“Tattao iti Usok”
DAGITI nalam-ek a winter. Maysa a 1,100 a kilometro nga agsisilpo nga usok a nabarbara ngem iti siudad iti ruar. Ti umad-adu a populasion dagiti awan pagtaenganna a tattao—75,000 kadakuada, babaen ti maysa a pattapatta. Iti Siudad ti Nueva York, E.U.A., nagtitipon dagitoy tallo a banag tapno mangpataud iti makariribuk a gagangayen iti siudad: dagiti agnanaed iti tunel, wenno “tattao iti usok,” kas ti panangawag ti dadduma kadakuada. Kadagiti akikid a pagnaan ken agdan, kadagiti napagtalawan a bodega, tunel, ken dadduma pay a nabaybay-an a sulsuli dagitoy adu a pagnaan, nangipasdekda kadagiti babassit a pagtaenganda. Iti maysa kadagiti nabayagen a di maus-usar nga usok ti riles ti tren sadi Manhattan, adu kadakuada ti immakar kadagiti napagpanawan a konkreto a kuarto, sulsuli, ken beranda. Sumagmamano ti nangibangon pay iti babassit a kalapaw iti usok.
Nupay kasta, ti biag iti usok ket narigat. Dagiti utot a kas kadakkel ti pusa agdakiwasda iti kasipngetan. Iti tunggal tawen dinosdosena a tattao ti patpatayen dagiti tren a gumluong a lumasat kadagiti usok ken babaen iti maikatlo a riles a de koriente. Rondaen a regular dagiti polis dagiti pagnaan tapno abugen dagiti walang. Dagiti trabahador ti transit sumarunoda, a rakrakenda dagiti temporario a pagianan. Rabsutenda dagiti tugaw ken karpet, radio ken telebision, ken kuskusenda pay dagiti wallpaper kadagiti bakud kadagiti sumagmamano a paglemlemmengan iti usok.
Kalpasan a nakapanawen dagiti polis, agsubli manen dagiti awanan pagtaengan. Kas ti kinuna ti maysa nga opisial ti polis iti The New York Times, amin dagiti panagbannogda a mangpapanaw kadagiti awanan pagtaengan pagakarenna laeng ida iti apagbiit iti uneg ti sistema ti usok. “Daytoy ti apagapaman a solusion,” kastat’ panangikunana. Ngem ti kinaawan pagtaengan ket di pulos apagapaman a problema. Sigun iti maysa a pattapatta, agarup dua a milion ti awanan pagtengan idiay Estados Unidos laeng. Iti maysa laeng a tawen, ngumato ti ranggoda iti nakadidillaw a 18 porsiento. Nalawag, kasapulan ti agpaut a solusion. Daytat’ inkari ti Namarsua iti sangatauan idiay Biblia—maysa a panawen inton tunggal maysa ditoy daga mabalinnanton ti mangbangon ti bukodna a balay ket agtaeng iti dayta, a tagiragsakennat’ biag a siwayawaya manipud nakaam-amak a kaadda ti kinapanglaw ken kinaawan pagtaengan.—Isaias 65:21-23.