Manipud iti Managbasatayo

Gramatika ti Bumiberso

Tinagiragsakko iti kasta unay ti panangbasa iti “Natatayag a Naglayag a Barko Kinayawanna ti Sydney” (Setiembre 8, 1988). Nupay kasta, mariknak a masapul nga ipakaammok iti atensionyo ti di umiso a panangadaw manipud iti berso ni John Masefield a “Sea Fever” kas naimaldit iti kahon. Masapul a mabasa a kastoy: “Masapul a mapanak manen kadagiti baybay.” Mangisapitak ti maysa a kopia iti gubuayan ti material.

D. S., England

Ti gubuayan iti panangbasa nga awan ti sao a “mapan” [iti Ingles] isu ti British “Oxford Dictionary of Quotations” (Oxford University Press) ken ti “Familiar Quotations,” ni John Bartlett. Dagiti autoridad namalakadda kadakami a ti orihinal a pannakabasa nga awan ti sao a ”mapan” ket adda iti sidong ti “pammalubos ti panagberso.”​—ED.

Sakit ti Nakem

Kabasbasak pay laeng ti “Kasano a Mapagballigiak ti Sakit ti Nakem?” (Enero 22, 1988) Isuamin nga imbagayo agaplikar kaniak. Ti nobiok pinugsatna ti nasinged a panaggayyemmi. Isut’ nagtignay a kas ti kinuna ti artikulo. Umuna, isut’ di nangikankano kaniak a kas ti nobiana, a kasla ti parikut ti basta mapukaw. Idi dayta ket saan a napukaw, kalpasanna isut’ nagtugaw ket inlawlawagna ti kasasaad. Iti uneg ti sumagmamano nga aldaw, diak maawatan ti kapanunotan, ngem itatta, nangnangruna kalpasan ti pannakabasak ti artikulo, nabang-aranak, nupay no saanak pay laeng a naragsak maipapan iti dayta. Itan mabigbigkon a saan a siak ti immun-una, ket saanak met a maudi, a makapadas iti daytoy.

C. V., Brazil

Nakagtengak iti punto a sadiay kinasapulak ti tulong maipapan iti daytoy a tema. Nakisaritaak ken nanangko ken iti maysa a gayyem, ket agpadpada a kinunada a maagak. Kinunada a mapalabasto dayta. Ngem kas dineskribir ti Agriingkayo!, pudno a maladingitanak ken nasakit ti nakemko. Kasla awanen a pulos ti napateg iti biag. Ti Agriingkayo! intedna ti tulong a kasapulak nga ad-adda ngem ti aniaman.

M. M., Portugal

Ti edadko ket 13 iti dayta a tiempo. Dayta nagpaut iti maysa a tawen ket kagudua. Nasaktanak a naimbag ken naupay ta inikutak ti pannakarurodko iti lalaki. Diak makisarita iti asinoman a lalaki malaksid no kasapulan, wenno malaksid no isut’ naasawaan. Itan makitakon a biddut dayta. Tinulongannak ti artikuloyo a makakita a mabalin nga addanto maysa a dumteng nga ad-adda a matarigagayan nga asawa.

J. W., United States

Mariknak nga addaakon iti nasaysayaat a kasasaad iti emosional, mental, ken iti naespirituan a mangsapul iti maysa nga asawa. Ti artikulo nalawag ti panangibagana nga awan ti nalaka ken saan a nasaem a pamay-an a panangipatingga iti pannakitulag. Dagitoy ken dagiti mainaig nga artikulo adu ti maitulongna iti panamagbalin kadagiti agtutubo nga agbalin a nasirsirib iti pannakitulagda ket iti kasta pabassitenda dagiti sakit ti nakem ken ti saan a kinaragsak a banag ti panangasawa iti maysa nga awan ti pannakipagriknana.

A. U. I., Nigeria

Panagipakaammo

Maysaak a suskritor iti magasinyo, nupay no saanak a maysa a Saksi ni Jehova. Kayatko ti agyaman kadakayo a maipaay kadagiti artikulo nga imalmaldityo. Addaanak iti narigat ken delikado a trabaho iti maysa a sikiatriko nga ospital. Agat-atenderak iti tallo-tawen a kurso ti sikiatria iti nadumaduma nga unibersidad, ket iti sumagmamano laeng nga aldaw a napalabas, nagtugawak a maipaay iti umuna- ken maikadua-tawen nga eksaminko. Dagiti artikulo maipapan iti panagipakaammo iti Pebrero 8, 1988, a bilang ti Agriingkayo! ket nakapatpategda a tulong a maipaay iti eksaminko iti sosiolohia. Ti panagsaganak ket pudno a naibatay iti magasinyo! Nakagun-odak kadagiti nagsayaatan a resulta. Agyamanak manen, ket kablaawankayo a maipaay kadagiti nagsasayaatan a magasinyo.

P. V., Italy