Agimtuod Dagiti Agtutubo . . .

Apay a Liklikak ti Okulto?

“NASINGEDAK unay idi ken lolok,” kuna ti balassitang, “ket idi natay, nagleddaangak unay. Kayatko idi a maammuan no mabalinkot’ makisarita manen kenkuana.” Iti kasta, inrugi ti balasitang ti nakinamin iti okulto.

Adda kabbaro a report a kunana “a di kumurang 200,000 nga ubbing ken agtutubo idiay Federal Republic of Germany ti nakapadasen ti nadumaduma a porma ti okulto.” Ti Japan aduan kadagiti amateur nga espiritista, a daddumat’ nalaing iti telepatia, dadduma iti hipnotismo, ket dadduma pay iti eksorsismo. Idiay Nigeria gagangayen ita dagiti ubbing iti primaria a manangkulam. Ket, nakalkaldaang unay, ta uray dagiti agtutubo a pinatanor dagiti Kristiano a nagannak ket, nalabit dida inranta, nagang-angawanda ti supernatural.

Apay nga interesado dagiti agtutubo iti okulto? Ket apay a napeggad unay ti pannakinamin iti dayta?

No Apay Makinaminda

Ti okultismo nainaig iti supernatural, panangsukimat iti lubong dagiti espiritu babaen iti astrolohia, panagbuyon, kulam, salamangka, ken umarngi kadagita. Ket apay nga adu nga agtutubo ti sigagagar a mangsirarak kadagita? Ni Dirk napalalot’ ayatna a makisarita iti natay a tatangna. Gapu ta mamati a mabaelanna daytoy no la ket ta patademenna dagiti mental a puersana, inyusuatna ti panagmennamenna ket pinadasna a garawen ti aniaman uray dina sagiden ida. Ti kasta a panagmennamenna, kunan Dirk, ti nangilukat kenkuana iti lubong dagiti espiritu!

Dadduma nga agtutubo kaamakdat’ masanguanan. Kayatdat’ mabalakadan maipapan kadagiti markada wenno ti pakiasawaandanto ket ipapanda a makatulong dagiti espiritu kadakuada. Ad-adda pay a makapadukot dayta panagrukbab a mismo ken Satanas! Aniat’ pangawis daytoy nakaal-alingget a relihion? “Kayatko ngamin ti maaddaan pannakabalin,” kuna ti agtutubo a Canadiano a pasurot ti Satanismo. “Adda nokuat’ bilegko a mangdangran kadagiti dadduma.”

Ngem, kaaduan a managsirarak mamatida a ti kangrunaan a rason a makinamin dagiti atutubo iti okultismo isut’ kinausiosoda. “Managpalutpotak unay idi,” impudnot’ maysa a balasang a nakinamin iti okulto. Kastoy met ti nakuna ti maysa a balasang: “Agduaduaak idi damo, ngem kunak, ‘Tapno mapadasak no ania a talaga ti riknana.’” Gapuna inakseptarna ti awis ti gayyemna a tabunuanda ti sesion nga okulto.

Gaput’ panagusioso, padasen dagiti agtutubo ti Ouija board wenno umarngi iti dayta babaen iti panangpaliiwda iti tignay ti sitatakder a baso. Kalpasanna bassit lat’ kurangna ket naigamerdan iti espiritismo babaen kadagiti bola a kristal, baraha a tarot, kuintas, bulong ti tsa, ken horoskopio. Dadduma payen ti umuman kadagiti propesional a mammalad wenno manggagamud. Ngem, adu a propesional ti rumsua a bugos. Kas ehemplo, tapno maparang-ay ni Alejandro dagiti markana, immuman iti manggagamud. Saan laeng a kimmapoy dagiti markana no di ket dakkel pay ti nagastosna. Ti kuartana nagbingayan ti bugos a manggagamud ken daydiay aginkukuna a gayyemna a nangirekomendar kenkuana.

Ngem, para kadagiti adu nga agtutubo, nakarkaro ngem iti pannakapukaw la ti kuartada ti resultat’ pannakibiangda iti espiritismo.

‘Nakaam-amak a Tuok’

“No ammok la koma” ti ebkas a kadawyan a mangngegan kadagidiay agbabbabawi gaput’ pannakaisagmakda iti supernatural. Kastat’ napaliiw ti Personality, a magasin ti Sud Africa. Kaaduanna iyasugda: “No diak la koma namatpati. . . . Nakaam-amak a tuok ti sinagrapko, dagiti timek, batibat, pangta, ken mental ken pisikal a tormentot’ inted kaniak dagiti dadduma a Satanista idi kayatkot’ umikay.”

Uray la a 24 porsiento kadagiti maestra a nasurbey idiay Alemania ti nakapaliiw kadagiti makapadukot nga impluensia ti okultismo kadagiti estudiante. Dadduma nga estudiante ti agpaspasuli, marigatanda nga agsursuro, agam-amakda, nagleddaangda, ken agannayasda a mangdangran iti bagida wenno kadagiti sabali. Ni Dirk masansan a di makaturog iti rabii. Malagipna: “Gaput’ butengko di la ket ta alaennak dagiti demonio, diak inkidem dagiti matak. Nagpigergerak tungal adda mangngegko.” Ti baro nga agnagan Michael kasta met a nagsagaba “ti puyat ta pinarigat dagiti demonio” kalpasan a nagtomar iti inresetada kenkuana. Dadduma a report imbagada ti nakamimminar a panagbaliw ti personalidad dagidiay nakinamin iti okulto. Adda balasang a kinigtotna ti inana idi imbagana nga iti masanguanan agbadonto iti nangisit (ti kolor a kayatna met a pangpinta iti kuartona) santo maturog iti silulukat a lungon!

