispo a kasapulan ti maysa a “baro a panagebanghelio.”

Apay a Pannakapaay

Tapno agballigi ti “baro a panagebanghelio” idiay Europa, kasapulan ti adu nga ebanghelisador. Ngem, maysa kadagiti kadakkelan a parikut ti iglesia idiay Europa isut’ kinakurang dagiti papadi. Kinuna ti maysa nga obispo nga iti napalabas a 13 a tawen, sigun kadagiti nabiit pay a pattapatta idiay Europa, bimmassit ti bilang ti klero iti 9 porsiento.

Adut’ mangibilang iti sinodo a maysa a pannakapaay gapu ta mammano laeng dagiti makatulong a singasing no kasano nga iwayat ti “panangpasurot manen iti Kinakristiano” idiay Europa. Indawat ti obispo a Pranses a ni Joseph Duval iti panagtataripnong ti sinodo: “Nasken a liklikantayo dagiti narigat a maawatan a bitla maipapan iti panagebanghelio . . . Adu unay ti isawsawangtayo a kas kadagiti abogado. Sapay koma ta pagbalinentayo a simple ken nabagas ti mensahetayo.”

Sumagmamano laeng nga obispo ti nangdakamat kadagiti pamay-an dagiti apostol iti panangpasurot kadagiti tattao. Kas pangarigan, ni Obispo František Tondra iti Spiš, Pederal a Republika dagiti Czech ken Slovak, kunana: “Para iti baro a panagebanghelio idiay Europa, nasken nga agsublitay iti kaunaan a pamay-an ti panagebanghelio. . . . Dagiti immuna a Kristiano, apaman a nabautisaranda, imbilangda a pagrebbenganda nga isaknap ti Naimbag a Damag.”

Panagebanghelio—Ti Pamay-an ti Biblia

Ebanghelisador kadi amin dagiti Kristiano idi umuna a siglo? Wen! Ti libro nga Evangelism in the Early Church, ni Michael Green, Oxford, Inglatera, kunaenna: “Maysa kadagiti kapapatakan a paset ti panagebanghelio idi un-unana isu dagiti tattao a nakiraman iti dayta. . . . Ti panagebanghelio isut’ kalintegan ken pagrebbengan ti tunggal kameng ti Iglesia. . . . Ti Kinakristiano ket al-alagaden kaaduanna dagiti gagangay a tattao, nga insaknap dagiti nanumo a misionero.”

Ti sao nga “ebanghelisador” kaipapanannat’ “manangaskasaba ti naimbag a damag,” ket ti kinuna ni Kristo Jesus maipanggep iti panagebangelio agpaay kadagiti amin a pasurotna: “Daytoy naimbag a damag [ebanghelio] ti pagarian maiwaragawagto iti intero a lubong kas pammaneknek kadagiti nasion. Ket kalpasanna umayton ti panungpalan.” (Mateo 24:14, The New Jerusalem Bible) Ngarud, ti kasasaknapan pay laeng a panagebanghelio a trabaho masapul a maibanag iti “panawen ti panungpalan.”—Daniel 12:4.

Idi napan a tawen, nangbusbos dagiti nasurok nga uppat a milion a Saksi ni Jehova iti agarup maysa a bilion nga oras iti panagebanghelio a trabaho iti 211 a dagdaga, agraman idiay Makindaya nga Europa. Ania a naimbag a damag ti ikaskasabada? Ti naimbag a damag ti Pagarian ti Dios ken ti pannakaisalakan babaen ti panamati ken Jesu-Kristo. (2 Timoteo 1:9, 10) Daytoy a mensahe ti kasapulan ti lubong ita—sakbay nga umay ti panungpalan.—Mateo 24:3, 14.

[Picture Credit Line iti panid 26]

Jesus Preaching at the Sea of Galilee, ni Gustave Doré