Agpeggad ti Salun-at Uray “Saan nga Agsigarilio”
TI Journal of the American Medical Association (JAMA), a Pebrero 10, 1989, impadamagna: “Rinepaso ti National Academy of Sciences ti impormasion maipapan kadagiti makalanglang-ab laeng iti asuk ti sigarilio . . . , a nangnangruna a kinablaawanna ti aglawlaw dagiti eroplano.” Ti rekomendasion: “Paritan ti panagsigarilio kadagiti amin a komersial a biahe iti pagilian gapu kadagiti uppat a kangrunaan a rason: tapno pabassiten ti panagririri, tapno pabassiten ti peggad iti salun-at, tapno pabassiten ti peggad iti uram, ken tapno pagbalinen ti angin iti uneg ti eroplano a maitunos iti pagalagadan kadagiti amin a nakaserra nga aglawlaw.”
Ti napinget a panagadal ti akademia ipalgakna: “Ti pannakaisarang iti nikotina a narukod bayat ti biahe a mangusar kadagiti personal monitor iti pannakaisarang ket nasarakan a nadumaduma, a dadduma a luglugar a saan a pagsigarilioan ti nakagteng kadagiti patas a kapada met laeng dagiti luglugar a pagsigarilioan. Dagiti katulongan ti panagbiahe a naidestino nga agtrabaho kadagiti luglugar a saan a pagsigarilioan saanda a masalakniban manipud iti pannakaisarang iti sigarilio.”
Impakita ti panagadal a “ti patas ti nikotina iti angin ket nagduduma, a dadduma kadagiti luglugar a di pagsigarilioan ket nangatngato pay ti patasna ngem kadagiti dadduma a luglugar a pagsigarilioan” ket impalagipna kadagiti managbasa a “ti dakes nga epekto iti salun-at iti pannakalang-ab, wenno saan nga inggagara a panagsigarilio, iramanna ti kanser iti bara ken sakit iti pagangsan.”
Daytoy met laeng a bilang iti JAMA impadamagna ti maysa a panagadal a nangipasdek ti panangadikto ti nikotina, a kunkunana: “Dagiti tattao a mangsapsapul iti pannakaagas manipud iti panagpannuray iti droga ti mangibilang iti panagtarigagay nga agsigarilio ken ti rigat a mangisardeng iti panagsigarilio a nakaro wenno nakarkaro pay ngem ti parikutda kadagiti alkohol, cocaine, heroine.
Pinaritan ti Canada ti panagsigarilio kadagiti panagbiahe ti eroplano a dua nga oras wenno basbassit pay idi 1987. Dagiti dua a kangrunaan a kompania ti eroplano naing-inget pay, ta pinaritanna ti panagsigarilio kadagiti amin a panagbiahena iti Norte America. Idiay Estados Unidos, pinaritan ti linteg ti gobierno ti panagsigarilio kadagiti ababa a panagbiahe, ket “maysa a kompania ti eroplano ti siboboluntario a nangiparit iti panagsigarilio iti aniaman a kaatiddog ti panagbiahe iti uneg ti Estados Unidos, malaksid ti panagbiahe nga agturong idiay Hawaii.” Bayat nga ad-adu a kompania ti eroplano ti mangsurot iti padapada a pagalagadan iti panagsigarilio makatulongdanto a mangpabassit iti peggad iti panagbiahe iti eroplano.