Karkarna nga Agindeg iti Kueba Sadi Kenya
Babaen ti koresponsal ti Agriingkayo! sadi Kenya
NAGNAKAMI iti maas-asak unay a dalan. Ti daranudor ti danum nga agallangugan kadagiti sanga ti bakir ti juniper iparipiripna nga asidegen ti pagnguduan ti desdesmi. Makita iti ngato ti wangawangan ti kueba, a ti unegna ket paglemlemmengan dagiti parsua a kayatmi a makita—dagiti elepante ti Elgon.
Ti pagserkan ti kueba agtayag iti agarup 8 metros ket 8 metros ti kalawana. Magagarankami bayat ti iseserrekmi. Nupay kasta, ti nasinggit nga uni dagiti agtaytayab a paniki dagus a pinatalgedamna ti nakalkaldaang a suspetsami. Immaykami a nakasapsapa wenno no saan nakaladladaw. Dagiti adu a tugot iti pimmulbos a datar ti kueba paneknekanna a dagiti elepante immaydan ditoy ket nakapanawdan.
Nupay kasta, apay ngarud, nga inanamaenmi a makita dagiti elepante ditoy agarup 2,000 metros ti kangatona a paset ti bantay, malaksid pay iti uneg ti kueba? Addaan daytoy iti makapainteres nga estoria.
Dagiti Pagnaedan a Kueba iti Bantay
Naiyunnat iti pagbedngan ti Kenya-Uganda isut’ natayag a bulkaniko a kono ti Mount Elgon. Agtayag iti 4,320 metros, isut’ maysa kadagiti katayagan nga agsolsolo a bantay sadi Makindaya nga Africa. Pattapattaen ti dadduma a sakbay ti pannakadangranna gaput’ panagrugnay, ti pantokna lab-awanna uray dagiti naabbongan niebe a tuktok ti Kilimanjaro. Ti bantay tannawaganna dagiti karkarna a kabakiran, hot spring, ken nalamiis ti danumna a danaw. Ngem, nalabit ti nakaskasdaaw unay a pangallukoy ti Elgon, isu dagiti adu a kuebana. Dagitoy ti paggianan dagiti elepante a kayatmi a kitaen.
Idi un-unana dagitoy a kueba ket pagnaedan dagiti tattao a Kony, wenno Elgon Masai. Pagarup ti dadduma a ti Elgon ket naipanagan manipud kadakuada. Damo a dimteng ditoy dagiti Kony nasurok a 300 a tawenen ti napalabas. Idi ni Joseph Thomson, ti immuna a puraw a tao a nangsukisok iti lugar, dimteng idi 1883, awan duadua a nasdaaw a makakita iti adu a balbalay a naibangon iti dadduma kadagiti kueba.
Kaaduanna, dagiti Masai pinanawandan dagiti pagindeganda a kueba, nupay dadduma a Masai kaskasdi nga agtaengda iti nababbaba a kueba iti sakaanan ti Mount Elgon. Idi agangay dagiti animal nga agar-arab kadagitoy a bakir simrekda kadagitoy napanawan a kueba. Dagiti buffalo maallukoyda kadagiti makagargari a lubnak a masarakan kadakuada. Dagiti pagaw ken sallapingaw magagaranda a sumrek ket tiliwenda amin dagiti naimas nga insekto a naatrakar iti dandanum dagiti kueba.
Karkarna, nupay kasta, napaneknekan met a dagiti kueba maallukoyda dagiti di unay maipagarup nga agindeg kadakuada—dagiti elepante. Agingga ita dagitoy nabaked a higante isang-atda dagiti uppat-inggat’ innem-tonelada a bagida kadagiti akikid a dalan tapno madanonda dagiti kueba. Apay a mapanda sadiay?
Minero ti Asin
Adda kadagiti kueba ti kanayonan a pagtaraon a tarigagayan ti bagida. Kadawyanna, dagiti ruot ipaaydat’ umdas nga asin iti taraonda, ngem iti daytoy a nangato nga altitud, ti asin ket inyanuden ti tudo. Gapuna agturong ditoy dagiti elepante tapno gun-odenda ti sodium sulphate (Glauber’s salt) a masarakan kadagiti nalukneng a bulkaniko a batbato a nangap-ap kadagiti uneg ti kueba.
