Artipisial nga Intelihensia—Maipada iti Igges
“MABALIN nga adun ti nangnangeganyo a sasao iti napalabas a tawen maipapan iti neural networks, parallel processors, multiprocessors ken dadduma pay a komersial ken akademiko a panangikagumaan a mangibangon kadagiti kompiuter a dandani kapada iti utek ti tao. Ngem ti banag a saanyo pay a nangnangegan isut’ maipapan iti no aniat’ pudno a kaipapanan daytoy a panangikagumaan wenno no ania ti pudno a maar-aramidan dagiti baro a teknolohia. Maysa a gayyem idiay kompania ti neural network ti nangibaga kaniak a no maipapan iti termino a ‘biomental’ evolution, dagiti produkto itatta mabalin a makisalisalda a naimbag iti kinalaing a maipada iti kinalaing iti maysa nga igges. Kinalaing laeng ti maysa nga igges, mabalin nga imtuodenyo? Wen, maysa laeng nga igges. Ti panangikagumaan a mangtulad kadagiti paglaingan ti utek ti tao sapulenna . . . bueno, ti utek ti tao.”—Computerworld, Pebrero 27, 1989, panid 21.
Ti utek makagun-od iti impormasion babaen kadagiti elektrokemikal a tignay. “Uray pay no dagita a tigtignay ket nakabambannayatda—agarup 30 metros ti tunggal segundo—dagitoy ad-adu pay laeng ti maaramidanda ngem dagiti elektrikal a tignay kadagiti metaliko a paglasatanda, isu a mabalin nga agbiahe iti agarup 0.3 metros iti tunggal nanosegundo wenno 300 milion metros iti tunggal segundo.” Maysa kadagiti nakaskasdaaw unay a unit iti kompiuter a magun-odan itatta ket addaan iti 65,536 a processors a mangtaming kadagiti impormasion ket ti kadakkelna kas iti kadakkel ti maysa a makina a paglaba, kaskasdi “ti utek iseksekna ti 150,000 a daras a kaadu dagiti processors iti bangabanga ti tao.” Ti kanginginaanen a kompiuter ket maysa nga autistic savant. Dayta makakalkular sigun iti kapartak ti panangipakanyo kadagiti numero iti dayta, ngem padasenyo a pangaramiden iti nainkalintegan a pangngeddeng ket dinan kabaelan dayta.
Ti artikulo iti Computerworld nagkonklusion: “Ti punto ket daytoy interamente nga arsisio ket basta ipakitana kadakayo no kasano ti karigat ti panangpadas a mangsukat iti utek ti tao iti aniaman nga arkitektura a hardware wenno software. Uray pay iti kasisimplean a kasasaad, ti utek pay laeng ti orihinal a kompiuter, ket amin dagiti modelo—aniaman ti pagrukodan a naaramidanda—ket tumultulad laeng a maudi iti kasta unay no idilig.”