Dagiti Kalakaan a Biktima ti Tabako

TI REPORT ti Siruhano Heneral idi 1989 ipamatmatna a no ub-ubing a mangrugi nga agsigarilio ti maysa a tao, ad-adda a matay iti kanser iti bara. “Dagiti managsigarilio a mangrugi kalpasan ti edad a 25 adda mamin-5 a daras a panagsakitda iti kanser ngem dagiti saan nga agsigarilio; dagiti managsigarilio a mangrugi iti nagbaetan ti edad a 20 ken 24 addaanda iti mamin-9 a daras a nangatngato. Dagiti managsigarilio a mangrugi iti nagbaetan ti 15 ken 19 adda mamin-14 a daras a nangatngato ket dagidiay mangrugi sakbay nga agedad iti 15 mamin-19 a daras a nangatngato ngem dagiti saan nga agsigarilio.”

Kadagiti adu a kaso ti panagsigarilio isu laeng ti pangrugian iti pannakaulaw iti droga. Dagiti agtutubo nga agedad iti nagbaetan ti 12 ken 17 nga agsigarilio ket nasarakan a mamin-10 a daras nga agusarto ti marihuana ken mamin-14 a daras a mabalin nga agusarto iti cocaine, hallucinogens, wenno heroin. Adu a panagadal ti mangipamatmat a nasurok a 90 porsiento kadagiti alkoholiko ken adikto ti heroin ti nakaro a mannigarilio.

Ti nabiit pay a panagsaludsod a Gallup ipakitana a 64 porsiento kadagiti tin-edyer ti mangayat a maparitan ti sigarilio kadagiti ub-ubing pay ngem 21 ket ti laeng dakkel a panangbusor kadagita a linlinteg iti lehislatura aggapu kadagiti nataengan nga adut’ mapaglakuanda iti sigarilio kadagiti agtutubo.”—Psychiatric, Mental Health, and Behavioral Medicine News Update, Marso-Abril 1990, panid 1.