Pagsidsiddaawan iti de Rosas
Umap-apuy a tumatayab! Kastat’ panangdeskribir dagiti Griego idi ugma iti phoenix, maysa a sarsarita a tumatayab a nangipatingga iti biagna iti apuy ket kalpasanna limtuad kadagiti dapo. Adu a siglon ti napalabas, ti nagan a phoenix ket naiyakar iti pudno a tumatayab, ti flamingo. Daytat’ agbiag sigun iti naganna a naim-imbag pay ngem ti panagbiag ti leyenda. Maysa nga arban dagiti tumatayab ket maysa a nakaskasdaaw a buyaen—napegges a panagtayab, panagikkis, “bumanesbes nga angin” a de rosas, nangisit, ken nalabaga a nangpunno iti langit.
Ket ti maysa laeng a flamingo nakaskasdaaw ti pannakadiseniona, manipud ulo agingga iti saka. Panunotenyo laengen ti sippit, maysa nga oblong, nakaluban a kahon, a nagkillo a nagsuek tapno maipada iti tukok ti libtong bayat ti panagsublisubli ti ulona nga agsapul iti taraon iti ababaw a danum. Iti uneg, ti sippit ket addaan kadagiti buok a manglapped kadagiti dadakkel a banag bayat ti panangsilona kadagiti babassit, makan nga algae ken dagiti kakasta a makan, bayat ti panangibomba ti dila iti danum a sumrek ken rummuar. Dagiti laeng balyena ti kasta met ti pannanganna, a sagatenda dagiti babassit a pasayan babaen iti organoda a baleen.
Ti tengnged ken saksaka ti flamingo ket, agbabagay, ti kaatiddogan iti aniaman a tumatayab. Ti flamingo mabalin nga agtayag iti nasurok a 1.8 metros. Ti kakasla poste a saksakana ket maibagay iti biag iti ababaw, naapgad a danaw. Daytat’ aginana pay a nakatakder iti danum, a natalged kadagiti mangkemmeg, ken iti di ipagpagarup a posision—nakatakder babaen iti maymaysa a saka! Kuna dagiti eksperto a ti maysa a flamingo agtakder babaen iti maymaysa a saka tapno painanaanna ti sabali. Maysa a naisangsangayan a pennet ti mamagbalin iti tumatayab a mangpatibker iti sakana a sititibker a di maisin, kas iti maysa a poste. Maysa a nagsayaatan a panangtimbeng ti makatulong met.
Dagiti environmentalista marigatanda a mangammo iti nagtaudan ti flamingo. Kadakuada, daytat’ no dadduma kas iti gantsa, no dadduma kas iti ticbabuy, ken kaskasdi no dadduma kas iti kannaway. Mabalin a kunatay pay a mangan a kas iti balyena ken maturog a kas iti nakatakder a pagsilawan. Ngem di masapul a marirotayo iti nagtaudanna. Ti laeng nalaing a Diseniador ti makaaramid iti kasta a pagsidsiddaawan.