Manipud Managbasatayo
Agsolsolo a Nagannak a Sangakabbalayan Inapresiarko iti kasta unay ti artikulo nga “Agimtuod dagiti Agtutubo . . . Normalakto Aya No Maymaysa ti Naganakko?” (Hulio 8, 1990) Pinanawannakami ni tatangko idi agtawenak laeng iti dua. Daytoy inapektaranna ti emosional a panagdakkelko. Nagbalinak a sobrat’ kinaalikutegna ket awan makagayyemko. Linapdak dagiti amin a rikriknak ket kamaudiananna naipanak iti maysa a sikiatria. Gapuna ti idadakkel iti agsolsolo a naganak a sangakabbalayan saan a nasayaat a kasasaad kadagiti amin nga agtutubo. Ngem ti panangawat ken ti pannakaawat dagiti pada a Kristiano, nangnangruna dagiti kapatadan, pabassitenna ti rigat a marikna dagiti dadduma a madandanagan nga agtutubo. Pudno a masapul a rummuarak tapno maaddaanak kadagita a gagayyem. Ket itan, babaen iti maysa a natimbeng nga eskediol a busbosek a kadua ni nanangko ken kadagiti kabbaro a nasarakak a gagayyem, diakon madanagan gapu ta “nadadael” ti pamiliak.
T. A., Estados Unidos
Uppat a tawenen a napalabas impatingga ti asawak ti panagasawami. Bayat ti panangbasak iti artikulo iti anakko a babai, kinunana: “Bueno, mariknak a normalak. Basta addaanak laeng kadagiti nagannak nga adda iti nagsina a balay!” Ti artikulo ti nangiparikna met kaniak a normalak kas agsolsolo a naganak, ta inikkatna kaniak ti panagdanag ken ti pannakabasol a marikriknak iti anakko.
J. C. P., Estados Unidos
Merienda a Karbohidrato Adtoy ti naisangsangayan a panagyaman iti bassit nga impormasion maipapan iti merienda a karbohidrato. (Hulio 22, 1990) Masansan nga isaganaak ti pamiliak iti putahe a pasta maipaay iti pangngaldaw. Mabannogak ket kasapulak ti aginana kalpasanna. Ita maawatakon no apay. Ti panangbalbaliw iti taraonmi pabassitennanto ti bannogko ket ad-adda a nakabalanak a maipaay iti ar-aramidko a panagebanghelio iti malem.
J. W., Pederal a Republika iti Alemania
Ecumenical nga Asamblea iti Europa Pagyamanan iti artikulo a “Naukomda iti Ngiwatda Met Laeng.” (Marso 22, 1990) Babaen iti panangaminda, dagiti relihion itatta naliwayanda ti tema ti Biblia ket saanda a nagpannuray iti Pagarian ti Dios. Pudno a makuna a ‘babaen kadagiti sasaoda nakondenarda.’—Mateo 12:37.
D. P., New Zealand
Rosario Ti ibagbagayo maipapan iti Rosario (Hunio 8, 1990) ket kagudua laeng iti kinapudno. Ti kaaduan a paset dagiti karkararag ket naibatay kadagiti estoria ti Biblia wenno direkta a naadaw iti Biblia. Ti panagrosario ngarud ket nasayaat a pangrugian iti naespirituan a biag. Addada dagiti positibo a resulta, kas iti talna ti isip ken kinaragsak iti daytoy lubong dagiti parparikut.
H. W., Italia
Ti panangusar iti Rosario ket ipatpateg unay dagiti adu a napasnek a Romano Katoliko. Nupay kasta, ti artikulomi naisentro iti isyu a no ti aramid ket makaay-ayo iti Dios wenno saan. Ket nupay no ti naimemoria a kararag mabalin a naglaon kadagiti Nainkasuratan a kapanunotan, laglagipenyo a ni Jesus a mismo ti nagkuna idiay Mateo 6:7, 8: “No agkararagkayo, dikay aramaten ti panangulit-ulit.”—ED.
Angkit Agyamanak iti artikulo maipapan iti angkit. (Marso 22, 1990) Maysaak a 16-años ket nagsagabaakon itoy a sakit dandani manipud iti pannakaipasngay. Diak pagaammo a ti emosional a rigat ken dadduma a taraon mabalin a gargarienna ti panagatake. Itan ikagumaakon nga aramiden ti balakadyo.
A. D., España
Makapainteres kaniak ti artikulo kas maysa a nakaro nga agangkit a naitarayen a dagus iti ospital iti namin-12 a daras iti tallo a bulan. Ibilangko idi ti angkitko a kas pasamak imbes a serioso a sakit. Ngem kalpasan ti panagsagabak iti namitlo a diak pannakaanges iti maymaysa a rabii, inkeddengkon ti kanayon a panagagasko. Diakon naospital iti tallo a tawen.
S. M., Australia