Agimtuod dagiti Agtutubo . . .

Aniat’ Sekreto iti Panagpili ti Umiso a Kawes?

AMMO ni Mike ti agpili kadagiti de kalidad a kawes​—ken no kasano a magun-odan ida iti kalalainganna a presio. No dadduma dawaten pay dagiti miembro ti pamiliana nga igatanganna ida! Iti maysa a panaggatangna, nangpili kadagiti bado a maipaay ken nanangna, ti kabsatna a babai a naasawaanen, ken ti otso-años a kaanakanna a babai​—umiso ti kadakkelda ken ti estilo a kayatda! Iti dayta, pinilina ti maysa a bata de banio a maipaay kenkuana met laeng a kakapat laeng iti gagangay a presiona. Para ken ni Mike, daytoy ket saan a narigat no di ket daytat’ talaga a pagragsakanna.

Mabalin nga awan ti reggetyo a kas ken ni Mike iti panaggatang. Ngem kas kadagiti dadduma nga agtutubo, nalabit kayatyo a ti itsurayo ti kasayaatan idiay eskuelaan, pagtrabahuan ken iti panagay-ayam. Ti parikut ket, ti kinapudno a ti maysa a kita iti estilo ket maibilang nga uso kadagiti agtutubo dina kaipapanan a dayta ti umiso nga isuot, wenno ti pananggatang iti “banag nga uso” kaipapananna a daytat’ kasayaatan a pakausaran iti kuartayo. Gapuna, ipapantayon a palubosannakayo dagiti dadakkelyo nga agpili iti bukodyo a kawes, adtoy ti sumagmamano a pangripiripan iti panagpili ken panaggatang kadagiti umiso a kawes.

Panagpili ti Umiso a “Kawes”

Umuna, bay-antayon ti kapanunotan nga uray ania ket mabalin no maipapan iti kawes. Agmatmataengankayon, ket ti pananginanama iti panagsapul ken nalabit ti panangsuportar iti maysa a pamilia addan iti masanguananyo. Ti panagkawkawesyo apektarannanto saan laeng a ti namnamayo a maiyempleo no di ket ti pamay-an ti pannakamatmatyo ken ti panangtrato dagiti dadduma kadakayo. Napatpateg pay, datayo a Kristiano “saantay laeng a makaay-ayo iti bagitayo met laeng,” no di ket maseknantay met maipapan iti no kasano a ti aramidentayo​—wenno isuottayo​—apektaranna dagiti dadduma.​—Roma 15:1.

Ti Proverbio 25:20 saritaenna ti maysa a “manguksob iti pagan-anayna iti tiempo a nalam-ek.” Anian a di maitutop! Maipadpad iti dayta di met maitutop ti panangisuot iti naestilo a kawes a pudno a saan a maibagay iti okasion. Ti aktor iti maysa a pabuya siaannad a pilienna ti kawesna a maibagay iti akemna. Ket iti pudno a biag, masansan a dagiti akemtayo sapulenna dagiti nadumaduma a “kawes.” Kas pangarigan, mapankayo kadi agpainterbiu a maipaay iti trabaho? Ngarud rumbeng ti maysa a terno. Mapankayo kadi ageskuela? Ngarud kayatyo a ti itsurayo ket gagangay ngem siempre nadalimanek.

Ni Millie, maysa a Saksi ni Jehova, ages-eskuela idiay lugar a nasaknap iti kinaranggas. Ti panagkawes a kasla mapan iti Nakristianuan a gimong ti mamagbalin kenkuana a nakadkadlaw. Gapuna mangisuot iti naemma a paris ti jeans ken blusa bayat ti or-oras ti panageskuela, ta daytat’ maawat iti eskuelaanna. Ngem gapu ta isut’ mangaramid iti trabaho a panangiyadal iti Biblia kalpasan ti klase, isut’ mangitugot iti bado. Agbaliw iti akemna, agbaliw iti kawesna.

Dagiti agtutubo a Saksi ni Jehova panunotenda a nangnangruna ti isuotda kadagiti Nakristianuan a gimgimong ken iti trabahoda a panangasaba iti publiko. Kas pangarigan, ti jeans ken sneakers, a maitutop nga usaren idiay eskuelaan, ket saan a maibagay iti pormal a panagdayaw; ipababana ti panagakem ti maysa a ministro ti Dios.​—Idiligyo iti 2 Corinto 6:3.

