Agimtuod Dagiti Agtutubo . . .

Kasano a Mapasayaatko Dagiti Kawesko?

MAUP-UPAY ni Robert! Masapul a dar-ayanna ti kasar ti kabsatna a babai ngem awanen ti isuotna. Saan met ketdi nga adda ni Robert iti awagan ti Biblia a “lamolamo a kasasaad.” (Santiago 2:15) Ngem di maitutop dagiti pang-inaldaw a kawes ni Robert iti daytoy a pormal nga okasion.

Nupay kasta, adda tallo a sosial a pasken a dar-ayan ni agtutubo nga Angela, a tunggal maysa ket agkasapulan iti naiduma nga estilo ti bestida. Saan a kas ken Robert, nupay kasta, isut’ di marigatan a mangsapul iti maitutop nga ikawesna. Saan met a nabaknang ni Angela. Nakaurnong la ngamin iti badbado a mangipalubos kenkuana nga agkawes iti natakneng iti nadumaduma a kasasaad.

Kinuna ti maysa nga artikulo iti magasin a Woman’s Day: “Napateg dagiti kawes. Adda dakkel a maitulongda tapno naimbag ti panagriknayo iti bagiyo.” Adda met dakkel a maaramidan ti ikawesyo iti wagas ti panangmatmat ken panangtrato ti dadduma kadakayo. Buyogen ti naimbag a rason, ngarud, nga iparegta ti Biblia a maarkosantayo iti “naimbag-pannakaurnosna a kawes, buyogen ti kinaemma ken kinasimbeng ti panunot.” (1 Timoteo 2:9) No maysakayo a Kristiano, napateg koma kadakayo ti kaadda ti maitutop a kawes.

Ngem, mabalin kadi nga agpapan iti kaadda ti maysa a kloset a napno iti lupot, no dadduma mariknayo nga awanen maisuotyo? Aniat’ problema, ken kasanoyo nga ilinteg dagiti bambanag?

Ti Nangina a Gatad ti Moda

Masansan a ti problema saan a kuarta no di ket ti ibunga ti pannakaadipen iti agbaliwbaliw nga estilo ken moda ti lubong. Kuna ti libro a Youthtrends a “maamiris ti lubong ti negosio no kasano kaadu ti kuarta a busbosento dagiti agtutubo iti kawes a nakaipanaganan ti mabigbigbig a diseniador.” Gapu ta inaagum a tarigagayanda ti kuarta, mangusar ti industria ti kawes iti makaallukoy a magasin ken anunsio iti TV a mangsulisog kadagiti agtutubo nga aggasto​—ken aggasto, ken aggasto! Gapu ta pabilgen dagiti kapatadanda, agkurri dayta nga estratehia! Isennaay ti maysa a maestro: “Dakkel ti gasgastuen ti tunggal maysa kadagiti kawes ket agtrabaho dagiti agtutubo a di makabael iti dayta . . . kalpasan ti panageskuelada tapno makagatangda laeng iti agdindinamag ti etiketana a pantalon.”

Dakkel a paggastuan ti panagpaadipen iti moda ket nalabit dikayto unayen makagatang kadagiti ad-adda ti kinapraktikalna a kawes a talaga a kasapulanyo. Mangted ngarud ti Roma 12:2 iti nasayaat a balakad no kunaenna: “Sumardengkayo a maisuksukog maitunos iti daytoy a sistema ti bambanag, no di ket mapagbalbaliwkayo babaen ti panangpabaroyo iti panunotyo.” Pudno, saan a kanayon a nalaka ti agbalin a naiduma. Bigbigen ti 16 ti tawenna a ni Charlene: “Dagiti ubbing idiay eskuelaan ibilangdaka nga ud-udong no dika agkawes a kas kadakuada.” Ngem no ipalubosyo ti dadduma nga isudat’ mangdiktar kadakayo, agbalinkay nga adipenda. (Idiligyo ti Roma 6:16.) Bigbigen ti maysa a balasang nga agnagan Johanna: “Masuronak ta mariknak a kaslattay kanayon nga agbisti-ak tapno adda maay-ayok.”

