Ti Aya Pagilianyo ti Talaga a Puntiria?
GAPUT’ nalaka ti gatangenna a tabako idiay Brazil ken Zimbabwe, adda sobra ti Estados Unidos a tabako. Gapuna sadino ti pangilakuan dagiti negosiante ti tabako iti dayta? Kadagiti pagilian iti Africa ken Asia? Gapuna, ipadamag ti magasin nga Asiaweek: “Dagiti pagilian iti Asia mangusardan iti agarup 50 porsiento iti naglakuan ti America iti tabako iti ballasiw taaw, a sinukatandan ti Britania ken ti Makinlaud nga Alemania a kas ti kangrunaan a paglakuan.”
Ket anian a nagbaknang a premio ti adda iti sanguanan dagiti managibenta iti tabako! Maysa a paglakuan a ti populasionna ket ngangngani dua bilion a tattao iti uneg ti sumaganad a 20 a tawtawen. Ti agdama a populasion iti China ken India laeng ket nakaam-amak—ti nagupgop a bilang nga agarup 1.8 bilion! Ket kas kinuna ti World Health: “Nupay no bumasbassit ti paglakuan iti laud iti kapartak a maysa por siento iti tinawen, umad-adu ti panagsigarilio kadagiti rumangrang-ay a pagilian iti promedio a dua por siento iti tinawen.” Ket laglagipenyo a ti bumasbassit a paglakuan basbassit ti populasionna ngem ti mabalin a paglakuan a maawis iti Daya. Inanamaen ti industria ti tabako iti E.U. a ti paglakuan idiay Asia umadunto iti 18 porsiento inton tawen 2000. Ngem adda laeng maysa a lapped. Ti buis.
Dagiti Doble a Pagalagadan iti Panangisaknap iti Sakit ken Ipapatay
Kasano a maallukoy dagiti kompania ti tabako nga Americano dagiti dadduma a pagilian a gumatang kadagiti sobrada a sigarilio? Di nakapapati, adda tumultulong, nupay pakpakdaaranna ti umilina a maibusor iti peggad ti panagsigarilio, aktibo nga itandudona ti pannakailako ti makapapatay a tabako kadagiti dadduma a pagilian. Siasino dayta? Ti gobierno ti E.U.!
Ilawlawag ti Asiaweek: “Ti di malapdan a managlako iti tabako immaddangda a ti gobierno ti E.U. ti mangsupsuportar iti dayta. . . . Ti Office of the U.S. Trade Representative . . . inikkatna dagiti amin a lapped ket nakastrek iti pagiwarnak iti Asia a maipaay kadagiti kompania nga Americano—uray pay no dagiti ad iti sigarilio nabayagen a naparitan a maipabuya ken maipangeg idiay E.U.” Ipadamag ti magasin a World Health: “Kasta unay ti napolitikaan nga impluensia dagiti kompania ti tabako ti [E.U.] Ti pananganamong ti pannakinegosio wenno ti panagpeggad kadagita a linteg ket naaramid a maibusor iti Hong Kong, Taiwan, Japan ken Korea malaksid no palubosanda ti panagilako ken panagiadbertais kadagiti produkto ti tabako nga Americano.”
Ti dakdakes pay, dagiti kompania ti tabako saanda laeng nga ilako dagiti produktoda iti Asia no di ket paaduenda pay ti malakoda babaen iti manangpilit nga adbertismen. Dadduma a pagilian, kas iti Taiwan ken Sud Korea, a mapilpilit, ti nangikkat payen iti pananglappedda iti panangiadbertais iti tabako! Ita ti China umun-una met iti listaan dagiti managpataud iti sigarilio iti E.U. Di ngarud pakasdaawan a maysa nga ehekutibo ti kompania ti tabako ti naadaw nga agkunkuna: “Ammoyo no ania ti kayatmi? Kayatmi ti Asia.” Ngem kasano ti panangmatmat dagitoy kadagiti manangpilit unay a taktika nga Americano?
Sigun iti koresponsal iti New York Times, binusor ti maysa a negosiante a Koreano “ti imoralidad ti Americano iti panangipilitda kadagiti sigarilio nga Americano kadagiti Koreano.” Ket natibker ti rasonna. Nupay busuren ti America ti panaggatang ti cocaine ken heroin a kangrunaan a kasapulan ti dadduma nga ekonomia, kayatna nga ilako ti makasabidong a mulana kadagiti dadduma a nasnasion. Yantangay kunaen ti America a nangato ti pagalagadan ti kababalinna, maitunos aya ti pagalagadanna no ipasana kadagiti dadduma a nasion, nga adu ti agrigrigat iti ekonomiana, ti sobra a produktona a makadangran a tabako?
Dadduma ti Lumaban
Dadduma nga Africano a nasion, kas iti Gambia, Mozambique, ken Senegal, linapdanda ti adbertismen. Kinuna ti ministro ti salun-at iti Nigeria idi napan a tawen a “lapdan ti [gobierno ti Nigeria] dagiti amin a pagiwarnak, radio, telebision ken billboard ti adbertaising. Paritanmi ti panagsigarilio kadagiti amin a luglugar publiko ken luglugan.” Pinakaammuan ti information officer ti Nigeria ti Agriingkayo! (Enero 1989) a daytoy nga isyu ket mapagdedebatean pay laeng.
Ti China ket maysa a nasion nga addaan 240 milion a managsigarilio. Inton 2025, inanamaen dagiti medikal nga autoridad a mapukaw ti dua milion a tattao iti tinawen kas resulta ti sakit a mainaig iti panagsigarilio. Dakkel ti parikut ti China, kas aminen ti magasin a China Reconstructs: “Nupay no linapdan ti gobierno ti China ti adbertismen ti sigarilio, kankanayon ti report dagiti pagiwarnak ken magasin iti pakdaar iti makadangran nga epekto iti panagsigarilio, ken ti kankanayon a panagpangato ti presio ti sigarilio, agtultuloy nga umadu dagiti managsigarilio.” Ket ania ti maysa kadagiti resultana? “Ti kanser, dagiti saksakit ti puso ken pagangsan isuda dagiti kangrunaan a mammapatay idiay China.”
Kadagiti dadduma a paset ti China, pagilasinan ti kinamanagpadagos ti panangitukon iti sigarilio no abrasaen dagiti bisita. Ngem anian ti banagna kadagiti Insik! Ipadamag ti China Reconstructs: “Dagiti eksperto iti medisina namakdaarda nga umad-adu ti kanser iti bara.” Kas kinuna ti maysa nga eksperto nga Insik: “Nangina unayen ti pagsubsubadtayo.”
Adda, nupay kasta, sabali pay a peggad iti pannakabalin dagiti managadbertais iti tabako—ti nasikap nga impluensiada iti pagiwarnak.
[Ladawan iti panid 10]
Mangbusor iti panagsigarilio nga ad idiay Hong Kong