Baro a Banag iti Internasional a Panagbangon

ADU ti masmasdaawan iti proyekto ti panagbangon kas iti piramid iti Egipto ken ti Great Wall iti China. Dagiti moderno a 400 metros nga skycrapers makakayawda met. Kaskasdi, dagiti pamay-an iti sabali a programa iti panagbangon ket makapasiddaaw met.

Dagiti boluntario ibangonda dagiti dinosena a dadakkel a proyekto iti sangalubongan. Kaaduan kadagitoy a boluntario ket manipud kadagiti pagilian a sadiay ti pakaibangbangonan dagiti patakder. Ngem yantangay masansan a kasapulan ti kanayonan a tulong, dagiti trabahador manipud kadagiti dadduma a pagilian binusbosda ti minilion a doliar a bukodda a kuarta tapno pasaheanda ti bagida a mapan iti adayu a lugar a pagibangonan. Adu kadagiti boluntario isakripisioda ti bakasion iti trabahoda; daddumat’ mangala kadagiti mapalubosan a kaawan iti trabaho manipud iti regular a pagtrabahuanda ket iti kasta baybay-anda ti adu a masapulan.

Daytoy a nakaskasdaaw a panangikagumaan a tumulong ket maysa nga internasional a boluntario a programa iti panagbangon a maiyurnos manipud iti hedkuarter dagiti Saksi ni Jehova idiay Brooklyn, Nueva York. Nanipud idi nangrugi daytoy a programa iti panagbangon idi 1985, nasurok a 3,000 a tattao ti nangpasahen iti bagbagida a napan kadagiti nasurok a 30 a lugar ti pagtrabahuan idiay Norte ken Sud America, Australia, Africa, Europa, ken kadagiti nadumaduma nga isla.

Ita agdama, agarup 600 nga internasional a boluntario ti agtartrabaho iti agarup 25 a pagpagilian. Nasurok nga 400 kadakuada ti napaut (long-term) ti destinoda iti uneg ti maysa wenno ad-adu pay a tawen, ket maawagan dagitoy iti “Internasional nga Ad-adipen.” Dagiti dadduma ti maikabil iti destino a short-term manipud iti dua a lawas agingga iti tallo a bulan.

Apay nga iboluntario dagiti trabahador dagiti paglaingan ken bannogda nga awan ti bayadna? Ania ti ibilangda a kasta unay ti kinapategna ta mangaramidda kadagitoy a personal a sakripisio?

Tapno Tungpalenna ti Padto ti Biblia

Ti rason iti nakaskasdaaw a sungbat iti internasional a programa ket masarakan iti sungbat iti maysa a saludsod. Nasurok a 1,900 a tawenen a napalabas, dagiti apostol ni Jesu-Kristo nagimtuodda kenkuana: “Anianto ti pagilasinan ti kaaddam ken ti panungpalan iti sistema dagiti bambanag?” Kalpasan ti panangdeskribirna kadagiti bambanag a kas iti nasaknap a gubgubat, panagkurang ti taraon, angol, ken ginggined, kinuna ni Jesus: “Daytoy naimbag a damag ti pagarian maikaskasabanto iti amin a mapagnaedan a daga agpaay a pammaneknek iti amin a nasion; ket kalpasanna umayton ti panungpalan.”—Mateo 24:3, 14.

Makumbinsir dagiti boluntario a trabahador nga itan ti tiempo a matungtungpal ti padto ni Jesus. Gapuna maragsakanda a mangaramid iti aniaman a pakaparang-ayan iti pannakaiwaragawag ti Pagarian sakbay a dumteng ti panungpalan daytoy a sistema. Daytoy nga internasional a programa ti panagbangon nairugi a mangurnos iti panangikagumaan dagita a tattao nga agbangon kadagiti pasilidades a mangiprenta ken mangiwaras iti mensahe ti Pagarian.

