Gubat—Panangsaranget iti Epektona
KASANO a makapagballigi dagiti tattao a mariribuk gapu iti gubat? Tapno maawatantayo daytoy a tema, pinagsaludsodan ti Agriingkayo! ti dadduma a biktima iti gubat.
Ni Bob Honis ket maysa kadagiti pinulpullo a ribo a marinero a nakigubat idi maikadua a gubat sangalubongan iti gubat idiay Iwo Jima iti makinlaud a Pacifico. Ti estoriana ket naiprenta a saan a mangkigtot no di ket tapno ipakita a posible a dagiti dadduma maimbaganda uray pay kadagiti makariribuk unay a kapkapadasan.
Ti Pannakariribuk
“Rinugianmi ti iyaadanimi iti Iwo Jima idi alas 8:30 t.b. idi Pebrero 19, 1945. Dagiti kanyon ti barko a pakigubat a Tennessee adda a nakaul-ulimek iti likudanmi, ket idin ti bilogmi a pagibaba kadagiti alikamen ken dagiti tropa pinatuduanen dagiti kabusor iti putok manipud kadagiti armasda a pakigubat iti igid ti baybay. Natignay iti kasta unay dagiti riknak, a naiturong iti panagtignay iti masanguananmi, nagikkisak iti tengnga ti amin nga ungor ken ariwawa, ‘Isalakanmo ti dadduma para kadakami!’ bayat ti panangsurotmi iti immuna a tropa a rimmaut.
“Idi addakamin iti igid, maangotmi amin ti makapasidduker nga angot ti burbura, ti bulkaniko a dapo, ken ti sumsumged nga alikamen. Natiruan ti bilog a pagisangladmi. Natay a dagus ti tsuper, ket nadadael dagiti amin nga alikamenmi.
“Diakto malipatan ti buya dagiti dadduma a natay a marinero. Ti maysa ket nakapakleb iti darat. Ti botana a pakigubat, nga awanen ti suelasna, ket naan-anay a nakasintas agingga iti tumeng, a nakakabit kadagiti saksaka nga ubing, a napigsa pay idi. Idi kumitaak iti kannawanko bayat ti panagkarayamko a simrek iti sidadaras a nakali a foxhole, nakitak ti sabali pay a marinero a nakarukob a kepkepkepanna ti paltogna, a napugotanen ti ulona. Namulitan ti igid ti baybay kadagiti natnatay a marinero, nga adut’ napawadan a din mabigbig. Daytoy ket pangrugian laeng.
“Idi maikadua nga aldaw naibaonak a mangkita iti maysa a puestomi. Anian a nakaam-amak a buya ti nakitak! Ti panagbettak ti maysa a bomba pinukolanna dagiti saka ken ima ti umuna a marinero a nakitak. Ti helmetna ken ti strapna nakareppet pay laeng iti timidna. Nakamulagat dagiti matana, a nakamulengleng iti sanguanan a kasla agmemmennamenna iti nauneg. Naiwaraswaras iti aglawlaw a kasla narumrumek a naseksekan nga ay-ayam, dagiti dadduma a miembro iti soldado a makigubat ket kakaslada laeng pedaso dagiti naiwaraswaras a laslasag iti nalukneng, nangisit a bulkaniko a dapo.
“Nagtultuloy ti panangpapatay agingga iti maikatlo nga aldaw. Ket nangrugi idin nga agrupsa dagiti natay a nakaparpartak. Saanen a maibturan ti angotna. Daytat’ adda iti sadinoman. Dika malisian dayta.
“Kalpasan ti uppat nga aldaw a napinget a pannakidangadang, idi Pebrero 23 addan ti nakalatlataken a panangibayog iti bandera ti America iti Bantay Suribachi. Imbes a panagragsak, ti laeng mariknak ket panagladingit. Adda iti isuamin a lugar dagiti natay. Kasla nakalaklaka ti pateg ti biag. Nagtultuloy ti narungsot a gubat agingga idi Marso 26, idi naalan kamaudiananna ti Iwo Jima, kalpasan ti adu a lawlawas nga awan sardayna a panangpapatay. Anian a panangibukbok ti dara—adda nagupgop a 26,000 nga Americano ken Hapones a napapatay iti maysa nga isla a 20 kilometros kuadrado laeng ti kadakkelna!
Ti Epektona
“Dayta koma ti tiempo iti dakkel a ragsak idi nawayawayaanak manipud iti Kinamarinero ket naitimpuyogak manen iti pamiliak. Ngem, nupay kasta, limtuaden ti ing-ingpenek—ti nakaam-amak a kinakawaw ken ti pannakarikna ti kinaawan mamaayna.
“Adda dagiti salsaludsod a kankanayon a mangtutuok kaniak. No nakalaklaka ti pateg ti biag, ania ti panggep ti panagbiag? Pudno kadi nga adda manangipateg a Dios? Riribukennakto kadi dagiti kapkapadasak iti intero a panagbiagko? Uray pay idi inkasarkon ti asawak, ni Mary, nagtultuloy ti pannakatutuok. Diak makita ti namnama iti napaut, naragsak a masanguanan, ti laeng gubat ken ti ad-adu a minamaag a panangpapatay agingga a, kamaudiananna, ti pannakadadael iti daga ken ti amin a biag nga adda iti dayta.
