Manipud Managbasatayo
Holocaust Ti asawak ken siak kayatmi nga iyebkas iti panagyamanmi ken ti kasta unay a panangapresiarmi iti pranka ken nalawag a pagsasao a nausar kadagiti artikulo iti Holocaust. (Abril 8, 1989) Dagiti ladawan ken ti mapa ti nangpaladingit iti kasta unay kadakami. Ipakitada ti kinaranggas ken kinarungsot ti natauan a sistema. Nangnangruna a tinagiragsakmi ti artikulo ti panagungar, positibo unay ken makaliwliwa! Nupay dikam personal a sinagaba dagitoy a bambanag, napateg ti agsarita maipapan kadakuada ken ti manglaglagip kadakuada.
I. L., Pederal a Republika ti Alemania
Masapul a padayawak dagiti mannuratyo. Pudno nga inaramidda ti homeworkda. Dayta a bilang agtalinaedto iti libreriak agingga a matayak! Nupay no saanakto a pulos nga agbalin a maysa a ‘Saksi ni Jehova,’ tarigagayak nga ipakaammo kadakayo nga addada tattao nga agyaman kadakayo gapu iti kasta nga impormasion.
A. S., Estados Unidos
Edukasion Ti artikuloyo laisenna ti uppat-tawen a degree iti unibersidad. (“Agimtuod dagiti Agtutubo . . . Ania a Karera ti Piliek?” Mayo 8, 1989) Kunaenyo: “Ti degree iti unibersidad mabalin a parang-ayenna wenno saan ti gundawayyo a maiyempleo.” Ti ipampamatmatyo ket adda dakkel a posibilidad a ti maysa a degree saanto a makatulong iti panagsapul iti trabaho. Daytoy ket basta saan a pudno! Ngem ipaayyo ti bendision iti dua-tawen a panagadal iti kolehio.
A. N., Estados Unidos
Saanmi a panggep ti manglais iti edukasion iti unibersidad no di ket parparegtaenmi dagiti agtutubo a mangala iti karera a panagserbi iti Dios. Bigbigenmi nga, iti promedio, dagiti graduado iti unibersidad nangatngato ti sueldoda ket basbassit ti gundawayda a saan a maiyempleo ngem dagiti graduado iti high school. Nupay kasta, ti maysa a degree iti unibersidad dina ipanamnama ti pinansial a balligi—maysa a kinapudno a pinaneknekanen dagiti mapagtalkan nga autoridad. Ti dua-tawen a panagadal ket naisitar laeng a kas pagpilian nga usigen dagiti dadduma nga agtutubo no ipilit dagiti dadakkelda ti panagadalda iti unibersidad. Ti kawatiwat ti sekular nga edukasion nga alaen ti maysa ket interamente a personal a banag. Ngem nupay no di ikankano dagiti kinapudno maipapan iti ekonomia, dagiti Kristiano nga agtutubo masapul a tingitingenda dagiti mabalin a di nasayaat nga epekto iti pannakaisarang iti aglawlaw ti unibersidad iti espiritualidadda. (1 Corinto 15:33) Masapul a laglagipenda met ti maysa a banag a saan a naipakita iti estadistika iti pannakiyempleo—ti kari ti Dios a mangipaay kadagidiay a mangiyun-una iti interesesna. (Mateo 6:33)—ED.
Ozone Tinudingannak ti mannursurok a mangited iti maysa a report maipapan iti agdama a kasasaad ti parikut iti naturalesa. Pinilik ti tema nga “Ozone Hole,” a ti Enero 22, 1989, a bilang ket dakkel a tulong. Pagyaman iti napnuan ti impormasion a naiparang iti artikulo, nakagun-odak iti nagsayaatan a grado.
C. B., Pederal a Republika iti Alemania
Biktima iti AIDS Tarigagayak nga iyebkas ti ayat ken suportarko iti agtutubo a nagsurat iti “Banag a Nakarkaro Pay Ngem AIDS.” (Abril 22, 1989) Nagsilnag a kankanayon ti kinapakumba ken panangapresiarna.
B. E., Estados Unidos
Binasak ti artikulo a buyogen ti kasta unay a panagluluak ken ti kasla pannakaserra ti karabukobko. Addaanak met iti anak a lalaki a nangpanaw ken Jehova. Iti uneg ti 13 a tawtawen isut’ sinipsiputanmi a nagsapsapul iti kinaragsak. Nupay no natibkerkami kadagiti pagalagadan ni Jehova, kankanayon nga impasiguradomi ti ayatmi ken ni Wayne. Ngem isut’ naimpluensiaan iti alkohol ken cocaine. Interamente a di ninamnama ti ipapatayna, nupay no kankanayon a maam-amakak iti mabalin a mapasamak. Isut’ 28 años. Ikarkararagko a dadduma nga agtutubo magunggonaanda manipud iti kapadasan ti agtutubo a lalaki, tapno saanda a panawan ni Jehova ket agbayadda iti nangina.
S. E., Estados Unidos