Kinarugit iti Musika
“DAGITI sagrado a mision dagiti banda a rock—tapno mangpasair kadagiti adu a nagannak—ket sumaksaknap a narigat nga annongen iti kultura a dumakdakes iti inaldaw,” kinuna ti nabiit pay nga editorial iti U.S.News & World Report. Binigbigna, nupay kasta, a dadduma a banda a rock sangsanguenda daytoy “karit no kasano a kigtoten ti awan riknanan” babaen ti panagusar kadagiti nakakatkatawa a bulgar a pagsasao—saan laeng nga iti musikada ngem uray pay kadagiti nagan a pilienda para iti bagbagida. Inreport ti editorial: “Ita addan ti di nakurkurang a 13 a banda a nainaganan kadagiti organo ti lalaki, 6 kadagiti organo ti babai, 4 iti isperma, 8 iti panangiregreg ken maysa iti impeksion iti organo ti babai.” Innayonna a natakkuatan ti maysa a surbey a di nakurkurang ngem sangapulo a banda nainagananda kadagiti “nadumaduma nga aramid iti sekso” ken innem iti bakkuar. Ipantayon, kaaduan kadagitoy a grupo adayoda manipud kangrunaan a pagannayasan, ngem marikna ti impluensiada.
Idiay Florida, E.U.A., ti pangukoman indeklarana a naalas ti maysa nga album ti grupo rock a 2 Live Crew a, sigun ti maysa kadagiti kritikona, naglaon ti “87 a panangiladawan ti oral a sekso, ti 116 dakamatenna ti organo ti lalaki ken babai ken dadduma a lirikal a sasao mangtuktukoy ti panagparuar ti lalaki.” Ti desision ti pangukoman ket naapelar kalpasanna ken nabaliktad. Nupay kasta, ti akinkukua iti maysa a paglakuan ti rekord ket naaresto ken nasarakan a nagbasol ket namulta iti $1,000 iti pammabasol a kinarugit gaput’ panangilako iti album. Pinanggep dagiti abogadona nga iyapelar ti kaso.
Saan nga amin ket nasair babaen iti daytoy narungsot nga idadarup ti kinarugit, nupay kasta. Idiay The Olympian, a pagiwarnakan ti Washington State, E.U.A., maysa a manangadal impagpannakkelna ti konsierto ti maysa a popular a banda a heavy-metal. Kinunana a ti grupo ‘mabalin a nakaipasdek koma ti maysa a rekord’ babaen panagusar ti naalas, sao ti seksual a kinarugit “a nasursurok ngem 200 a daras bayat dagiti komentona iti nagbabaetan dagiti kanta. Immanamong ti bunggoy. Daytat’ maysa a rabii ti kinarugit, rock ’n’ roll ken iti wagas ti America, ket ti bunggoy naragsakda.” Ti grupo, ginupgopna, “ket nakadaydayag.”
Ti estandarte ti dadduma kadagiti musika ken kritiko itatta ket naigiddiat unay manipud nainsiriban a balakad ti Biblia: “Awan naalas a pagsasao a lumabas koma kadagita bibigyo.” (Efeso 4:29, The New English Bible) Dagiti managayat ti musika, agpadpada dagiti ubbing ken lallakay, naimbag a dida ipastrek ti kasta a kinarugit kadagiti lapayagda.