Panangmatmat iti Lubong
Nasakbay a Pananglapped iti Armagedon?
Ti maysa a katulagan iti nagbaetan ti Union Soviet ken ti Estados Unidos a mangpukaw iti kalalainganna- ken ti ababa ti danonenna nga adda ditoy daga a misil ti nagepekto idi Hunio idi a ni Premier Mikhail Gorbachev ken ti Presidente Ronald Reagan nagsabetda idiay Moscow ket nagsinnukatda kadagiti instrumento iti panagbalbaliw. Sigun iti katulagan, ti Union Soviet dadaelennanto ti 1,752 kadagiti misil, ket ti Estados Unidos ti 859. Iti damdamo unay, dagiti reporter iti Laud napalubosanda a bumisita iti maysa a base ti rocket a Soviet tapno saksianda no kasano ti pannakarakrak dagiti misil. Bayat ti panangipakita ni Yevgeny A. Kozlov kadagiti reporter ti aglawlaw ti base, isut’ napagsaludsodan no kasano ti panagriknana maipapan iti panangdadael kadagiti armas. “Pulos a dikam tarigagayan ti Armagedon,” kinuna ni Koronel Kozlov. “Pulos a dikam tinarigagayan ti gubat.”
Nasayaat a Puonan?
Adu a nagannak idiay Japan ti natibker ti panamatida a ti nangato nga edukasion ti mangipanamnamanto iti nasaysayaat a saad, nangatngato a sapul, ken ti natantan-ok nga estilo ti panagbiag para kadagiti annakda. Dadduma ti umutang pay, a mangbusbos iti nasurok a 60 milion a yen ($480,000, E.U.) tapno ikabil ti maysa nga ubing iti kasayaatan a pribado nga eskuelaan ken unibersidad. An-anienda kadi ti inanamaenda a gunggona? “Iti kinapudnona . . . saanen a pudno ti panamatida,” kuna ti Mainichi Daily News. “Awan ti umdas a mabigbigbig a saad a mangawat kadakuada,” ket adu ti masapul a mangawat kadagiti saad iti korporasion a dati a pagsasaadan dagiti graduado iti high school. Nupay no ti promedio a sapul dagiti nagraduar kadagiti unibersidad iti intero a panagbiag ket nangatngato—206.55 milion yen ($1,650,000, E.U.) no idilig iti 192.93 milion yen (1,540,000, E.U.) para kadagiti graduado iti high school nga agtartrabaho kadagiti opisina—“dumtengto ti aldaw a dagiti nagannak a Hapones mabalin a mabigbigdanto a bassiusit dagiti pagdumaanda tapno maikari iti nakaro a dadagsen iti ekonomia ti sangakabbalayanda,” kuna ti pagiwarnak.
Ti Napateg nga Avestruz
Ammoyo kadi ti komersial a pateg ti maysa nga avestruz? Maysa kadagiti itlogna ti katupag iti 24 nga itlog ti manok, ket ti karne ti avestruz ket naimas, nga adda pay ti pagimbaganna a saan a nataba ken nababa ti kolesterolna. Dagiti dutdot ti avestruz mailako iti agingga iti $5 ti tunggal maysa, ket ti nakulbet a kudil ti avestruz maaramid a primera klase a lalat. Dagiti taga Sud Africa ken Texas nakaipasdekdan iti narang-ay pagtaraknan kadagiti avestruz, ket itan ti Australia tumultulad metten. Ti pagiwarnak a The Weekend Australian ipadamagna a maysa kadagiti immuna—no saan nga isu ti immuna—a pagtaraknan idiay Australia ket naipasdek idiay makintengnga a New South Wales. Sigun iti pagiwarnak, maysa a mananginanama a mannalon kunaenna a dagiti avestruz pudno a saanda met a narigat a taraknen nupay no nagdadakkelanda. Isut’ mangipastor kadakuada kadagiti taltalon a kaasibay dagiti karnero ken dagiti kalding. Ti laeng kasapulan dagiti avestruz a taraon isu ti kanayonan a garami ken sebada iti tunggal aldaw a mainayon iti inaldaw a taraonda a ruot.
