“Ti Pangngeddeng Paaduenna ti Kalintegan Dagiti Pasiente”
”TI KALINTEGAN ti tao a mangtengngel iti bagina ket maysa a kapanunotan a nabayagen a binigbig ti gagangay a linteg,” kuna ni Mr. Justice Sydney Robins iti Court of Appeal iti Ontario, Canada. Ngem ania ti nanggargari itoy nga isyu iti damo?
Idi 1979 ni Mr. ken Mrs. Malette iti Quebec, Canada, nairamanda iti aksidente iti kotse a nangpapatay iti lalaki ken ti babai nadangran iti kasta unay ken awan puotna. Idi naipan iti ospital, nasarakan nga agaw-awit iti Medical Directive/Release Card, a nalawag nga agkedked iti panangyalison iti dara maigapu kadagiti espesipiko a narelihiusuan a rason. (Addada met dagiti peggad iti salun-at a mainaig iti panangyalison iti dara.) Ti doktor a nangagas kenkuana, gaput’ patienna a napeggad ti kasasaadna, dina inkankano dagidiay nga instruksion ket impaayanna ti dara. Kas banagna, ni Mrs. Malette indemandana ti doktor ken ti ospital gapu iti panangraut, panangdadael, ken panangidumduma iti relihion. Iti nakabistaanna a korte, isut’ naikkan iti $20,000. Nayapelan ti kaso iti kangatuan a korte iti Ontario, ti Court of Appeal.
Maysa kadagiti panagrason a naulit iti pangngeddeng ti Court of Appeal a pabor ken Mrs. Malette ket:
“Ti kalintegan nga agkedked iti panangagas ket naipakuyog iti kinatan-ok ti kalintegan ti pasiente iti bagina met laeng. . . . Kasano man ti kinasagrado ti biag, aminen ti awan idumdumana a komento ti kagimongan nga adda bambanag iti biag a napatpateg ngem ti biag a mismo. Ti kasta a natan-ok ken madaydayaw a pakatignayan nabayagen a naigamer iti kagimongan, dayta man ti patriotismo iti gubat, . . . panangsalaknib iti biag ti asawa, anak a lalaki wenno babai, . . . wenno ipapatay gapu iti relihion. Ti panagkedked iti panangagas gapu iti relihion ket kasta ti kapategna.”
Intuloy pay ti opinion ti Korte Suprema: “Aniaman ti opinion ti doktor, ti pasiente ti addaan ti maudi a keddeng no isut’ paagasan. . . . No ituloy ti doktor nga agasan nupay addan desision nga agkedked iti panangagas, isut’ makabasol iti di naipalubos a panagtignay . . . Saan a siwayawaya ti doktor a manglabsing iti immuna a bilin ti pasiente [kas iti Medical Directive/Release Card nga aw-awiten dagiti Saksi ni Jehova] ket saan met a siwayawaya a manglabsing iti bilin a naited iti tiempo ti emerhensia.” Innayon pay ti korte a “ti panangyalison iti maysa a Saksi ni Jehova iti sidong ti nalawag a bilin a maisupadi iti dayta . . . labsingenna ti kalinteganna a mangtengngel iti bagina met laeng ket ipakitana ti di panagraem iti pagalagadanna iti relihion isu a pinilina nga alagaden iti biagna.”
Ti hues iti panagapelar ngarud nangipaay iti nabileg a punto a maibusor iti doktor a nagkuna a ti kard awan ti pategna iti daytoy nga emerhensia. “Diak umanamong . . a ti kard dagiti Saksi ni Jehova ket maipadis laeng iti awan mamaayna a papel. . . . Ti bilin iti kard dagiti Saksi ni Jehova ipabaklayna ti pananglapped iti emerhensia a panangagas a mabalin nga ipaay ken Mrs. Malette ket lapdanna ti panangiyalison iti dara. . . . Ti naisurat a saona nalawag a nairanta a mangiyebkas iti pagayatanna no isut’ di makasao a mismo.”
Iti konklusionna ti hues nainkalintegan ti puntona a no dagiti Saksi agkedkedda iti panangyalison, “masapul nga awatenda ti banag ti desisionda. Didanto kunaen wenno dagiti annakda a ti kard dina imparangarang ti pudno a pagayatanna.”