Ania ti Masakbayan ti Albatross?
Babaen ti koresponsal ti Agriingkayo! idiay Britania
Aniat’ masakbayan ti albatross, ti kadakkelan iti lubong a tumatayab iti baybay? “Talaga a nalidem,” kuna ti The Times ti London. Pinullo a ribu kadakuada—pattapattaen dagiti managsirarak iti Australia nga agarup 44,000—ti mapappapatay iti kada tawen. Kinapudnona, patien ti dadduma nga autoridad a maungawton ti agkalkallautang nga albatross, nga addaan iti nadaeg a payak a sangapulo-pie no nakaukrad.
No makatayaben dagiti albatross, agtultuloy a busbosenda ti pito a tawen iti baybay, a tumayok ken agalindayag iti rinibu a kilometro ken mabalinda pay ketdi ti maturog bayat nga agtaytayabda. Patien ti dadduma a dagiti tumatayab mabalin a likmutenda ti daga iti mamin-adu a daras sakbay nga agsublida iti nakaipasngayanda tapno agpaadu.
Maysa laeng a piek ti padakkelen ti albatross iti kada sumaganad a tawen. Ngem kabayatan ti napalabas a 20 a tawen, bimmassit iti gistay kagudua ti populasion ti agkalkallautang nga albatross iti Makin-abagatan nga Atlantico ken iti Crozet idiay Taaw Indiano. Aniat’ patien ti dadduma a pakaigapuan daytoy? Ti panagkalap babaen iti kitang.
Tapno makalap ti bluefin tuna, mangusar dagiti dumadaklis iti kitang, a tunggal maysa ti addaan iti ginasut a banniit. Maipauyaoy dagiti kitang iti pungto ti lugan a pagkalap. Tunggal banniit ti addaan iti pusit nga appan—ti kangrunaan a taraon ti albatross. No sumippayot ti tumatayab tapno alaenna ti pusit, pasaray maalimonna uray ti banniit. Lumned no kuan ti nabanniitan nga albatross agraman ti nadagsen a kitang sa malmes.
Tapno masalakniban ti albatross, dadduma a mangngalap iti tuna ti sibaballigi a naparegta nga iplastarda dagiti banniitda no rabii, no saan nga agkalap ti tumatayab. Mangsapsapul met dagiti mangngalap kadagiti pamay-an tapno maisaknapda dagiti banniitda iti sirok ti bilogda tapno saan a makita ti albatross ti appan. Dadduma a pamay-an a maus-usaren iramanna ti napadagsenan a kitang a nalaka a lumned ken maysa a kita ti bambanti tapno mapabutngan dagiti tumatayab.
Kadagiti nalawa a baybay ti Abagatan nga Atlantico, nupay kasta, saan a mamonitor dagiti pamay-an nga us-usaren dagiti pagkalap a bilog. Sigun iti espesialista ti tumatayab iti baybay a ni Sandy Bartle, iti Museum of New Zealand, dagiti bilog sadiay “awan ar-aramidenda tapno mapasardeng ti pannakapapatay dagiti albatross.” Kinapudnona, ti posible a pannakaungaw ti nadaeg nga albatross ket panangilawlawag iti kinaliway ken di panangikankano ti tao.