Manipud Managbasatayo

Panangited iti Krismas Ti artikulo a “Nasaysayaat Ngem Panangited iti Krismas” (Disiembre 22, 1992) nalawag ti panangibuksilna iti kontrobersial a topiko, kaskasdi a buyogen iti kinataktika. Manipud iti pangrugian, daytat’ maawat ti tunggal managbasa, relihiuso man wenno saan. Kasta met nga awan naan-anay a panangkondenar iti amin a dekorasion a nainaig iti Krismas. Daytoy a makaay-ayo a panangilawlawag ti nagsayaat a basaen ken ipaima iti trabahotayo a panangasaba.

T. T., Alemania

Talaga nga impabigbig kaniak ti artikulo no aniat’ nasaysayaat ngem kadagiti sagut ti Krismas nga isu ti panagayat dagiti nagannakko ken ti pamay-an ti naimpusuan a panangitedda. Marigatanak met a mangilawlawag iti klasek no apay a datayo a Saksi ni Jehova ti saan a mangselebrar iti “Aldaw ni St. Nicholas” ken Krismas. Babaen ti tulong daytoy nga artikulo, mailawlawagkonton a naimbag.

S. H. S., Alemania

Dagiti Celts Ti artikuloyo a “Dagiti Celts​—Makitkita Pay Laeng ti Impluensiada” (Setiembre 8, 1992) naan-anay a makaparagsak. Kadawyan [dagiti mannurat] ita nga ilawlawag ti maipapan kadagiti kadaanan a kultura a kas ket tay nasaysayaat ti biag ti tattao idi ket no kadaanantay koma manen, nasayaat koma ti kasasaadtayo. Makaliwliwa a basaen ti maysa nga artikulo a nangiyam-ammo iti maysa a kultura iti nagsayaat a pamay-an a din kasapulan nga umsien ida wenno pagparangen ida a nakakatkatawa.

L. Z., Estados Unidos

Sekso ti Ubing Pagyamanan iti kahon a napauluan “Kasano a Maikeddeng ti Sekso ti Ubing?” a nagparang iti artikulo a “Babbai​—Mararaem Idiay Pagtaengan?” (Hulio 8, 1992) Insurodak a di pabasolen ni manangko iti panangipasngay iti lima a babbai iti las-ud ti sangapulo a tawen ken ti pannakapaayna a mangipasngay iti lalaki. Sigun iti artikuloyo, no asinoman ti rumbeng a mapabasol, dayta isut’ asawa a lalaki.

E. J. O., Nigeria

Nupay ti semilia ti kangrunaan a makaikeddeng no lalaki wenno babai ti maiyanak, awan basol a pulos ti asawa a lalaki wenno asawa a babai. Kas kinuna ti artikulo, daytoy ti “pannakigasangasat laeng iti panagpaadu” a dida pulos matengngel.​—ED.

Crossword Puzzle Pagyamanan unay kadagiti crossword puzzle! Nabiit pay a nabasak ti kapitulo maipapan ti panagleddaang iti libro a Dagiti Saludsod nga Iyimtuod ti Agtutubo​—Dagiti Sungbat Nga Epektibo. Insingasingna ti “panagaramid kadagiti bambanag a talaga a paglaingan,” kas ti panangsolbar iti maysa a puzzle. Dakkel a tulong daytoy gapu ta mapagkatawa, maparagsak, ken maisuronak iti kabbaro nga impormasion. Pangngaasiyo ta itultuloyyo nga ipablaak dagiti puzzle!

M. R., Estados Unidos

Ti libro a natukoy ket impablaak ti Watchtower Bible and Tract Society of New York, Inc., dagiti mangipabpablaak iti daytoy a magasin.​—ED.

Mangibabain a Nagannak Idi nabasak ti artikulo nga “Agimtuod Dagiti Agtutubo . . . Ania Ngay No Imbabainnakami ti Naganakko?” (Oktubre 22, 1992), napalaus unay ti panagsangitko. Dua a tawen itan a nailaksid ni tatangko manipud iti Nakristianuan a kongregasion, ket nagsagabakami unay ken nanang. Inaramidko ti insingasing ti artikulo ken nakiumanak iti nataengan a Kristiano a panglakayen, ket immawatak iti adu a pammaregta ken panangandingay.

A. O., Japan

Nagbalin nga apostata ni tatangko, a dati a Saksi ni Jehova. Pinadasna a pagtallikuden ti dadduma manipud iti kinapudno ken agdiskurso pay ketdi kadagiti simbaan. Isut’ awaganda a “reverendo”! Mabainak unay! Talaga a nakatulong kaniak daytoy nga artikulo.

B. A., Estados Unidos