Kanayon kadi a nainsiriban daytoy? Usigenyo, kas pagarigan, ti estilo ti panagkawkawes dagiti agbabarkada iti kalsada, hip-hop, ken “grunge.” Adu ti agisuot iti kastoy nga estilo gapu la ngamin ta nalatakda. Ngem, gistay ipasimudaagda ti pungtot ken yaalsa. Ti kadi panagisuot kadakuada mangibunga iti dakes nga impresion maipapan kadakayo? (Juan 15:19; idiligyo ti 2 Corinto 6:4.) Aglalo ta no agkaweskayo a kas iti kameng ti maysa a barkada ti mabalin a pakapapatayanyo. Isu nga impariten ti dadduma nga eskuelaan idiay E.U. ti panagisuot iti estilo dagiti agbabarkada. Ti leksion? Saan unay a nainsiriban ti panangipalubosyo a dagiti kapatadanyo ti mangpili iti kawesyo, nangnangruna no iturayandan ti biagyo. Imbes a pakadanaganyo no anianto ti pakaay-aywanda, “itultuloyyo a siguraduen no ania ti makaay-ayo iti Apo”!​—Efeso 5:10.

Panangusig Kadagiti Kasapulanyo

Apaman a naruk-atanyon ti bagiyo iti kinaulpit ti uso ken moda, mairugiyon ti agurnong kadagiti kawes a mangpennek iti aktual a kasapulanyo. Kas pagarigan, kaaduan a tiempoyo ti mabusbos idiay eskuelaan. No kalikaguman ti eskuelaanyo nga agunipormekayo wenno surotenyo ti maysa a maanamongan a wagas ti panagkawkawes, limitadonto dagiti pagpilianyo. Ngem iti adu nga eskuelaan, maipalubos ti agpili, ket ti kadawyan a panagbisti ti maipalubos.

Iti kasta a kasasaad, mabalin a saan a nainsiriban a dakayo ti mangyuso iti maysa a jacket ken kurbata wenno nagarbo a palda. Kayatyo a kadawyan ti panagkawkawesyo a di met kasapulan nga agbalinkayo a sumursurot iti uso wenno ud-udong. Kasta ti inaramid ti balasang nga agnagan Millie. Idi ages-eskuela, liniklikanna dagiti nalabes a moda. No kasta met ti kasasaadyo, mabalin a kasapulanyo ti sumagmamano a kadawyan a pantalon, T-shirt, wenno blusa kas kawesyo. No narigat ti kuarta, mabalin nga umdasen ti kaadda ti sumagmamano kadagitoy.​—Idiligyo ti Lucas 10:42.

Mabalin a no kalalainganna laeng ti kaadu ti kawesyo a pang-eskuela, maaddaankayto iti umdas a kuarta a panggatang iti dadduma a kasapulan. Kas pagarigan, adda kadi trabahoyo iti ruar ti pagtaengan wenno trabaho idiay balay? Kasapulanyo ngarud ti dadduma a naandur, napaut a kawes. Mabalin a kasapulan met ti maitutop a kawes agpaay iti isports ken dadduma a panagay-ayam. Nupay mabalin nga uso ti mangisuot kadagiti nalatak a shorts, T-shirt, ken sapatos, masarakanyonto a dadduma a nalaka a kawes ket isu met laeng ti kinaandurda.

No maysakayo a Saksi ni Jehova, kayatyonto met nga usigen ti kasapulan nga isuotyo a kawes kadagiti Nakristianuan a gimong, tangay ti saan a disente a kawes ket di maitutop iti panagdayaw. Kadagiti lugar a ti Makinlaud nga estilo ti maisusuot, kadawyanna a mangisuot dagiti agtutubo a lallaki kadagiti pantalon a mayataday kadagiti pormal nga okasion, polo, kurbata, ken jacket. Kadawyanna a bestida wenno palda ken blusa ti isuot dagiti agtutubo a babbai. Dagiti umasping a bado ti maisusuot met iti trabaho a panangasaba iti binalaybalay. Ti kaadu ti magatangyo a kasta a kawes ket agpannurayto iti badyetyo. Naimbag ta di kasapulan nga adu ti kawesyo wenno kanayon a kabaruan a moda. Rumbeng a nanakman ken nadalusda.

Dinar-ayan ni Jesu-Kristo ti maysa a kasar, ket mabalin a maawiskay met a dumar-ay kadagiti sosial a pasken. (Juan 2:1, 2) No kadawyan ti panagbisti kadagita a pasken, nainsiriban ngarud ti maaddaan iti dadduma a maitutop a kawes. “Namin-adun nga addaak iti kasasaad a saan a maitutop ti kawesko iti okasion, ket talaga a saan a makaay-ayo daydi,” bigbigen ni Johanna. Ti panagikut iti uray maysa a disente a kawes ti mangiliklik kadakayo iti pannakapilit ken gastos ti naladaw a panaggatang.

Panagimbentario

Mabalin nga aramidenyo ti awagan ti mannurat a ni Jean Patton a panang-audit iti klosetyo. (Color to Color) Paglalasinenyo dagiti kawesyo, agraman dagiti naipempen. Mabalin a matakuatanyonto nga adda luplupot a nalipatanyon. Maigiddato, mabalin nga ikkatenyon dagiti nadakkelanyo wenno dagiti diyon kayat.

