Panangsiput iti Albatros
Ti agalla-alla nga albatros, a nalatak gaput’ panagtayabna a sumursurot iti barko, nabayagen a nangpasiddaaw kadagiti marino. Ti tallo-metros a payak ti tumatayab makatulong iti nakapimpintas, kasla awan bambannogna a panagtayab. Dagiti dadakkel a nagkakamang a ramramay ti sakana ti mangtengngel iti tumatayab no agtaktakder; no agtaytayab, dagitoy mangipaayda iti panangtimbeng, nga agserbi a kas timon, bayat ti panagunnatda iti labes ti ipus ti tumatayab.
Daytoy a tumatayab, a masansan nga agdagsen iti 9 a kilos, addaan iti nakaay-ayat a pamay-an ti panagtayab. “Ti panagtayab iti Albatros ket aerodinamiko nga umasping iti eroplano iti baybay. Babaen iti panangiyunnatna iti tengngedna ken panangiyukradna kadagiti payakna, daytat’ nakaparpartak nga aggaod nga agpangato iti angin babaen kadagiti nagkakamang a sakana. Di agbayag nakaruaren ti barukong ti tumatayab a dagiti laeng saksakanan ti nakadisso iti rabaw ti danum. Iti kanito a nakatayaben ti Albatros agsublin ti aerodinamiko nga itsurana, ipalnekna ti tengngedna ket kukutennan ti saksakana.”—The New Larousse Encyclopedia of Animal Life.
Daytoy a nasigo kadagiti naririkut nga atmospera iti nagbaetan ti 40 ken 60 degrees iti abagatan ti equator agumok kadagiti naiputputong nga isla. Manipud sadiay tayabenna ti nakawatwatiwat nga agsapul iti taraon. Ngem kasanot’ kaadayu ti pagpasiaranna?
Nangikabit dagiti sientista kadagiti babassit a transmitter iti innem a kalakian nga agalla-alla nga albatros nga agum-umok iti abagatan a laud iti Indian Ocean. Babaen ti panangusarda kadagiti satelait a mangsiput kadakuada, masdaaw dagiti managsirarak a makasarak nga agbiahe ti albatros iti nagbaetan ti 3,620 ken 15,090 kilometros iti kapartak a dandani 80 kilometros iti maysa nga oras. Iti 33 laeng nga aldaw, dagitoy a tumatayab iti baybay nakatayabdan iti 16,000 kilometros, agarup mamimpito a daras nga ad-adayu ngem ti patienda idi a mabalin a tayabenda.
Ti naisangsangayan nga abilidad ti albatros nga agtayab sigurado a tignayenna ti panangidayaw iti Diseniadorna.—Salmo 148:10, 13.