Ti Pateg iti Konserbatibo a Panagkawkawes

Ti pilosopia ni agtutubo a Rudy maipapan iti panagkawkawes mabalin a pagsiddaawennakayo. Kunana: “Kayatko dagiti kawes nga isusuot dagiti tattao 50 a tawen ti napalabasen.” Kasta unay ti pannakaudina iti uso? Nikaanoman. Nasursuro ni Rudy a nupay no ‘ti kasasaad iti lubong agbalbaliw,’ dagiti kangrunaan nga estilo mammano nga agbaliw. (1 Corinto 7:31) Ti paglinteganna ket: Dikay agkawes a tumulad iti nakaus-uso ta daytat’ agpasonton di agbayag! “Iti kastoy a pamay-an, kanayon nga agkaweskayo iti uso,” ibalakad ni Rudy.

Umanamong dagiti eksperto. Ti konsultant a ni Amelia Fatt, kas pangarigan, kunaenna a dagiti konserbatibo a tabas ket “nasaysayaat a pundaren.” Saanda a nalaka a mapukaw iti uso agsipud ta saan a naisangsangayan unay ti itsurada. Kas kanayonan a gunggona, nalaklaka a parisan dagiti konserbatibo nga estilo kadagiti dadduma a bambanag iti kawesyo.

Dadduma a moderno nga estilo ket di maitutop kadagiti Kristiano. Dadduma ket nasayaatda. Ipapantayon nga anamongan dagiti dadakkelyo, no makitayo a ti naestilo a kawes saan laeng a napintas kadakayo no di ket maibagay met kadagiti dadduma a kawesyo, mabalin nga usigenyo ti panangisuot iti dayta. Ngem agannadkayo ta saankay nga agbalin nga adipen iti uso! Napaliiw ti konsultant iti uso a ni Carole Jackson: “No sumurotkayo iti uso tapno ‘maawatkayo,’ uray no di maibagay kadakayo ti agdama nga uso, kuskusitenyo ti bagiyo met laeng.”

Addada pay dadduma a banag a pagimbagan iti konserbatibo iti panagkawkawes. Dadduma nga agtutubo a babbai makitada a daytoy upayenna ti seksual a panangriribuk idiay eskuelaan ken idiay pagtrabahuan. Kasta met, ti maysa nga agtutubo a mangisuot iti gagangay nga estilo mabalin nga ad-adda a matmatan dagiti dadduma a kas nataengan, natalged, ket saan a daydiay nalaka a maawis iti tunggal kita ti uso ken moda.

Ni Tammy, kas pangarigan, ket maysa nga agtutubo a babai nga agserserbi kas amin-tiempo nga ebanghelisador. Nupay no ti nakiting a saya ti agus-uso iti lugar a pagnanaedanna, kunana, “Para kaniak, ti saya a nababbaba bassit ngem ti tumeng ket komportable a kagayad.” Daytoy ket maitunos iti Nakristianuan a kinaemma. (1 Timoteo 2:9) Siempre, dagiti pagalagadan iti kinaemma ket agduduma iti intero a lubong. Ket no agduaduakayo no ania a kita iti estilo ti maitutop wenno saan, makisaritakayo iti maysa a naganak wenno iti maysa a natataengan a gayyem.

Nasirib a Panaggatang

“Babaen ti nasirib a pannakaiturong makigubatka,” ibalakad ti Biblia idiay Proverbio 20:18. Ti nasirib a pannakaiturong ket kasapulan uray pay kadagiti gagangay a bambanag a kas iti panaggatang. Kas pangarigan, marigatankay kadi nga agsapul kadagiti kawes a makaawis kadakayo? Makagun-odkayo iti nasirib a pannakaiturong babaen laeng ti ipapanyo iti maysa a libreria publiko ket mangaramidkayo iti panagsirarak! Addada dagiti liblibro ken artikulo a mabalin a makatulong kadakayo a mangusar kadagiti nadumaduma a tabas, kolor, ken estilo ti kawes a maibagay iti itsura ti rupa, kaatiddog ti tengngedyo, pigura, ken dadduma pay.

Ti ngay kalidad ti kawes a gatangenyo? Nupay ni Jesu-Kristo ket napanglaw iti namaterialan idi adda ditoy daga, nalawag a nangisuot iti kawes a nangato ti kalidadna ta naggiginnasanggasatan dagiti manangpapatayna no siasino ti mangala iti dayta! (Juan 19:23, 24) Umasping iti dayta, ikagumaantay met ti mangisuot kadagiti de kalidad a kawes, uray no bassit ti pundoyo ket masapul ti panagurnongyo sakbay ti igagatangyo. Di agbayag, ti nangingngina a kawes a mausaryo iti ad-adu a tawen mabalin a nalaklakanto ngem ti mabiit laeng a marunot a “baratilio.”