Sumaganad, mangaramidkayo iti listaan ti imbentario, nalabit urnosenyo dayta sigun kadagiti kangrunaan a lupot (amerikana, terno, bestida, blazer, jacket), mangsuporta a lupot (blusa, sweater, dress shirt), ken kanayonan a mausar (panuelo, sinturon, guantes, kallugong, sapatos, handbag, kurbata). Makatulong ti kasta a listaan tapno maanagyo no ania a bambanag ti mabalin a kasapulan tapno makompleto ti kawesyo.

Nainsiriban a Panaggatang

Iti dadduma a lugar, maysa a luho dagiti kabbaro a kawes. Ikagumaan dagiti agtutubo kadagita a lugar nga annadan dagiti kawesda ken taginayonen ida a nadalimanek ken nadalus. Kasano ngay, no kabaelanyo ti gumatang iti dadduma a kabbaro a kawes? Iti librona a Working Wardrobe, kuna ni Janet Wallach a “makamenos iti panawen ken kuarta ti maysa a babai no ginatangna dagiti kawesna buyogen iti plano ken panggep.” Pudno met dayta kadagiti agtutubo a lallaki. Mabalin a limitado ti badyetyo, isu a rumbeng a kuentaenyo ti gatad ti aniaman a gatangenyo. (Idiligyo ti Lucas 14:28.) Mabalin a kaipapanan dayta a kissayanyo ti nailista a gatangenyo, nga ipangpangrunayo dagiti kasapulan-unay a bambanag. Ti banag a napadasen isut’ panangigatang iti kaaduan a kuarta kadagiti kawes a masansan nga isuotyo.

Mamalakad ti The Better Business Bureau A to Z Buying Guide: “Urnosenyo ti kawkawesyo iti maysa a kangrunaan a grupo dagiti kolor, kas ti asul ken maris-dapo wenno maroon ken nangisit. Agpilikayo kadagiti kangrunaan a kawes kadagidiay a kolor, ken ireserba dagiti narangrang [ken] mangan-anay a kolor kadagiti T-shirt, blusa, ken accessories.” Agtalinaedto a manayon a moda dagiti neutral-kolorna a kawes. Babaen ti panagtalinaed kadagiti kangrunaan a kolor, nalaklaka a mapadas ken maparnuayyo ti kabbaro a kawes.

Kuna ti Proverbio 14:15: “Ti manakem a tao usigenna dagiti addangna,” ket makatulong ti kaadda ti umno a plano no gumatangkayo tapno maliklikanyo ti nangina nga ibunga ti di naiplano a panaggatang. “Kanayon a mangitugotak iti listaan ti gatangek no makitiendaak,” kuna ti maysa a balasang. Laglagipenyo met nga inton agangay, nasaysayaat ti gumatang iti lupot a nasayaat ti kalidadda, saan a ti kaaduda. Ti nasayaat-kalidadna a kawes ket agpaut iti adu a tawen. “Adda pay la dagiti sweaterko idi tin-edyerak pay laeng,” kuna ti maysa a babai. Nupay kasta, ti maysa nga agdindinamag nga etiketa dina kanayon nga ipanamnama ti kalidad, a kasayaatan a maammuan babaen ti naannad a panangsukimat iti lupot a mismo.a

Agbalinkay koma a konserbatibo no maipapan iti estilo. Ti klasiko a bestida wenno terno ti lalaki ket gistay kanayonto nga estilo. Nalaka nga aglaus dagiti kabaruanan nga estilo. Iti librona a Conservative Chic, insurat ni Amelia Fatt: “Nalaklaka nga iterno ti konserbatibo a kawes, nalaklaka a nayonan inton umay a tawen, nasaysayaat a gatangen.”

Diyo liplipatan nga adun a tawen ti kapadasan dagiti dadakkelyo iti panaggatang kadagiti kawes. Mabalin a naiduma dagiti kursonadayo ngem ad-adda nga agtunoskayo kadagiti kangrunaan ngem iti ipagpagarupyo. “Tinulongannak da nanang ken manangko nga agpili a naimbag kadagiti kawes,” malagip ni Angela. Babaen iti panawen ken anus, mabalinyonto met ti maaddaan iti maibagay, napaut a kawkawes. Nalabit diyonton kunaen ti, ‘Awanen ti isuotko!’

[Dagiti Footnote]

[Ladawan iti panid 19]

Mangaramidkay nga umuna iti imbentario dagiti addan a kawesyo