Kaadaleman a Rekord
Idi Marso 1988, dagiti managbatok a Pranses inabakda dagiti amin a napalabas a rekord iti panagbatok babaen ti panagtrabahoda iti nasurok a tallo ket kagudua nga oras iti kaungan a manipud 520 agingga iti 531 metros, a sadiay ti kapegges ket nasurok a 50 kilogramo iti kada kuadrado sentimetro. Ti panagbatok ket naaramid idiay Mediterraneo, iti taaw ti Cassis idiay abagatan a daya ti Francia. Maysa a lawas a nasaksakbay innem a managbatok ti naikabil iti hyperbaric chamber, a sadiay ti kapegges ti nain-inot a naipangato agingga iti katupag ti kapegges ti danum. Ti inaldaw a pagiwarnak a Pranses a Le Figaro ket nagkomento: “Iti sidong ti kasta a kapegges ti danum, nabaelanda ti pimmanaw iti chamber ket limmusongda iti danum iti kauneg a 520 metros iti baba nga awan ti pannakadangran.” Maysa a posible a praktikal nga aplikasion isu ti trabaho a panagtarimaan kadagiti nailemmes a paspaset iti adda iti taaw nga andamio dagiti pagsunda iti krudo.
Artipisial a Lua
Ti kinakurang ti panaglua gapu iti pannakadadael ti lacrimal glands wenno ti pannakaserra dagiti tear ducts ket mabalin a mangpataud iti nakaro a parikut, no dadduma ti panagbulsek. Tapno mairemedio daytoy, ni Jean Antoine Bernard, maysa a mangngagas a taga Paris, naan-anayna ti maysa a 400 gramo nga automatiko, a bomba a paandaren ti bateria nga usaren ti pasiente iti sirok ti kilikilina. Sigun iti linawas a pagiwarnak a Pranses a Le Figaro Magazine, ti balakad isu ti maysa a “ringilia . . . a napunno iti pisiolohikal a solusion ti asin, isu a, babaen ti ilalasatna iti ngangngani di makita a tubo a plastik, kankanayon a mangbabasa ti mata babaen iti napino a silicon catheter a maikabil iti baba ti kalub ti mata.” Ti kapartak ti panagtedtedna mabalin a mabaliwan tapno mangipaay iti pakasapulan nga ad-adu a likido kadagiti panniempo a naangin ken basbassit bayat ti pannaturog.
Saan a Banag a Pagkakatawaan
Ti dati a pammati a ti panagkatawa ket nasayaat nga agas ket serioson a maus-usig. Dadduma nga ospital idiay Estados Unidos ti mangipapaayen kadagiti “kukuarto a pagkakatawaan” a maipaay kadagiti agsakit a pasiente, dagiti mangngagas mangisuroda iti “agas a panagisem,” ket ti maysa nga organisasion a maawagan “Nurses for Laughing” aglatlataken, kuna ti The Vancouver Sun. Kuna ti report a nasarakan dagiti managsirarak a ti panagkatawa ket mabalin a “maysa a pangsumbra iti panagaburido” ket “nasayaat a maipaay iti sistema iti pananglapped iti sakit”; ti maysa inawaganna pay dayta ti “internal jogging.” Sigun iti The Sun, kunaen ti maysa a propesor iti sikologo a ti “panagkatawa paaduenna ti pagibturan iti ut-ot babaen ti panangiruarna iti endorphins, dagiti gagangay a pangep-ep ti bagi iti sakit.” Ket maysa a taga Canada a mangngagas ti nagkuna a dagiti piskel ti rupa no agkatawa ti “mangisuro iti utek a nasayaat ti riknana, kasano man ti riknayo.”
Napartak a Panagsakay
Ti German Federal Railways inawisna ti 80 a bisita a makiraman iti naisangsangayan a panangsubok iti panagtaray ti trenda iti “Intercity Experimental” (ICE) idi Mayo. Dagiti pasaheros, a nakatugaw wenno nakatakder kadagiti dua a kotse ti ICE, nagbuyada bayat a ti agraniag a bilang kadagiti speedometers nga adda iti ngatuen ti ruangan makagtengda iti 406 kilometros iti tunggal oras! Dayta kaipapananna ti baro a rekord iti kapartak iti riles. Sigun iti pagiwarnak a Frankfurter Allgemeine Zeitung, ti German Federal Railways nabiit pay a nangikabil iti maysa a pedido a maipaay iti pannakaibangon iti 41 nga ICE a kotse nga aggatadto iti nasurok a 1,500 milion a marks nga Aleman.
