Manipud Managbasatayo

Panagdayaw iti Emperador Iti artikuloyo a “Pompon iti Dati a Dios” (Disiembre 22, 1989), di umiso ti nangipaayanyo iti pammabasol iti panagsuppiat ti Japan ken ti Laud. Daytoy ket resulta iti panangikagumaan ti Laud a mangituray iti Asia. Ti panagbalin ti Japan kas maysa a pannakabalin ti lubong pinasardengna daytoy. Saan, saan a dios ni Emperador Hirohito, ngem mabalin a ti Apo ti nangusar kenkuana iti pamay-an a nangiturong iti pannakawayawaya dagiti mailupitlupit a tattao iti Asia.

T. M., Estados Unidos

Saan a nainkalintegan a kunaen nga inanamongan ti Dios ti nakaam-amak a panagdangadang nga inyeg dayta a suppiat. (Habacuc 1:13) Ti nakalkaldaang a panagturay ni Emperador Hirohito ket nausar a mangyilustrar a ti panangituray ti tao dangranna ti tao ken ti tao kasapulanna unay ti panangituray ti Dios. (Eclesiastes 8:9)—ED.

Dagiti kadi artikulo nasayaat ken umiso a basaen ti maysa a Kristiano? Babaen ti panangbasa kadagiti detalye maipapan ken Emperador Showa, saan kadi a ‘dagiti is-isiptayo adda kadagiti aramid a dakes’?—Colosas 1:21.

Y. F., Japan

Kaawatan, dagiti artikulo mabalin a tignayenda dagiti nakalkaldaang a pakalaglagipan, nangnangruna kadagiti managbasa a nakalasat kadagiti paspasamak a nadeskribir sadiay. Nupay kasta, dagiti artikulo naisuratda a mangibutaktak iti kinamaag iti panagdayaw iti aniaman a tao ket iturongna dagiti managbasa “iti sibibiag a Dios.” (Aramid 14:15)—ED.

Panangpili iti Karera Agyamanak iti balakadyo kadagiti agtutubo maipapan iti kinapateg ti edukasion iti unibersidad. (Mayo 8, 1989) Kadagiti napalabas a 22 a tawtawen, maysaak a propesor iti maysa a dakkel nga unibersidad, ket maipanamnamak kadagiti agtutubo a managbasayo a malaksid iti serioso a naespirituan a panangusig, adut’ maisursuro kadagiti unibersidad kadagitoy nga al-aldaw ti bassit laeng ti praktikal a pategna. Dagiti pagalagadan iti akademia bimmabadan, ket masansan a dagiti nagraduar mammanon dagiti makagunggona a paglainganda.

Kasta met, iti napalabas, daddumat’ nagkuna a ti agtutubo a Kristiano makondenar iti panagpalistana iti maysa a kurso iti unibersidad iti aniaman a kasasaad. Ngarud apresiarek ti natimbeng a panangmatmat nga inyebkasyo iti artikuloyo.

F. S., Estados Unidos

Masapul nga ikeddeng dagiti nagannak no kasano kaadu a panagadal ti maitutop kadagiti annakda. Ket nupay no ti karera iti ministerio ti mairekomendar kadagiti Kristiano nga agtutubo, ti pannakasanay iti trabaho malaksid iti maitukon iti eskuelaan segundaria ket saan met a dakes a mismo. Kadagiti dadduma a dagdaga, mabalin a praktikal wenno nasken pay ketdi ti makagun-od iti kasta a pannakasanay. Masapul a tingitingen dagiti nagannak dagiti gunggona a maibusor kadagiti epekto dayta iti espiritualidad dagiti annakda. Iti aniaman a kasasaad, masapul a ti iyun-una ti Kristiano isu ti pannangparang-ay kadagiti intereses iti Pagarian, saan a ti pinansial a pagimbagan. (Mateo 6:33)—ED.

Kankanayon ti panangibagbaga dagiti dadakkelko iti panangsurok ti trabaho idiay eskuelaan, ngem basta malipatak dayta. Nanipud idi nabasak ti artikuloyo, mangal-alaakon kadagiti kurso a makatulong kaniak a makagun-od iti trabaho inton sumardengakon nga ageskuela. Ngem aniaman ti masursurok a trabaho, planok a pagbalinen a karerak ti ministerio.

V. L., Estados Unidos

Pannakaawat iti Angkit Naimpusuan ti panagyamanko iti artikuloyo. (Marso 22, 1990) Iti aldaw sakbay ti pannakaawatmi iti dayta, inresita ti doktormi a ti anakmi a babai ket agsagsagaba iti angkit. Gapuna ti artikulo ket kasla mangliwliwa a takkiag. Usarekto dagiti adu a singasingna.

V. H., Inglatera

Crossword Puzzles Kankanayonak a managbasa iti Agriingkayo! ket nangnangruna a tagiragsakek dagiti crossword puzzles. Tulongandak dagitoy nga agimemoria kadagiti kasuratan. Ad-adunto pay kadi ti maipablaak?

J. W., Inglatera

Wen, dagitoy agtultuloy a maipablaakdanto iti panapanawen.—ED.