Manipud Managbasatayo
Sakit ti Nakem
Ti 16-tawenna nga anak a babai ti maysa a babai a katrabahuak ket naupay kalpasan ti panagsinada iti nobiona a 1 1/2 a tawenen. Isut’ madi a makisarita kadagiti gagayyemna a babbai, ket di pay nakapan ageskuela iti uneg ti dua a lawas. Impanko ti Enero 22, 1988, nga Agriingkayo! iti inana, nga intudok ti artikulo a “Kasano a Mapagballigiak ti Sakit ti Nakem?” Iti sumaganad nga aldaw isut’ maragsakan a mangipadamag a dagdagus kalpasan ti panangbasana iti dayta, ti anakna a babai nangikabilen iti make-up, immawag kadagiti dua a gagayyemna a babbai ket inawisna ida nga umay bumisita. Isuda a tallo ti nagtugaw iti aglawlaw ti lamisaan iti kusina ket pinagsasaritaanda ti artikulo. Iti sumaganad nga aldaw isut’ napanen nageskuela.
C. C., Estados Unidos
Tarigagayak ti mangkomendar kadakayo maipapan iti maikari unay ti pannakaidayaw nga artikulo. Pinampanunotko ti “naimbag a paset” iti panagsina, ta mabalinko nga usigen ti kasasaad ken makita a dayta ti pudno a kasayaatan para kadakami a dua, ket nasursurok ti makibagay tapno saanto a mapasamak manen.
S. B., Brazil
Kasapulan ti Kasta Unay a Panagannad?
Kalpasan ti panangbasak ti artikulo a “Ginggined—No Kasano a Makapagsaganakayo a Maipaay iti Pannakalasat!” (Disiembre 22, 1987), kayatko nga itudo ti biddut iti balakad a naitukon. Imbalakadyo ti panangiddep agpadpada ti gas ken ti koriente iti gubuayanda a dagdagus no mabalin no ti gas ti agtedted manipud iti bettak a tubo. Ngem kas maysa a gas fitter, kayatko nga ipakaammo kadakayo nga, iti sidong dagita a kasasaad, ti panangsindi wenno panangiddep mabalin a pataudenna ti panagrissik a mabalin a mangpataud iti peggad iti panagbettak.
T. C., Inglatera
Tinagiragsakko ti “Sukayenyo ti Natalged nga Ug-ugali iti Panagmaneho” (Enero 8, 1988), nga inlistak dagiti bambanag a masapul a sukimaten sakbay ti tunggal panagbiahe iti auto. Nupay kasta, nalabsanyo ti maysa a nagpateg a banag. O, no koma no naibaga laeng kaniak a sukimatek ti brake fluid sakbay ti panagmanehok, saanak koma a nagsagaba iti panagpalya dagiti brakesko bayat ti panawen ti panagap-apura idiay tool gate. Maysa a mabigbigbig a mekaniko ti naan-anay a nangsukimat iti kotsek sakbay ti panagbiahe. Nasarakak a kaaduan a mekaniko dida aramiden daytoy nagpateg a panangsukimat, kas mapaneknekan iti artikuloyo.
M. L, Estados Unidos
Inapresiarko ti artikulo ti Agriingkayo! (Mayo 22, 1988) maipapan iti kinatalged. Ti maysa pay a banag—no adda ti pagilasinan iti danum a dikay mabasa wenno naisurat iti pagsasao a dikay ammo, dikay aglanglangoy iti dayta a lugar! Mabalin a dayta ket maysa a pagilasinan a pakdaar. Maysa nga ubing ti nalmes ditoy gapu ta dagiti nagannak dida mabasa ti Ingles a pagilasinan (a mamakpakdaar iti napegges nga agos iti uneg), gapuna pinalubosanda nga aglangoy ti anakda.
C. S., Estados Unidos
Apresiarenmi dagitoy a kanayonan a pakdaar ti panagannad manipud kadagiti managbasami.—ED.
Pakalaglagipan iti Gubat
Ti panangpaadda manen ti naisurat maipapan iti Evesham War Memorial (Abril 8, 1988, panid 4) ket nangipaay iti nangnangruna nga interes kaniak. Idi 1936 nangala ni tatangko ti ladawanko ken ni nanangko, a pinilina nga inggagara dayta a nagsaadan ti ladawan tapno palawagannak maipapan iti kinaubbaw ti gubat. Sumagmamano laeng a tawen kalpasanna, naammuak a mismo ti nakabutbuteng, makaupay ken makapasakit ti nakem a kasasaad ti maikadua a gubat sangalubongan kas maysa nga agtutubo a soldado, namindua a nasugatan ken ngangngani natayen. Ti publikasionyo ket makatulong a mangisubli iti kinatimbeng, a mangipakita kadagiti tattao ti umiso a pamusposan nga aramiden, no situtulok koma nga aramidenda dayta. Gapu iti dayta, agyamanak unay.
J. C., Inglatera