“Basta Aramidem Dayta”

Babaen ti koresponsal ti Agriingkayo! idiay Colombia

MAYSA nga agasawa manipud Missouri idiay Estados Unidos ilawlawagda: “Damo a nangngegmi ti maipapan iti International Volunteer Construction Worker Program idi kalgaw iti 1988 idi dadduma a gagayyem nagsublida manipud iti maysa nga asainmen idiay sanga nga opisina iti Watch Tower Society idiay Honduras, Central America. ‘Basta aramidem dayta!’ kinunada, a maragragsakanda unay.”

Ti programa iti panagbangon a nadakamat isut’ maysa a pinataud dagiti Saksi ni Jehova a maipaay iti pannakaibangon dagiti sanga nga opisinada iti aglawlaw ti lubong. Tapno makakualipikar maipaay iti dayta, dagiti mainanama a kamkameng masapul nga umuna nga agtrabahoda idiay hedkuarter ti Watch Tower Society idiay Brooklyn, Nueva York, a sadiay mabalin a matingiting dagiti ug-ugalida iti panagtrabaho ken dagiti abilidadda. Gapuna ti asawa a lalaki manipud iti Missouri nakiuman iti opisina ti Sosiedad idiay Brooklyn ket nagboluntario a nagtrabaho sadiay iti temporario.

Bayat ti kaaddana idiay hedkuarter ti Brooklyn, ti asawa a lalaki nagpirma nga agtrabaho iti sabali a pagilian. Kalpasanna, idi nagsublin idiay Missouri, isu ken ti asawana rinugiandan ti nagurnong a maipaay iti mainanama a panagbiaheda. Sumagmamano a bulan kamaudiananna dimtengen ti surat a naglaon iti destinoda. Mapanda idiay Colombia, Sud America!

Nanipud 1987 agingga iti 1990, nasuroken a sangaribo a temporario a boluntario a trabahador ti nanggastos iti pasaheda a napan iti Colombia tapno busbosenda ti dua a lawas agingga iti dua a bulan a tumulong iti panagbangon iti dakkel a baro a pagimprentaan a sanga dagiti Saksi ni Jehova sadiay. Mainayon pay, agarup 80 a dadduma a boluntario manipud nadumaduma a pagilian ti nangbusbos iti nasurok a makatawen nga agtartrabaho iti daytoy a proyekto idiay Colombia. Dadduma kadagitoy ti short-term ken long-term a trabahador ket timmulongda idin iti panagbangon iti baro a pasilidad ti sanga kadagiti pagpagilian a kas iti Nigeria, ti Filipinas, Guyana, El Salvador, Guatemala, Costa Rica, Peru, ken Ecuador.

Dagiti boluntario a trabahador a simmangpet idiay Colombia ti tinulongan ti mangsangaili kadakuada a lumasat iti imigrasion ken aduana. Kalpasanna alaen ida ti kotse nga ipan idiay lugar a pagbangonan idiay Facatativá, agarup 50 kilometros iti amianan a laud iti Bogotá.

Pannakaiyam-ammo

Maipaay iti gagangay a kassangpet, ti umuna nga aldaw iti proyekto iramanna ti maysa a panagpasiar iti pasilidad ken dagiti instruksion maipapan iti panagbiag kas paset iti kameng nga agbangon. Kaaduan kadagiti trabahador ti international construction—kadagiti nabiit pay a tawtawen addada manipud 40 agingga iti 60 iti aniaman a naikeddeng a tiempo—agnaedda kadagiti pagtaengan a pasilidad a nagatang iti asideg ti pagbangonan.

Ti baro a trabahador iti konstruksion makaawat kadagiti instruksion maipapan iti iskediol iti trabaho, iti itatabuno kadagiti Nakristianuan a gimgimong, iti pannakiraman iti trabaho a panangasaba iti ngudot’ lawas, ken iti umiso a panangaywan iti pagnanaedanda. Maipaay met ti impormasion maipapan iti serbisio ti panaglaba, agraman ti pannakipaset iti programa iti agsapa a panagsasarita iti Biblia ken dagiti mainaig a bambanag.

Dagiti naipaay a kukuarto nanam-ayda, napudot dagiti taraon ken makapasalun-at, ket ti palabaan nasapa ti panagsublina, nalabaan ken naplantsa. Uray pay ti pannakaagas magun-odan no kasapulan. Awan ti mabaybay-an tapno pagbalinen a makaay-ayo dagiti bambanag no mabalin para kadagiti boluntario a trabahador.

Gagangay a masdaaw dagitoy a kabbaro a simmangpet a makasarak a ti proyekto a panagbangon ket dakdakkel ngem ti inanamaenda. Iti maysa a pagsalogan nga agturong iti nauneg a kankanayon a nalasbang a kabakiran iti bantay iti likudan, adda kankanayon a trabaho iti dua a lima a grado a patakder a pagtaengan. Daytoy kamaudiananna ti pagtaenganto ti agingga iti 250 a kamkameng iti sanga idiay Colombia, a maawagan iti pamilia ti Bethel. Iti napalabas a bulbulan, nakita dagiti kabbaro a simmangpet dagiti trabahador nga agikabkabil kadagiti tubtubo, barot, ken steel-stud maipaay iti diding.