Irarang-ay ti Trabaho iti Pagarian

Idi napan a tawen 678,509,507 a magasin a Pagwanawanan ken Agriingkayo!, isu a mangiparang iti Pagarian ti Dios a kas ti kakaisuna a namnama ti sangatauan, ti naiprenta kadagiti pasilidades a papaandaren dagiti Saksi ni Jehova. Kayat a sawen dayta a nasurok a dua a milion a magasin—kas ti basbasaenyo—ti rumrummuar kadagiti pagimprentaan iti inaldaw! Mainayon pay, tinawen pinulpullo a milion a Biblia, liblibro, polieto, ken broshur ti maiprenta ken maiwaras.

Ti kadadakkelan a pagimprentaan addada idiay internasional a hedkuarter dagiti Saksi ni Jehova idiay Brooklyn, Nueva York, ken iti makin-amianan nga estado iti asideg ti Wallkill, Nueva York. Nupay kasta, bayat ti 1950’s ken 1960’s adu a pagimprentaan ti naibangon met iti ruar ti Estados Unidos. Gapuna, idi 1970 Ti Pagwanawanan ken Agriingkayo! mapatpataudda kadagiti pasilidades a papaandaren dagiti Saksi ni Jehova idiay Alemania, Sud Africa, Canada, Inglatera, Switzerland, Denmark, Sweden, Finland, ken Francia.

Kalpasanna, idi 1972 ken 1973, dagiti magasin nangrugida a mapataud metten kadagiti pagimprentaan dagiti Saksi ni Jehova iti innem pay a pagilian: ti Japan, Brazil, Australia, Ghana, Nigeria, ken ti Filipinas. Iti sumaganad a tawtawen, bayat a dumakdakkel ti trabaho, nangrugi ti panagbangon kadagiti baro a sanga nga opisina nga addaan iti ad-adu pay a kabaelan nga agiprenta. Tapno mangipaay iti pangripiripan iti napartak nga irarang-ay, usigenyo dagiti patpatakder ti sanga nga addaan kadagiti kabbaro a pagiprentaan Ti Pagwanawanan ken Agriingkayo! a naidedikar kadagiti sumaganad a petsa:

Grecia, Enero 16, 1979; Sweden, Disiembre 23, 1980; Brazil, Marso 21, 1981; Canada, Oktubre 10, 1981; Italia, Abril 24, 1982; Republika iti Korea, Mayo 8, 1982; Japan, Mayo 15, 1982; Australia, Marso 19, 1983; Denmark, Mayo 21, 1983; España, Oktubre 9, 1983; ti Netherlands, Oktubre 29, 1983; Alemania, Abril 21, 1984; India, Enero 20, 1985; ken Sud Africa, Marso 21, 1987.

Kasta met, addada dagiti dedikasion iti baro a sanga nga opisina wenno dagiti nainayon kadagiti datin a kas idiay Côte d’Ivoire, Pebrero 27, 1982; Tahiti, Abril 15, 1983; Inglatera, Oktubre 2, 1983; Finland, Mayo 5, 1984; Norway, Mayo 19, 1984; Martinique, Agosto 22, 1984; Peru, Enero 27, 1985; Mexico, Abril 13, 1985; Venezuela, Abril 21, 1985; ken Francia, Mayo 4, 1985.

Nupay dadduma iti trabaho a panagbangon kadagiti sumagmamano a sanga ket maaramid babaen ti panangsueldo kadagiti di-Saksi a propesional, kaaduanna a dagiti Saksi a mismo ti mangaramid iti kaaduan a trabaho. Rinibribo dagiti agiboluntario iti serbisioda, uray pay no adu kadakuada ti saan a nasigo iti trabaho a panagbangon.

Bayat ti irarang-ay ti panangikasaba dagiti Saksi ni Jehova iti pagarian, kasapulan dagiti daddadakkel a pasilidad. Kasano a maibangon dagitoy nga addaan iti kinalaing?