Baro a Kampeon a Kamatis
Idi Pebrero 1988, maysa a dakkel a mula a kamatis a nataripato idiay Tsukuba, Japan, ti nangabak iti 1985 a rekord ti lubong babaen iti 3,585 a kamatis. Agpadpada ti napalabas a nangabak ken ti nangabak iti daytoy a tawen ti nataripato babaen kadagiti hydroponic a pamay-an. Dagitoy a nangina a pamay-an ramanenna ti panangtaraon kadagiti mula iti likido nga abuno iti napudot a kalapaw a saan nga agus-usar iti daga. Dagiti sangsanga ti baro nga agaw-awit iti titulo tumuboda a rummuar iti maysa a palapala a naaramid a mangsarapa kadakuada. Inton agngudo ti nakaro a pannakikompetensiana a panagbiag ti mula, a napapaut bassit ngem makatawen, ti kampeon a mula nakapataudton iti 16,897 a kamatis!
Naimbag a Pakausaran iti Radioaktibo
Ti maysa a natan-ok a pakausaran iti radioaktibo ket nakatulongen iti pannakapukaw dagiti dadduma nga anay idiay kalalakayanen a historiko a patakder idiay Australia. Impadamag ti The Canberra Times a ti bassit laeng a gatad ti radioaktibo ket mainayon iti taraonda ket dayta ti agsaknapen iti kolonia ti anay, isu a mamagbalin a posible iti panangikeddeng iti kadakkel iti kolonia agraman ti pannakatunton kadagiti daldalanda. Ti sustansia a radioaktibo dina papatayen dagiti anay. Apaman a masarakanda, dagiti gagangay a pestisidio ti mausar nga ad-adda nga epektibo ken iti naekonomia a pamay-an. Sigun iti Times, ti pamay-an ket nakabalballigi ta dagiti pagilian a kas iti Sri Lanka, Malaysia, ti Filipinas, Thailand, ken Egipto nangiyebkasdan iti panaginteres iti dayta tapno makatulong iti panangpukaw kadagiti parikutda kadagiti anay. Agsipud ta ti gatad ti kasapulan a radioaktibo ket nasken, awan ti makuna a peggad iti pannakamulit dagiti tattao.
Dagiti Adikto iti Ehersisio
Ti kalalainganna nga ehersisio addaan kadagiti naikeddeng a gunggona iti salun-at, ngem umad-adu nga Americano ti mangar-aramid iti dayta agingga a pakadangranda met laeng. “Ti nasional a panagayat iti kinasalun-at—a maikadua kadagiti isu met laeng a sikolohikal a parparikut a patauden dagiti parikut iti pannangan nga anorexia ken bulimia—ti nangibunga iti parikut iti salun-at: nakaro, makaadikto nga ehersisio,” kuna ti The Wall Street Journal. “Adu ti mangipadamag iti isu met laeng a kita iti sintomas iti panagsardeng no didan agehersisio a kas dagiti sintomas kadagiti alkoholiko ken dagiti adikto iti droga no didan aginum ken agtomar iti droga: panagliday, panagnerbios ken insomnia.” Nupay no adda ti bassit a pagdumaan iti nasalun-at ken ti nalabes nga ehersisio, kunaen dagiti dodoktor a ti sigurado a pagilasinan iti pannakaadikto iti ehersisio ket no ti tao ket agehersisio nupay no adda pannakadangran—a masansan agtomar kadagiti droga a manglapped ti lumlumteg tapno maep-ep ti ut-ot. “Dagiti maseknan a dodoktor ammoda a dagiti pannakabullo wenno pannakabsil wenno pannakaipit ti urat a gagangayen a mapasamak kadagiti nalabes ti panag-jogging-da ken dagiti ehersisio a panagsalsala ti mabalin nga agtalinaed agingga iti tungpal-biag,” kuna ti Journal.