Dagiti Paltog—Lubong nga Awanan Kadakuada

MANIPUD pangrugian iti natauan a historia, nagturongen ti tao iti kinaranggas iti pannakilangenna kadagiti padana a tao. Rimsua ti panangpapatay idi pinatay ni Cain ti kabsatna a ni Abel. Nagtultuloyen ti panangpapatay nanipud idi—kadagiti pamilia, kadagiti tribo, ken iti nagbaetan dagiti nasnasion. Bayat a bumilbileg dagiti armas, umad-adu dagiti biktima. Dagiti bato ken batuta sinukatanen dagiti gayang ken pana, isu a sinukatan dagiti paltog ken bomba. Ti pannakadadael dagiti ginasut nagbalinen a rinibo; itatta dagiti rinibo nagbalinen a minilion. Ket saan laeng a kadagiti panaggugubat no di ket bayat ti panawen ti kappia. Saan laeng a dagiti soldado no di ket dagiti pay pribado nga umili. Saan laeng a dagiti nataengan no di ket dagiti pay ubbing. Agpatingganto pay kadi ti iyaadu ti kinaranggas? No daytat’ agpannuray kadagiti tattao, nalidem ti panginanamaan.—2 Timoteo 3:1-5, 13.

Impadto ni Jesu-Kristo a daytoy ti tiempo iti itatakder dagiti nasnasion a maibusor kadagiti dadduma a nasion kadagiti nakaam-amak a gubgubat, a mangpukaw iti biag dagiti minilion. Dagiti saksakit ken ginggined adut’ papatayenna kadagiti adu a luglugar. Rugrugitan ti tao ti daga iti kasta unay ta ti kabaelanna a mangtaginayon iti biag a mismo ket agpegpeggad—adu a sientistat’ mangiyeb-ebkasen iti kasta a panagbuteng. Ngem ti panagayat ti tao iti kuarta ti mamagtultuloy kenkuana iti panangmulitna, ket agpatingganto laeng dayta inton makibiang a mismo ni Jehova a Dios “tapno iyegna ti panangdadael kadagidiay a mangdaddadael iti daga.”—Apocalipsis 11:18.

Adut’ manglais kadagita a pakdaar ket iti kasta tungpalenna ti sabali pay a paset iti naipadto a pagilasinan dagiti maudi nga al-aldaw: “Ngem ammuenyo daytoy nga umuna, a kadagiti kamaudianan nga al-aldaw umaydanto dagiti mananguy-uyaw agraman pananguy-uyong, a magnada kas mayannurot kadagiti derrepda met laeng ket kunkunada: ‘Sadino ti yan ti pannakaikari ti iyaayna? Ta nanipud idi naturog dagiti amma, dagiti isuamin a bambanag agtultuloyda a kas met la idi punganay ti pannakaparsua.’”—2 Pedro 3:3, 4.

Ngem daytoy a nangisit nga ulep a nangabbungot iti sangatauan mangipaay iti panginanamaan. Impadto ni Jesus nga iti kaaddana, addanto “rigat dagiti nasnasion, nga agdanagda gapu iti daranudor ti baybay ken dagiti dalluyon, ket dagiti tattao agkapuydanto gapu ti buteng ken danagda kadagiti maar-aramid nga umayto iti amin a mapagnaedan a daga.” Ngem imbagana met a daytat’ tiempo nga “itangadyo dagiti ul-uloyo ta ti pannakasubbotyo umasidegen.”—Lucas 21:25-28.

Agrigat dagiti nasnasion, nariribuk ti kaaduan a tattao, ket dagiti indibidual mabutengda kadagiti bambanag nga umayto iti rabaw ti daga, ngem daytat’ tiempo iti pannakaisalakan dagidiay agur-uray iti iyaay ti Pagarian ti Dios ken ti Sangaribo Tawen a Panagturay ni Kristo Jesus. Daytanto ti tiempo ti kaitungpalan iti kari ni Jehova a Dios a ‘baro a langlangit ken ti maysa a baro a daga a sadiay ti pagtaengan ti kinalinteg.’—2 Pedro 3:13.