Ti Baro a Programa Punuanna ti Pakasapulan

Tapno maorganisar ti tulong iti kasta unay nga iyaadu daytoy nga internasional a trabaho a panagbangon, napanunot ken napataud ti naisangsangayan a programa iti boluntario a trabaho. “Bayat ti proyekto ti panagbangon, dagiti partikular a kasapulan a kinasigo ti kasapulan iti partikular a tiempo,” inlawlawag ti maysa a manangaywan iti programa. “Dika kasapulan ti agilatag kadagiti atep no tiempo ti pannakaikabil ti pundasion. Gapuna ti opisina ti internasional a trabahador naipasdek idiay Brooklyn, Nueva York, tapno mangurnos kadagiti bambanag.”

Gapuna, bayat a dumteng ti kalikagum kadagiti addaan iti paglaingan, ti opisina ti Brooklyn agserbi a “mangitupag.” Itupagna ti kasapulan dagiti proyekto ti panagbangon iti aglawlaw ti lubong kadagiti umiso a trabahador a mangpunno iti kasapulan dagidiay a panagbangon. Kas pangarigan, bayat nga umadani ti pannakaturpos dagiti nainayon iti pagnaedan iti sanga ti Mexico idi 1988, naawagan ti Brooklyn maipaay kadagiti nasigo nga agilatag kadagiti alpombra. Iti uneg ti sumagmamano a minutos, ti opisina nangsapul kadagiti uppat nga addaan iti kapadasan a maragsakan nga agboluntario. Idi naidedikar ti nainayon iti sanga idi Enero 1989, naikabilen dagiti alpombra ket nagpintasan ti buyada.

Panagbalin a Kualipikado nga Agserbi

Tapno makiraman iti programa iti international a boluntario, ti maysa a trabahador masapul nga agbalin pay a kualipikado. Tunggal boluntario masapul a dedikado, nabautisaran a Saksi ni Jehova. Idiay Estados Unidos, ti mainanama a boluntario masapul nga agserbi nga umuna iti maysa kadagiti pasilidades dagiti Saksi ni Jehova idiay Nueva York. Daytoy ti mangipaay iti gundaway ti pannakausig dagiti ug-ugalina ken abilidadna nga agtrabaho. Kalpasanna mabalin a maawis a mangipaay iti aplikasion maipaay iti programa. Dagiti assawa dagiti mainanama a boluntario, nupay no di gagangay a maawis nga agserbi a kadua dagiti assawada idiay Nueva York, mabalin nga agbalinda met a kualipikado maipaay iti programa ket suratanda met ti maysa nga aplikasion.

Dagiti Saksi ni Jehova kadagiti dadduma a pagilian mabalinda ti agaplikar iti sanga iti pagilianda. Daytoy nga aplikasion ti maipatulod iti opisina idiay hedkuarter ti Brooklyn isu a mangay-aywan iti internasional nga ad-adipen ken dadduma nga internasional a boluntario a trabahador. Ti nagaplikar ngarud mapakaammuan no kaanonto a kasapulan dagiti paglainganna.

Kontribusion dagiti Assawa a Babbai

Nupay dagiti assawa dagiti trabahador iti panagbangon gagangay nga awan ti paglainganda iti trabaho, adu kadakuada ti nasanay a mangigalot kadagiti pagpatibker a landok ken barot, ti mangipuesto ken mangmasilia iti tile, agraman ti panagliha ken panagpintor. Dadduma ti mangaywan kadagiti nasken a trabaho iti pagtaengan. Iti kasta aminda makatulongda iti nasayaat a pamay-an iti trabaho idiay pagbangonan iti aglawlaw ti lubong.

Maysa nga asawa a babai a nakikadua iti asawana iti trabaho idiay baro a panagbangon ti sanga idiay Puerto Rico ti nabiit pay a nagsurat iti opisina idiay Brooklyn: “Simmangpetkami idi Enero 1, 1991, maipaay iti makabulan a destino. Nakipagtrabahoak a kadua ti grupo nga aggalot kadagiti patibker a landok a maporma nga ikamen. Daytoy pay laeng ti karirigatan a trabaho nga inaramidko. Kangrunaanna, dayta buklenna ti panagkubbo ken panangreppet kadagiti landok, a mangusar kadagiti plais ken ti napulipol a barot—iti agmalmalem!

