Manipud Managbasatayo

Panangawat iti Pammabalaw Nasapa pay itatta nakaawatak iti pammababalaw maipaay iti maysa a proyekto nga ar-aramidek iti uneg ti maysa a lawasen. Nupay no makagunggona ti pammababalaw, nauyong ti superbisorko. Naupayak iti kasta unay. Idi nakaawidakon, nabasak ti artikulo a “Kaguram Aya ti Mababalaw?” (Pebrero 8, 1991) Uray di ibagbagan, daytat’ nangbalbaliw nga interamente iti panangmatmatko.

D. B., Estados Unidos

Ti artikulo ket pudno a makatulong. Gaput’ nabiitak pay a nababalaw, maup-upayak ken riningbawannak ti panagliday. Nupay kasta, babaen ti panangbasak iti artikulo a maulit-ulit, natulonganak a mangparmek iti parikutko.

N. O., Japan

Panaginum ken Panagmaneho Nasairak iti kasta unay kadadagiti artikulo maipapan iti “Panaginum ken Panagmaneho—Makapapatay a Panaglaok.” (Pebrero 8, 1991) Ti bassit a siam a bulan a kabsatko ket natay iti maysa nga aksidente ti kotse 31 a tawenen a napalabas. Maladingitanak pay laeng gapu kenkuana. Maysa a nabartek a tsuper ti nangdungpar iti kotsemi. Makitkitak pay laeng ni nanangko a narusepen ti dara ken ti bassit a kabsatko a babai a nakarukuben iti tugawna. Maragsakanak ta addaanak ti pammati iti panagungar, ngem napasnek ti pananginanamak a ti artikulo ti mamagpanunot koma kadagiti dadduma a mangusig no rebbeng nga uminumda ken agmaneho.

K. N., Estados Unidos

Ti edadko ket 16 años. Ti artikulo a “Sanguen dagiti Biktima dagiti Nagbasol” naglaon kadagiti makatignay unay a kapkapadasan ket pagluaendak. Masiguradok a daytoy nga artikulo tulongannanto dagiti adu nga agtutubo a kas kaniak a mangpanunot kadagiti dadduma ket agan-annadda koma iti panagusarda iti alkohol.

R. H., Alemania

Panangaywan kadagiti Natataengan Ti artikulo maipapan iti “Panangaywan kadagiti Natataengan—Dumakdakkel a Problema” (Marso 22, 1991) pinaregtanak iti kasta unay. Agsagsagaban ti 86-años nga amak iti sakit nga Alzheimer’s, ket tarigagayak ti mangaywan kenkuana idiay pagtaengan imbes nga ikabilko iti maysa nga ospital. Bayat a kumaro ti kasasaadna, dagiti pakarigatan ken panagpampanunot a mairaman iti panangaywan kenkuana kimmaro. Nakagtengak iti punto a mariknak a naan-anay nga awanen ti namnamak! Ngem idin nabasak dagiti artikuloyo. Naliwliwaak iti kasta unay, nakaluaak. Nakaad-adu pay dagiti parikut nga adda iti masanguanan, ngem napabilegak iti kasta unay iti pangngeddengko a mangaywan ken tatangko agingga iti panungpalan.

T. H., Japan

Mexico City Masarakak ti artikulo a “Mexico City—Agbalbalinen a Higante?” (Enero 8, 1991) a biddut. Kunaenyo a ti kaadda ti dakkel a pamilia ket maysa a tawid ti kultura. Nupay kasta, daytoy a pasamak mapasamak laeng iti dadduma a paset ti pagilian—saan nga iti Mexico City.

S. C., Mexico

Ladingitenmi no ti artikulo pinataudnat’ di panagkinnaawatan. Nupay kasta, ti sasao ket naaramid a mangtukoy iti intero a Mexico, saan laeng a ti Mexico City.—ED.

Niteklab Kas maysa nga instruktor iti musika ken sala, riribukennak ti artikuloyo nga “Agimtuod dagiti Agtutubo . . . Dagiti Ngay Niteklab?” (Pebrero 8, 1991) Awan dakesna ti musika ken panagsala. Ngem kinuna ti artikuloyo a ti musika ken panagsala ket nausar idi a manggargari kadagiti tattao nga agaramid iti dakes. Diak umanamong. Ti artikuloyo lapdanna laeng ti panunot dagiti tattao kadagiti arte.

B. M., Estados Unidos

Saanmi a kinondenar dagiti amin a porma iti musika ken panagsala. Nupay kasta, dagiti makaipababa a musika ken dagiti makagargari a panagsala dakkel ti pasetda iti panangallilaw iti ili ti Dios idi tiempo ti Biblia. (Idiligyo iti Exodo 32:6, 17-19.) Rumbeng ngarud ti panangpakdaar kadagiti agtutubo maipapan iti panaglablabes nga ar-aramidenda itatta.—ED.