Managsugal a Lubong
DAGITI slot machines masansan a maawagandat’ maysa a naarmasan a bandido. Ngem saan a kas kadagiti pudno a bandido, dida puersaen nga alaen ti kuarta ti asinoman; agpipila ti tattao a kas karnero a malalatan babaen kadakuada.
Adda agarup 420,000 a kasta a makina sadi Federal a Republika ti Alemania, nga awan sardayna a mangib-ibus iti agarup $900,000,000 kadagiti Aleman iti tinawen. Lima a milion ti mangbusbusbos ti maysa nga oras a linawas a mangipispisok iti kuarta kadagiti makina; ti 80,000 a tattao busbosendat’ nasurok a lima nga oras tunggal lawas iti dayta.
Ti España iparammagnan ti 750,000 nga slot machines. Nagbalin a legal ti panagsugal sadiay idi 1977. Idi 1988, gumasgastosen dagiti Español iti $25,000,000,000 tunggal tawen iti amin a kita ti panagsugal. Naireport a, 200,000 nga Español ti naigamer iti panagsugal. Dagiti Italiano nangisugalda iti $12,000,000,000 idi 1989—wenno agarup $210 a doliar iti tunggal tao, agraman dagiti ubbing. Iti maysa a lawas idi 1990, nangbusbos dagiti Italiano iti $70 milion kadagiti pusta iti ay-ayam ti soccer.
Dagiti managsugal sadi Estados Unidos gimmastosda iti $200,000,000,000 tunggal tawen kadagiti laeng legal a panagsugal! Iti nabiit pay impangas ti presidente ti maysa a grupo dagiti casino: “Ti panagsugal isut’ kapapartakan ti irarang-ayna a pagsapulan iti pagilian, kas kadakkel ti badyet a tinawen [ti militaria ti E.U.].” Impabiangna ti panagduyos dagiti Americano iti sugal iti isu met laeng a “pilosopikal a rugso” ken kinapalungdo a sumango kadagiti risgo a nangiduron kadagiti managdiskobre ken dagiti tattao iti aw-away ti nasion iti napalabas. Ngem ti arapaap ti managsugal a giddato a kinabaknang ket adayo nga araraw manipud tawen ti ling-et ken rigat nga impaay dagiti managdiskobre kadagiti panagreggetda.
Ni Vicki Abt a sosiologo kunana: “Dagiti loteria ipaawatda a dagiti gunggona dida mainaig iti panagbannogyo.” Dayta a panagpampanunot nakaam-amak ti panangdangranda iti kalidad ti panagbiag. Ti utang, kinapanglaw, perdi nga ugalit’ panagtrabaho, nadadael a pampamilia—dagitoy dagiti nakalkaldaang a bunga ti panagsugal. Kadagiti minilion, a ti dumakdakkel a pasetna ket tin-edyer, ti panagsugal nagbalinen a di magawidan a panangpilit. Wen, umiso ti Biblia no kunana a “ti ayat ti kuarta isut’ ramut ti amin a klase ti makadangran a bambanag.”—1 Timoteo 6:10.