“Iti umuna a sumagmamano nga aldaw kankanayon a matnag ti hard hat ko, ket kankanayon a maireppetko ti dakkel unay a guantesko iti ikamen a landok. Ngem kamaudiananna nasursurokon ti nasaysayaat a pamay-an. Lima wenno innem a Band-Aids ti kankanayon a nanglapped iti sugsugatko. Nasursurok ti agala kadagiti rukod manipud iti plano, manguged kadagiti nalinteg a linea babaen iti de kolor a chalk, ken mangilatag kadagiti landok maipaay iti tunggal ikamen. Daytat’ pudno a makapnek a trabaho. Adu kadagiti gagangay nga ar-aramidek iti inaldaw-aldaw ti maulit-ulit a maaramid—panagdalus, panagluto, panaglaba, ken dadduma pay. Ngem dagidiay a landok a naikabil kadagiti diding agtalinaeddanto agingga nga agtakder ti sanga. Dayta a panunot ket makagunggona!”

Agyaman iti Pribilehio nga Agtrabaho

Maysa a manangaywan itoy nga internasional a trabaho a panagbangon kinunana: “Dayta ti nakaskasdaaw unay a banag a mapanunot. Dagiti tattao usarenda dagiti bakasionda nga agbiahe iti adayu a lugar a pagtrabahuan, a bayadanda ti pasaheda a mismo. Sadiay mabalin a narigrigat ti trabahoda ken at-atiddog ti panagtrabahoda ngem ti panagtrabahoda iti intero a tawen. Ket inton makaawiddan, agsuratda iti panagyaman maipaay iti pribilehio a nakapagtrabaho!”

Kas pangarigan, maysa a nabiit pay a surat ti nagkuna: “Agsuratkami tapno agyaman iti nagdakkelan a pribilehio a tinagiragsakmi iti tallo a bulan iti sanga idiay Filipinas. Iti ngudo ti tunggal aldaw ti trabaho, pisikal a nabannogkami, kas ti inanamaenmi, ngem napabileg iti kasta unay iti naespirituan gapu iti nagsayaatan a pannakilangen. Tinagiragsakmi ti nakiam-ammo kadagiti adu a dadduma a boluntario nga adda sadiay, ket masmasdaawkam unay kadagiti lokal a Saksi a nakipagtrabahuanmi. Pudno nga impatpategmi ida unay, maysa a kanayonan ti pamiliami.”

Maysa nga agasawa a napan idiay Ecuador ti nagsurat: “Nasursuromi ti agbiag nga awan ti junk food, ti agdigos babaen ti bassit laeng a danum, ken ti agiming ken agsuyat babaen iti nalamiis a danum. Dikam ammo idi no kasano kadakkel ti impluensia ti adbertising iti panagpampanunotmi. Impaaymi ti kasayaatan a kabaelanmi iti pagtrabahuan, ngem ad-adu ti inyawidmi ngem ti impaaymi. Napanglaw iti material dagiti kakabsat a taga Ecuador sigun iti pagalagadan ti E.U., ngem naisangsangayan ti espiritualidad ken apresasionda iti trabaho a panangasaba. Di madeskribir ti sasao no kasano ti riknami maipapan itoy a pribilehio.”

Panagbangon babaen iti Tilt-Up

Maysa a naisangsangayan a paset iti internasional a panagbangon isu ti pannakausar iti pamay-an a tilt-up. Daytoy a pamay-an buklen ti panangporma iti lugar a pagbangonan kadagiti dadakkel nga addaan iti patibker a konkreto a benneg iti diding. Mabalin a dagitoy ket agingga iti tallo a grado ti katayagna ket agdagsen iti nasurok a 20 tonelada. Dagiti benneg mabalin a maporma iti daplat ti patakder wenno iti asideg a pakapormaan ti benneg.