Kasano a masukayyo ti panangkita iti de kalidad? Padasenyo ti agsukimat kadagiti nangingngina a tiendaan nga agilaklako kadagiti de kalidad a kawes. Ammuenyo ti itsura ken ti panagrikna ti nasayaat a kawes. Kuna ti libro nga Elegance: “Dikay maawis iti nagan; ti kawes masapul a takderanna ti bagina met laeng . . . Ti nakapuy ti kalidadna, aniaman ti naganna, ket saan a baratilio.” Riknaenyo ti material. Sukimatenyo ti kuellio, lining, ken dagiti ohales. Kitaenyo no nalagda dagiti daitna.

Ni Mike (a nadakamat iti pangrugian) napataudna ti kinasigo a mangkita iti kalidad. Gapuna, nabigbigna a ti baratilio a bata de banio ket pudno a baratilio! Nupay kasta, “dikay maawis kadagiti ‘baratilio,’” ipakdaar ni Amelia Fatt. Ti saan a baratilio a sweater a mabalin nga iparis iti sumagmamano a kawesyo mabalin naus-usar ngem ti “baratilio” a sweater nga awan ti kaparisna. Kuna ti Proverbio 21:5: “Amin a naganat gumanat laeng nga agpanglaw.” Liklikanyo ti aggatang no agap-apurakayo. Aggatangkayo no saan a nakapuspusek dagiti tiendaan. Ammuenyo nga umuna no ania ti birbirukenyo. No ad-adda a pampanunotenyo ti kita ti tela, estilo, kolor, ken ti presio a kayatyo, mammano a maawiskayo a gumatang iti dikay pudno a kasapulan.

Dagiti klerk iti tiendaan mabalin a makatulongda iti dakkel no ibagayo dagiti espesipiko a kasapulanyo. (Kinapudnona, babaen iti tulong ti tindera a nabaelan ni Mike ti gimmatang ti maipaay kadagiti babbai a miembro ti pamiliana.) Ngem diyo palubosan nga allukoyendakay dagiti aglaklako tapno maisiasikay iti nasaysayaat a pangngeddengyo. “Ti nanengneng patienna ti amin a sao, ngem ti manakem a tao matmatanna a nalaing ti papananna.”​—Proverbio 14:15.

Agkaweskayo iti maitutop a kawes ken nasayaat ti itsurayo no mapankay aggatang. Kasano a maibagayo no ti maysa a jacket ket napintas no maisuot a maiparabaw iti maysa a T-shirt? Wenno kasano a maikeddengyo no ti maysa a terna wenno bado ket makaawis no nakasuotkayo iti sneakers? Maysa a mannurat kunana pay a no saan a nadalimanek ti panagkawkawesyo, dagiti agtagilako mabalin nga “ipagarupdakay a di nalaing nga agpili ken/wenno awan kuartana,” ket asikasuendan kadagiti dadduma a suki.

Kamaudiananna, mabalin a makitayo no dadduma a “nasaysayaat ti dua ngem ti agsolsolo” no aggatang. (Eclesiastes 4:9) Ti gayyem wenno naganak maibagana no ania ti itsura ti kawes iti likudanyo, no nakalawlawa, nakakipkipet, wenno iti dadduma a pamay-an saan a naemma.

Dagiti Napatpateg a Bambanag

Idiay Filipos 1:10, nabalakadan dagiti Kristiano a ‘siguraduenyo dagiti napatpateg a bambanag.’ Dagiti pudno a napatpateg a bambanag iti biag naisentroda iti pannakaammo iti Dios​—saan nga iti kawes. Nakalkaldaang a kunaen, a dadduma nga agtutubo nasayaat ti panagkawkawesda ngem nakapuyda a mangipaduyakyak iti pammatida iti publiko.

Gapuna nupay no nasayaat ti agbalin a nalaing a managgatang ken nasayaat ti itsurana kas ipalubos ti adda a gastuenyo, ikagumaanyo ti agbalin a nataengan a Kristiano. Agbiagkayo sigun iti dayta nga akem, ket ti panagkawes sigun iti dayta gagangay a sumarunonto.

[Ladawan iti panid 10]

Dagiti uso a kawes dagus nga agpaso ti estiloda. Dagiti konserbatibo nga estilo a maipaay iti nadumaduma nga okasion agpautda