Ti kuarto a panganan, nga 400 ti sikokomportable a makatugaw, ket napnapno kadagiti 600 wenno ad-adu pay iti ngudot’ lawas no adu dagiti lokal a boluntario a trabahador a mangan iti estilo ti kapeteria. Malaksid kadagiti maudi a maikabil a bambanag, naturposen ti kuarto a panganan.

Iti dakkel a dua-grado a paktoria a patakder, ti Shipping Department ken ti Job Press Department immakardan. Bayat a lumasat dagiti kabbaro a simmangpet iti maikadua a grado iti paktoria, ti mangipaspasiar sipapannakkel nga itudona ti baro a Hantscho a rotary offset a pagimprenta. Sumagmamano a kamkameng iti pagimprentaan idiay Brooklyn ti nangaywan iti pannakaibangonna, isu a tinulongan dagiti dadduma a boluntario.

Daytoy a tengtenglen ti kompiuter—a 65 tonelada ken 27 metros kaatiddogna a pagimprenta—isut’ maysa kadagiti kasayaatan a magun-odanen itatta. Daytat’ mangpatpatauden iti 38,000 a kopia iti maysa nga oras iti Español nga edision iti magasin a Pagwanawanan ken Agriingkayo! a maiwaras iti intero nga amianan a laud iti Sud America. Nasurok a 155,000 a Saksi ni Jehova idiay Colombia, Venezuela, Panama, Ecuador, ken Peru ti nabiit pay nga umaw-awat kadagiti magasinda manipud itoy a pagimprentaan—amin iti naan-anay a kolor.

Lokal a Tulong

Adu a boluntario idiay Colombia ti adda met iti proyekto iti panagbangon, agpadpada dagiti lallaki ken babbai. Maipagpannakkelda nga agtartrabahoda iti baro a sangada, kas kunaenda. Dadduma kadagitoy agnaedda kadagiti temporario a balay iti asideg ti pagbangonan, ket dadduma ti agbiahe a kanayon manipud Bogotá ken kadagiti dadduma nga asideg nga il-ili. Iti ngudot’ lawas ken bakasion, umay ti kanayonan a 50 agingga iti 150 a boluntario a trabahador, nga agsisinnublat, manipud iti agarup sangagasut a kongregasion dagiti Saksi ni Jehova idiay Bogotá ken dagiti kabangibangna.

Maysa a boluntario a trabahador iti konstruksion manipud Canada, a nakapadas iti panangibangon iti steel-stud ken ti drywall, kunana: “Magagaran dagiti lokal a kakabsat ditoy nga agsuro, ket ti kalidad ti trabahoda ket kas iti kasayaat, no di nasaysayaat pay, ngem ti makitayo iti komersial a proyekto idiay lugarmi.”

Maysa a trabahador a mangay-aywan iti heavy equipment ken ti panagkali iti daga nanipud pay idi 1987 inayonna pay: “Addaantay iti nagsayaatan a grupo dagiti lallaki, agraman ti adu a lokal a kakabsat, nga agtartrabaho a kaduatayo. Dadduma kadagitoy ti dandani di pay makaammo nga agmaneho iti kotse idi, ngem nagbalinda a nagsayaatan nga opereytor dagiti alikamen.”

Adu nga agtutubo a taga Colombia a regular nga agtartrabahon iti proyekto ti nangaramiden iti aplikasion maipaay iti permanente a panagserbi iti pamilia ti Bethel, isu a dumakkelton. Dadduma ti agsubli iti amin-tiempo a panangasaba idiay Colombia. Amin dagitoy dakkel ti nainayonda iti naespirituan a bilegda babaen iti panagserbida kas boluntario a trabahador iti konstruksion ditoy iti daytoy a kasasaad ti pamilia ti Bethel.

Makagunggona a Trabaho

Rinibribo a nakipaset iti International Volunteer Construction Workers Program ti nakapaneknek a dayta ti tampok ti biagda. “Daytat’ naisangsangayan,” kinuna ti maysa a trabahador manipud Mississippi, E.U.A., maipapan iti proyekto ti Colombia. “Dagiti tattao ti nangaramid iti dayta a naisangsangayan. Pagay-ayatko ti mangaramid iti dayta iti amin a tiempo no mabalin dayta. Makaibangonka kadagiti patakder iti sadinoman, ngem ti panagtrabaho a kadua dagiti kakabsat ti mamagbalin a naiduma.” Ti inaldaw a pannakilangen kadagiti Kristiano a mangipakpakita kadagiti bungbunga iti espiritu ni Jehova ket naiduma unay manipud iti panagtrabaho iti sekular a lubong!

Ti panagawid para kadagiti temporario a trabahador gagangay a dumteng a nakabibiit. Adda dagiti panaginnungngo ken adu a lulua. Anian a masansan a mangngegan dagiti sasao ti panagsisina a: “Tarigagayanmi a mabaybayagkay pay koma.” “Kayatmi koma ti agtalinaed pay!” Amin pumanawda a buyogen ti ad-adda a panangapresiar iti internasional a panagkakabsat dagiti Saksi ni Jehova. Naramananda ti kasasaad ti panagbiagto ken panagtrabaho a sangsangkamaysa iti masanguanan, a mangpalawa iti Paraiso agingga iti ungto ti daga.

Tunggal maysa, siempre, di mabalin a makipaset iti daytoy nga internasional a programa ti panagbangon. Ngem para kadagidiay nga ipalubos ti kasasaadda, maysa a dakkel a baro ken nakaay-ayat a gundaway ti nalukatan babaen iti International Volunteer Construction Worker Program.