Dagidiay Talaga nga Agnanaed iti Lubong dagiti Espiritu

Ibatad dagiti kasuratan a “dagiti natay . . .dida ammo ti aniaman.” (Eclesiastes 9:5) Ti lubong dagiti espiritu no kasta saan a lugar dagiti kararua dagiti minataytayo. Aniat’ makagapu, ngarud, iti kakasta a nakabutbuteng a kapadasan? Dagiti nadangkes a demonio! Sigun iti Biblia, rebelde nga anghel dagitoy, a pasurot ni Satanas a Diablo. (1 Pedro 3:19, 20; Apocalipsis 12:9) Nabayagdan nga uy-uyongan ken dangdangran dagiti tao.

Ti Lucas 9:42, kas ehemplo, saritaennat’ baro a nagunggan ti sairo ket “ti demonio . . . intublakna ket nakaro ti rigat” ti baro. Sadistikoda a talaga! Kasta met a ti Aramid 19:16 deskribirenna ti tao a nagunggan ti sairo a siraranggas a rinautna dagidiay pito a mangparuar komat’ sairona. Dagiti moderno nga aldaw a kapadasan ibatadda a di pulos, uray sangkabassit, binalbaliwan dagiti demonio ti naulpit nga aramidda.

Ti agtutubo a pagang-angawannat’ ESP, astrolohia, baraha a tarot, wenno aniaman a porma ti okulto lukluktanna ti ruangan nga agturong kadagiti nakabutbuteng a kapadasan! Kuna ti magasin a Personality: “Adda nagpapadaan ti kapadasan dagidiay nakasaritami [a nakinamin iti okulto] nga isut’ in-inut a pannakaigarangugongda iti sinasatanas nga ipo-ipo babaen kadagiti kalasugan a kasla nadayaw ti pamarangda.” Wen, ti okulto talaga nga agdan nga agturong ken Satanas ken kadagiti demonio!

‘Diro iti Natadem a Kutsilio’

Ti ngarud Linteg ti Dios kadagiti Israelita imparitna amin a kitat’ espiritismo, a kunana: “Awanto ti masarakan kenka . . . a maysa a mammuyon, mangal-alagad iti salamangka wenno agbiruk kadagiti signo wenno mammadles, wenno mangilabeg wenno asinoman a makiuman iti medium ti espiritu wenno propesional a mangipakta kadagiti pasamak wenno agimtuod kadagiti natay.”—Deuteronomio 18:10, 11.

Dagiti Kristiano idi immuna a siglo dinalusandat’ bagida iti aniaman a koneksion iti espiritismo, a dinadaelda amin a sinasairo a gargaretda. (Aramid 19:19) Dagiti agtutubo ita a tarigagayandat’ pannakigayyem ken Jehova kasta met nga idianda koma ti aniaman a nainaig iti okulto. Ramanenna dayta amin a pelikula, libro, komiks, ken poster nga adda espiritistiko a laokna. Uray ti musika a kursonadada masukimat koma. Dagiti metaliko a musika, kas pangarigan, ket naulit-ulit a nainaigda iti Satanismo.

Adda pagsasao dagiti taga Tibet: ‘Panunotem a mamindua sakbay a kanem ti diro nga itukonda iti natadem a kutsilio.’ No dilpatam ti diro a naipuligad iti kutsilio, nalabit maputed ta dilam! Kasta met, uray kasanot’ ayatmo a mangpalutpot iti supernatural, pumatay dayta. Gapuna idiam ti awisda kenka a makiraman wenno uray agpaliiw laeng iti sesion nga okulto. Daydiay kasla di mangan-ano nga ay-ayam a mangpagaraw iti baso itagadnaka iti kinapeggad ti demonismo. Wen, mabalin a kayatmot’ agusioso. Ngem sidaem kadi ti nabangles a karne tapno mapadasam no kasanot’ rikna ti masabidongan?

Ni Dirk (a nadakamat itay) nakaluk-at manipud okulto. Gaput’ panagadalna iti Biblia babaen iti tulong dagiti publikasion ti Watch Tower Society, naawatanna ti kinapudno maipapan iti natayen a tatangna, ket naadalna ti namnamat’ panagungar. (Salmo 146:4; Juan 5:28, 29) Daytoy a kinapudnot’ nangluk-at kenkuana manipud tarigagay a makisarita iti lubong dagiti espiritu. (Idiligyo ti Juan 8:32.) Ayan ni Dirk itan? Nakitimpuyogen kadagiti Saksi ni Jehova ket agtartrabaho iti maysa kadagiti pagimprentaan ti Watch Tower Society a kas ministro iti amin a tiempo.

Wen, ti Biblia penkenna dagiti ‘naespirituan a kasapulantayo.’ (Mateo 5:3) Ket inton agangay, ad-addanto a makapalaing daytoy ngem ti inkay panangpennek iti delikado a kinausioso baeten iti napeggad, makapapatay nga okulto.

[Ladawan iti panid 15]

Ti pannakinamin iti okulto mairugi babaen iti kasla di makadangran nga ay-ayam, a kas iti daytoy Ouija board