Innem wenno walo a benneg ti mapagtutuon. No umiso ti katibker dagiti panel—gagangay kalpasan iti pito nga aldaw—mausar ti crane a mangitag-ay kadakuada tapno maitakkab iti lugarda. Dagiti benneg maus-usardan agpadpada iti makin-uneg ken iti makin-ruar a diding, ken kasta met dagiti adu a grado a patakder. Ginasgasut kadagitoy a benneg, kas pangarigan, ti nausar iti 11-grado a pagtaengan ti sanga idiay Filipinas. Ti nalinis a naporman a konkreto a benneg mapintaan laengen.

Daytoy a pamay-an iti panagbangon saan laeng a makaekonomia ti tiempo no di ket epektibo pay nga usaren dagiti bassit kapadasanna a trabahador. Maysa a publikasion iti trabaho, ti Concrete, kinunana maipapan iti panagbangon iti baro a paktoria dagiti Saksi ni Jehova idiay Inglatera: “Ti panagbangon babaen iti tilt-up ket nangnangruna a maitutop iti kasapulanda gapu iti kasimple ti pamay-an daytoy a panagbangon . . . Ti panagekonomia ti tiempo ken gastos ti kankanayon a kangrunaan a pagimbagan ti sistema.”

Kinuna pay ti magasin maipapan iti panagbangon a tilt-up: “Ti abilidadna a mangibangon kadagiti dadakkel a diding, (diding a makabael a mangawit iti nadagsen ken dagiti diding a di makabael a mangawit iti nadagsen) iti mabiit laeng a tiempo, a mainayon iti lokal a trabaho a di unay kasapulan iti pannakaaywan, ti mangipaay ti pamay-an iti kinapartak ken ekonomia.” Anian a maitutop, ngarud, a ti baro a programa ti panagbangon masapul nga usarenna daytoy simple, epektibo a pamay-an iti panagbangon!

Dagiti Opisina ti Enhenieria

Ti pannakaiturong daytoy a programa iti internasional a panagbangon ket maipaay manipud iti dakkel nga opisina ti enhenieria idiay hedkuarter dagiti Saksi ni Jehova idiay Brooklyn, Nueva York. Sadiay, nasurok a sangagasut nga enheniero, diseniador ti panagbangon, ken draftspersons—a dagitoy amin ket kamkameng ti hedkuarter—ti agtrabaho iti plano dagiti patakder. Tapno tumulong kadagiti immadu a trabaho, nabiit pay a naipasdek idiay Japan, Australia, ken Europa dagiti opisina ti enhenieria iti rehion.

Idi 1987, ti CAD (Computer Aided Design) nairugi a mangisagana kadagiti drowing. Ti gagangay nga estasion ti CAD buklen ti sumagmamano a pedaso ti alikamen. No mausar nga agkakadua, dagitoy posible a makaisagana iti drowing iti kompiuter imbes a babaen iti ima iti drafting board. Ita, nasurok a 65 nga estasion ti CAD ti maus-usar idiay Brooklyn ken kadagiti sangsangana.

Yantangay mabalin nga idulin dagiti drowing iti memoria ti kompiuter, dagiti disenio kadagiti napalabas a proyekto mabalin a mairuar ket mainayon iti agdama a drowing. Daytoy makatulong iti panagpataud ken kasta met ti panamagbalin nga agpapareho ti disenio iti panagbangon.

Dagiti Nabiit Pay a Proyekto ti Panagbangon

Bayat ti idadakkel ti Opisina ti Enhenieria ti Brooklyn, kasta met ti kapanunotan iti panangorganisar iti boluntario a trabaho. Mabalin a kunaen a ti programa ti panagbangon nangrugi idi 1985 idi dagiti trabahador manipud kadagiti dadduma a pagilian simmungbatda a tumulong a mangibangon iti baro a sanga idiay Panama. Rimmang-ay pay dayta idi kasapulan ti Peru ti tulong iti dakkel a nainayon a paset ti sanga. Ket ti programa pudno a nangrugi idi naiwayat ti pannakaibangon dagiti sanga iti Costa Rica ken Nigeria. Di nagbayag dagiti kangrunaan a kamkamengna naibaondan a tumulong kadagiti proyekto iti intero a lubong.