Panangsapul iti Solusion
“Di nagbayag kalpasan ti panagkasarmi, ti asawak ken siak ket sinarungkaran ti dua a Saksi ni Jehova. Daytoy ti nangted gundaway kaniak nga agimtuod kadagiti makasukisok a salsaludsod maipapan iti gubat, panagsagaba, ken ti panggep iti biag. Dagiti sungbat ti salsaludsodko dagdagus a dimteng manipud iti Biblia.
“Wen, adda naayat a Dios a mangipateg ken iti mabiiten iremediona dagiti amin a rigat ken panagladingit. (Salmo 83:18; Apocalipsis 21:1-4) Saan, saan nga anamongan ti Dios dagiti gubgubat a mangibanag kadagiti napolitikaan a kalat ti tao. (Salmo 46:9; Isaias 2:4; Juan 18:36) Saan, ti daga saanto a dadaelen ti nuklear a holocaust. Daytat’ agtalinaed iti agnanayon, kas maysa a paraiso a pagtaengan dagiti amin a makasabet kadagiti pagalagadan ti Dios.—Salmo 37:29; Isaias 45:18; Apocalipsis 11:17, 18.
“Bayat ti panagtultuloy ti panagadalko iti makapabileg-puso a karkari iti Biblia, nagin-inuten a napunnuan ti kinakawaw iti unegko. Ad-addan ti panagtalekko a ti Pagarian ti Dios ti kakaisuna a napudno a pamay-an iti pannakaiyeg ti talna ken kinatalged ditoy daga. Ti gubat ti Dios nga Armageddon ikkatennanto kamaudiananna ti dakes iti isuamin a daga.—Daniel 2:21, 22; Mateo 6:10; Apocalipsis 16:14-16.”
Manginanamakay kadagiti Karkari ti Dios
Dadduma ti nangpatalged a ti pannakaammo iti kinapudno maipapan iti kari ti Dios a maipaay iti daga ken dagiti rasonna iti temporario a panangipalubosna iti kinadakes isudat’ kabibilgan a banag a nakatulong kadakuada a nakapagballigi kadagiti nabatbati pay a panangriribuk iti gubat.
Daytoy dina isingasing a mabalin a no dadduma din kasapulan ti propesional a medikal a tulong. Ngem ti napudno a namnama, a naibatay iti mapagtalkan a karkari iti Dios iti Biblia, pudno a mangipaay iti makin-uneg a bileg a mangibtur kadagiti serioso a parparikut.
Nupay kasta, mabalin a saankay a personal a maapektaran ti panangriribuk iti gubat. Ngem mabalin nga adda ammoyo a marirriribukan. Ania ti maaramidanyo tapno makatulong? “Mannakaawatkay koma ken makaparegta kadagidiay a nagsagaba iti kastoy a pamay-an,” kuna ti maysa a biktima iti panangriribuk iti gubat, ni Mary C—. “Tulonganyo dagita a kumita iti masanguanan, ti panangpampanunot kadagiti karkari ti Dios, saan a dagiti trahedia iti napalabas,” imbalakadna. Wen, aganus ken manangngaasikayo. Agpasensiakayo. Ket padasenyo a tulongan ida a manginanama iti masanguanan.
‘Ngem,’ mabalin a kunayo, ‘kasano koma a kadagidiay nagsagaba iti panangriribuk iti gubat, ti sabali a gubat, ti Armagedon, isunto ti solusionna?’ Ti Armagedon, ti gubat ti Dios a maibusor iti amin a kinadakes, ket maysanto a gubat nga awanan kadagiti inosente a biktima. Dinanto labsingen dagiti prinsipio iti kinahustisia ken kinaimbag. Dayta ‘maibanagto iti kinalinteg,’ a dagitinto laeng nadangkes ti matay.—Apocalipsis 19:11; Proverbio 2:20-22.
Ti Armagedon awanto dagiti nakaam-amak nga epektona, awan dagiti maulit-ulit nga ar-arapaap wenno dadduma a sikolohikal a pannakadangran. Ti baro a lubong ti Dios tungpalennanto ti naimpadtuan a ladawan a naipinta idiay Isaias 65:17-19: “Dagiti immun-una a bambanag didanto malagipen, . . . ket dinto mangngegen . . . ti sangit ken ti timek ti aganug-og.”
Amin dagiti napalabas a biktima iti makapapatay a gubat ken kinaranggas, uray dagiti natay, magunggonaandanto manipud itoy a gubat. (Salmo 72:4, 12-14; Juan 5:28, 29) Panunotenyo dayta—ti pannakaisubli iti Paraiso ti talna a pinanggep ti Dios idi damo.
“Daytoy a namnama nga ipaay ti Biblia,” kinuna ni Bob Honis, “isu ti sekreto iti panangsaranget iti epekto iti gubat. Amin a nadangran iti panangriribuk iti gubat magunggonaanda manipud iti kasta a namnama. Daytoy a kita iti namnama ket, kas kunaen ti Biblia, ‘maysa a sinipete ti kararua.’”—Hebreo 6:19.
[Blurb iti panid 8]
Iti dalan nga agturong iti Iwo Jima, inadalmi ti modelo iti isla
[Dagiti ladawan iti panid 7]
Agparang ni Honis iti makinngato a kanawan
“Limtuaden ti ing-ingpenek—ti nakaam-amak a kinakawaw ken ti pannakarikna ti kinaawan mamaayna”
[Credit Line]
U.S. Marine Corps
[Ladawan iti panid 9]
Ni Bob ken Mary Honis itatta