Manipud Managbasatayo

Panagpakuttong Agyamanak iti artikulo maipapan iti panagpakuttong. (Mayo 22, 1989) Idi napan nga Abril, ti dagsenko ket 80 kilos, 58-años, diabetiko a babai nga addaan iti nangato a presion. Malidlidayak iti kasta unay. Itattan 72 laengen ti dagsenko, basbasiten ti kasapulak nga insulin, ket nasayaaten ti presion ti darak. Awan metten ti nakaro a panaglidlidayko. Naaramidak daytoy babaen ti panangsiputko iti kanek nga asukar ken taba ken babaen iti pannagnak iti 5 kilometros iti binigat a mangbitbitak iti 454 gramos iti tunggal imak. Mabalin a nakakatkatawa ti itsurak bayat ti pannagnak, ngem nagballigiak iti sumagmamano a pannakidangadang, ket patiek nga agballigiak iti pannakidangadang. Maminsan manen, agyamanak kadakayo.

E. P., Canada

Trahedia iti Lockerbie Maseknanak maipapan kadagiti komentoyo maipapan iti Obispo iti Galloway iti artikulo maipapan iti didigra iti Lockerbie. (Hulio 22, 1989) Iti panangibagayo a ‘nakas-ang ti panagsao[na] iti Dios’ babaen ti panangsaludsodnat’ ‘Apay a pinalubosan ti Dios a mapasamak daytoy?’ di umiso ti panangirepresentaryo kenkuana.

A. W., Britain

Siuumiso ti panangipadamagmi kadagiti sasao ti obispo kas naadaw idiay “The New York Times” a Disiembre 26, 1988. Nanipud idin, nupay kasta, nakaawatkamin kadagiti naiprenta a kopia iti sermon ti obispo, ket agparang a dagiti sasaona ket aktual a nairanta a mangikallungogan iti kapanunotan dagiti dadduma, saan a ti bukodna a kapanunotan. Nupay kasta, dagiti sasao ti obispo ket naadawda a mangipakita nga isut’ saan a nangipaay iti naibatay-Biblia a sungbat iti dayta a saludsod, ket saanna met nga intudo ti namnama ti Biblia a maipaay kadagiti natay. (Juan 5:28, 29)—ED.

Panangilunod Ti artikulo nga “Agimtuod dagiti Agtutubo . . . Kasano a Malapdak ti Regget a Mangilunod?” simmangpet iti apag-isu a tiempo! (Setiembre 8, 1989) Babaen iti kaadda iti asawa a bumusor iti Kinakristiano, no dadduma ti laeng maaramidak isut’ panangmedmed iti dilak. Ti panangpanunot iti panangilunod ti nangtignay kaniak a makarikna iti panagbain ken di maikari iti panagayat iti Dios. Daytoy a nagsayaatan nga artikulo ti nangipaay kaniak iti panangiwanwan a kasapulak tapno malapdak ti pannakagargari a mangilunod.

C. D., Estados Unidos

Panangliklik iti Pannangrames Ti babai a naadaw iti artikuloyo (Agosto 22, 1989) kinunana a “naliklikanna ti panangrames gapu iti tulong ni Jehova.” Daytoy kadi kayatna a sawen a dagidiay a narames awananda iti tulong ti Dios? Apay a tulonganna ti maysa a tao ket saan ti sabali?

V. R., Estados Unidos

Saan nga ibagbaga ti Biblia a simimilagro a salakniban ti Dios dagiti tattaona manipud iti pannakadangran. Dagiti linlinteg ti Dios iti Israel ipamatmatda a ti panangrames mabalin a mapasamak kadagiti matalek nga ad-adipen ti Dios. (Deuteronomio 22:23-27) Nupay kasta, nangipaay ti Dios ti Nainkasuratan a panangiturong a mabalin nga agserbi a pakagunggonaantayo no iyaplikartayo dayta. Ket ti naibatay-Biblia a balakad maipapan iti panangliklik iti panangrames ket napaneknekan a maysa a salaknib para iti nadakamat a babai. Maitutop, isut’ nagyaman iti Dios a nangipaay itoy a makatulong nga impormasion.—ED.

Panagsigarilio Ti akkub a maipaay iti bilang maipapan iti “Mailaklako ni Patay” (Hulio 8, 1989) pudno nga inawisna ti atension dagiti tattao. Kankanayon a bisbisitaek ti maysa a baket a di agressat ti panagsigsigariliona. Iti adun a tawtawen isut’ addaan iti suskripsion nga Agriingkayo! ngem mammano a basaenna dagiti artikulo. Nabiit pay simmarungkarak kenkuana ket nadlawko a kamaudiananna makaangesakon iti pagtaenganna. Wen, padpadasenna nga isardeng ti panagsigarilio. Idi nakitana dayta a bilang, binasana nga interamente ket tarigagayannan ti agadal iti Biblia ken umay idiay Kingdom Hall. Agyamanak kadagiti makaawis a magasintayo!

C. P., Estados Unidos