Dagiti internasional nga ad-adipen ken dagiti dadduma a boluntario nakatulongdan a mangibangon kadagiti adu a baro a sanga agraman dagiti nainayon kadagiti datin a patakder, agraman ti kaaduan kadagidiay baro a sanga ken dagidiay nainayon a patpatakder a nalpas nanipud iti nasapa pay a 1986. Iti napalabas a lima a tawen wenno ad-adu pay, naturpos dagiti proyekto ken naidedikarda idiay Panama, Costa Rica, Chile, Mexico, New Zealand, Haiti, Liberia, Austria, Ecuador, Papua New Guinea, Guyana, Ghana, Hawaii, Portugal, Hong Kong, Cyprus, Peru, El Salvador, Mauritius, Japan, Honduras, Guatemala, Nigeria, Argentina, Australia, New Caledonia, Fiji, ti Filipinas, ken Grecia.

Adu kadagitoy ti dadakkel a proyekto ti panagibangon. Idiay Nigeria maysa a bassit nga ili, kaiyariganna, ti naibangon iti 57-hektaria a daga. Maysa a 140 metros-kaatiddogna, 70 metros-kalawana a paktoria ti naibangon, agraman dagiti pagtaengan a manglaon iti nasurok a 400 a tattao, maysa nga opisina, maysa a garahe, ken dadduma a patakder. Dagiti materiales a pagbangon a naggapu idiay Estados Unidos laeng ket umdasen a mangpunno iti 347 a bagon ti bagahe, isu a no pagsisilpuen mabalin a 3.5 kilometros ti kaatiddogna!

No dadduma, adda ti panangbusor ti klero iti proyekto a panagibangon. Idiay Grecia ti klero nangorganisar kadagiti 40 a bus dagiti managprotesta idi Marso 1989, ngem sinuportaran dagiti polis ti legal a kalintegan dagiti Saksi nga agibangon iti sangada, ket di nagballigi ti protesta kalpasan ti nasayaat a pannakairugi ti proyekto. Ti baro a sanga, nga addaan iti dakkel, baro a paktoria ken 22 a patakder a pagtaengan a manglaon iti nasurok a 170 a tattao, ket nakompleto ken naidedikar iti daytoy a primavera.

Idiay Francia, ti Obispo iti Evreux, ni Jacques Gailot, prinotestana ti plano a maipaay iti dakkel a baro a sanga dagiti Saksi ni Jehova idiay Louviers. Kinunana a ti publiko a ministerio dagiti Saksi dina “raemen ti kinatan-ok ti tao.” Kaskasdi, saan nga umanamong dagiti dadduma iti obispo. Patienda a dagiti Saksi ni Jehova rebbeng a maaddaanda ti kalintegan a mangpalawa iti pasilidadesda iti lugar, kas iti ar-aramidenda kadagiti adu a luglugar iti intero a lubong.

Ita agdama, dagiti boluntario iti panagibangon agtartrabahoda kadagiti proyekto ti sanga idiay Colombia, Puerto Rico, Zambia, Brazil, Inglatera, Canada, Dominican Republic, Ecuador, Poland, Guadeloupe, Thailand, Leeward Islands, Bahamas, Western Samoa, Tahiti, Solomon Islands, Venezuela, Republika iti Korea, Sud Africa, ken Alemania. Dadduma a proyekto ti adda pay laeng iti pagdrowingan, agraman dagiti baro a sanga wenno kanayonan a patakder iti addan a patakder idiay Francia, España, Mexico, Sri Lanka, Taiwan, ken Suriname.

Pananginanama iti Kasapulan

Idi ti Bagi a Manarawidwid dagiti Saksi ni Jehova pinalubosanna ti 50-porsiento a panangpalawa iti sanga idiay Alemania idi 1988, dadduma a makapaliiw ti mangibilang iti nainayon a nagdakkelan unay. Ngem idi 1989 ken 1990 ti trabaho dagiti Saksi ni Jehova a panangasaba nagbalin a legal wenno napalubosan nga agandar nga awan laplappedna idiay Poland, Hungary, Makindaya nga Alemania, ken Romania. Ket idi Marso 28, itoy a tawen, binigbigen ti Union Soviet dagiti Saksi ni Jehova kas maysa a relihiuso a grupo.