Tapno magun-odda ti asin ipakat dagiti elepante ti naisangsangayan a teknik. Idungsodat’ saongda kadagiti birri ti pader ti kueba. Kalpasanna, ti nabileg a panangiduron manipud iti kasla buldoser a bagida warwarenna ti batbato. Kalpasan ti panangisubodat’ maysa a bato babaen ti nasudi a sungoda, gilingenda dayta babaen kadagiti nabileg a ngipenda sadanto tilmonen nga agkuykuyog ti graba ken asin. Maulit daytoy agingga a mapnek dagiti elepante. Kalpasanna ti nasayaat a panaginana iti nasipnget, nalamiis a pagminasan kasla tumulong iti panangtunawda.
Makapainteres, nupay agtultuloy a dumakdakkel ti marfil a saong dagiti elepante iti intero a panagbiagda, bumassitda gaput’ pannakarunotda—ti pagsubadda kadagiti asin a maalada.
Kalpasan ti panagtalinaed dagiti elepante iti uneg ken ruar dagiti kueba iti sumagmamano a lawas, tarigagayanda manen ti agpasiar. Mabalin nga agturongda iti bakir dagiti kawayan tapno ngetngetenda dagiti rabongda wenno mangalngal nga ukisda. Busbosen dagiti elepante ti agarup 18 oras tunggal aldaw iti pannangan, nga ibusenda ti agarup 180 kilos a bulbulong. Inton agangay, awisen ida dagiti kueba ti Elgon gaput’ panagtarigagayda iti asin.
No panunoten ti kinamanagalla-allada ken narasay a bilangda (ti sangagasut ket nasayaaten a bilang), di pakasdaawan no apay a dimi nakita dagitoy saongan nga agdaldaliasat.
Adtoyen dagiti Elepante!
Idi rummuarkami iti kampomi iti sumuno a bigat, nagdaliasatkami a siuulimek iti binasat’ linnaaw a kabakiran, nga aduan kadagiti songgo a colobus ken kumakanta a tumatayab. Idi kuan, adda napigsa a rippaak, a sinaruno ti giddato a pannakagunggon ti mulmula iti kaparanget! Immasidegkami iti sumagmamano a metro manipud nakapasamakanna.
Iti panagur-uraymi a siuulimek, nangngegmi ti nakapuy nga uni dagiti agkutkuti a bagi iti likudan ti intar ti narukbos a mulmula a naipasurot iti dalanmi. Idi agangay, maysa kadagitoy managbabain nga animal, maysa nga urbon, nauman iti ay-ayammi a linnemmengan ket rimmuar iti agarup tallo a metros manipud iti kotsemi. Isut’ nataraki ken nabaked, ket ti lumabbaga a marisna rimmimat iti sidong ti naraniag nga init iti agsapa. Agpapan pay iti bassit a pammagina, ti mamutbuteng a langana kalikagumannat’ panangraem.
Naipuestok ti kamerak para iti mabalin a napintas a retrato. Ngem diak met mapisit ti pagtalmeganna; naibusanak ti film! Idin rimmuar ti maysa nga ina nga elepante ket kinuyogna ti urbonna a limmabasdat’ sanguanan ti kotsemi. Idi makargaakon ti kamerak, nakaad-adayon dagiti elepante para iti napintas a retrato, ngem rinetratok latta ta daytat’ bale mangpaneknek a nakitak dagitoy naatap a higante.
Anian a nakakaskasdaaw a parsua! Kabalinandat’ agulimek a kas ti utot, kaskasdi nadagdagsenda ngem kotse. Dakdakkelda ngem ti sumagmamano a trak, kaskasdi mammanoda a makita. Ngem dikay palubosan a daytat’ manglapped kadakayo a sumarungkar iti pagtaengan dagiti karkarna nga agindeg iti kueba sadi Kenya.