Ket awanen dagiti paltog! Awanton ti kasapulan a maipaay iti gubat. “Pasardengenna dagiti gubat inggana iti ungto ti daga. Rungrungduenna ti bai ti pana ket gupdenna a mamimpinsan ti gayang; puuranna [dagiti luglugan a pakigubat, Rotherham] iti apuy.”—Mikias 4:4.

Awanto ti kasapulan nga agpaay iti personal a panangsalaknib. “Ngem agtugawto tunggal maysa a tao iti sirok ti kayona nga ubas ken iti sirok ti kayona nga higos, ket awanto ti mangpabuteng kadakuada ta ti ngiwat ni Jehova dagiti buybuyot sinaona.”—Salmo 46:9.

Dagiti laeng nalinteg, awan ti managdakdakes, nga addanto sadiay. “Ta ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes, magudasdanto ditoy daga; ket dagiti nagulib, maparutdanto kenkuana.” (Proverbio 2:21, 22) Kalpasanna “dagiti naemma tawidendanto ti daga, ket maay-ayatandanto iti kinaruay ti talna.”—Salmo 37:11.

Iti imatang ti Dios ti kinaranggas dadaelenna ti daga. Idi kaaldawan ni Noe “nadadael ti daga iti imatang ti pudno a Dios ket ti daga napno iti kinaranggas.” (Genesis 6:11-13) Gapuna, impatingga ni Jehova dayta a lubong babaen iti sangalubongan a Layus. Impadis ni Jesus ti panungpalan daytoy agdama a naranggas a lubong iti kaaddana iti panungpalan dayta a lubong idi ugma: “Ta kas kadagiti aldaw a kasanguanan ti layus, addada a mangmangan ken umin-inum, mangas-asawa ken makias-asawa agingga iti aldaw ti iseserrek ni Noe idi daong; ket dida naawatan agingga iti yaay ti layus, ket inyayusna ida amin, kastanto ti yaay ti Anak ti tao.”—Mateo 24:38, 39.

Kalpasanna tunggal maysa a sibibiag tungpalendanton ti Marcos 12:31: “Ayatem ti kaarubam a kas iti bagim.” Ken ti Isaias 11:9: “Didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken ni Jehova, a kas la kadagiti dandanum saknapanda ti baybay.” Ket matungpalto met iti dayta a baro a lubong iti kinalinteg ti nagloriaan a kasasaad a nadeskribir idiay Apocalipsis 21:1, 4: “Ket nakitak ti maysa a langit a baro ken ti maysa a daga a baro; ta daydi immuna a langit ken daydi immuna a daga napalabasdan, ket ti baybay awanen. Ket punasennanto ti amin a lulua kadagiti natada, ket awanton ni patay, ket awanto metten ti sasaibbek, wenno sangsangit, wenno rigrigat. Ta dagiti immuna a bambanag napalabasdan.” Pudno unay, awanton dagiti kagimongan dagiti tattao a madanagan gapu iti buteng kadagiti paltog!

Awan kadagitoy a malaglagip unay a panagbalbaliw a pakabendisionan ti tao ti iyeg dagiti rebulusionario agraman dagiti umap-apuy a paltogda a mangpaspasag iti kabusor. Imbes ketdi, dagitoy ket iyegto ni Jehova a Dios babaen iti Pagarianna iti sidong ni Kristo Jesus. Gapuna kunaen ti Isaias 9:6, 7: “Ta naiyanak ti maysa nga ubing kadatayo, maysa nga anak a lalaki ti naited kadatayo; ket ti panangituray maiparabawto iti abagana. Ket ti naganna magaladanto iti Nakaskasdaaw a Mammagbaga, Mannakabalin a Dios, Agnanayon nga Ama, Prinsipe ti Kappia. Ti idadakkel ti panangiturayna ken ti kappia awanto ti inggana, iti trono ni David ken iti pagarianna, tapno bangonenna ken salimetmetanna babaen iti kinahustisia ken kinalinteg manipud ita ken iti agnanayon. Ti regta ni Jehova dagiti buybuyot ti mangaramid iti daytoy.”