Nasurok a 250,000 a tattao kadagiti pagpagilian iti Makindaya nga Europa ti timmabuno kadagiti kumbension dagiti Saksi ni Jehova idi napalabas a kalgaw ket magagaranda nga umawat kadagiti literatura ti Biblia. “Bayat ti dua a bulan laeng,” kuna ti 1991 Britannica Book of the Year, “ti sanga nga opisina ti Watchtower Society iti Makinlaud nga Alemania nangipatulod iti 275 tonelada a naibatay-Biblia a literatura, agraman dagiti 115,000 a Biblia, idiay laeng Makindaya nga Alemania.” Gapuna nalawagen a ti sanga ti Alemania kasapulanna amin ti napalubosan a panangpalawa, ket dagdagus a kasapulanna!

Panagsagana Maipaay kadagiti Masanguanan a Kasapulan

Kas iti mapanunotyo, ti panangikasaba iti ‘daytoy naimbag a damag iti Pagarian iti amin a napagnaedan a daga sakbay ti iyaay ti panungpalan’ kas kaitungpalan iti padto ni Jesus sapulenna ti kasta unay a panangikagumaan. (Mateo 24:14) Ket dagiti pudno a Kristiano iti sangalubongan ipapaayda ti kasta a panangikagumaan. Ar-aramidenda ti isuamin a kabaelanda a maipaay ti mensahe ti Pagarian kadagiti amin a nasnasion iti naorganisar a naimbag a pamay-an.

Tapno maibanag daytoy, dagiti Saksi ni Jehova palpalawaenda ti kabaelanda nga agipablaak iti literatura ti Biblia idiay hedkuarterda idiay Brooklyn, Nueva York. Ti pannakaibangon iti 30-grado a patakder, a masarakan idiay 90 Sands Street, a manglaon iti sangaribo pay a miembro iti hedkuarterda ket maar-aramiden ket nakaiskediol a maturpos inton 1993.

Ti kadadakkelan a proyekto ti panagbangon, nupay kasta, isut’ maar-aramid agarup 110 kilometros manipud Siudad ti Nueva York, iti asideg ti Patterson, Nueva York. “Inton makaturpos dagiti [Saksi ni Jehova], mabalin nga inton 1996,” impadamag ti The New York Times nga Abril 7, 1991, “nakaibangondanton iti 6 nga apartment a balbalay a 2 agingga ti 5 grado ti kangatona nga addaan iti 624 nga apartments, maysa a 450-kotse a garahe, maysa a 144-kuarto nga otel, maysa a dakkel a kusina ken kumidor nga agserbi kadagiti 1,600 a tattao iti maminsan laeng, maysa nga opisina, maysa a kuarto a pagadalan ken sumagmamano a service buildings.” Ginasgasut a boluntario ti mangipaay iti libre a panagtrabaho a mangibangon itoy a nagdakkelan a sentro iti edukasion iti Pagarian.

Pudno unay, daytoy a nakaskasdaaw a programa iti panagibangon maar-aramid iti tunggal paset ti daga—nga aminda ket inorganisar ken imbanag dagiti boluntario a trabahador. Pudno a daytoy ket baro a banag iti internasional a panagbangon!

[Ladawan iti panid 21]

Ti panangrepreppet kadagiti landok ket paset iti panagbangon

[Dagiti Ladawan iti panid 23]

Iti panagbangon a tilt-up, dagiti benneg a konkreto mabalin a maporma a mapagtutuon. No natibkeren dagiti benneg, dagitoy maital-odan a maikabil iti lugarda

[Dagiti Ladawan iti panid 24]

[Dagiti Ladawan iti panid 25]

Dagiti patpatakder iti sanga a naiplano maipaay iti Puerto Rico, Zambia, ken ti Leeward Islands

[Ladawan iti panid 27]

Dagiti boluntario a trabahador iti proyekto ti panagbangon iti maysa a pagilian nga Europeo