Panangparmek iti Panagbiag iti Kinaranggas

TI GAYYEMKO ken siak nagtaraykami iti nakaparpartak agingga a kabaelanmi, ket idi makagtengkami iti karayan iti asideg ti ilik, bimmatokkami iti dayta. Idi rumkuaskami, rinugianmi ti naglangoy iti kasta unay nga agturong iti bangir nga igid.

Daytoy kadi ket maysa nga inuubingan nga ay-ayam? Saan met! Daytat’ maysa a banag a saan laeng a kaipapananna ti biag ken ipapatay. Idi tumaliawak, nakitak dagiti polis a nakapaturong dagiti armasda kadakami. Bimmatokak iti danum tapno malisiak dagiti bala ket intultuloyko ti naglangoy nga agturong iti bangir nga igid. Uray pay idi addaak iti uneg ti danum, mangegko dagiti putok ti paltog.

Apaman a nakagtengkami iti bangir nga igid, nagballigikami a nakalisi iti pannakabalud, a sadiay ti nakaibaludanmi gapu iti panangloob ken panagtakaw iti kotse.

Daytoy ket maysa laeng kadagiti adu a beses a nagbalinak a wanted wenno aktual a kinamat dagiti polis gapu iti kriminal a tignay. Nupay no 17 añosak pay laeng iti dayta a tiempo, nakaibangonakon iti atiddog a rekord iti panagaresto dagiti autoridad. Kamaudiananna, natiliwak ken ti gayyemko, ket naminsan manen a nasentensiaankami iti pannakabalud, iti daytoy a tiempo iti uneg ti dua ket kagudua a tawen.

Uray pay idi addaak iti pagbaludan impakitak a naranggasak. Gaput’ masansan a pannakiapak kadagiti dadduma a balud, naikkanak iti uniporme a puraw. Daytoy ti namagbalin kadagiti dadduma a mananggulo ken siak a maipaay iti naisangsangayan a panangaywan dagiti guardia.

Narangranggas Pay Kalpasan ti Pannakawayawaya

Nawayawayaanak manipud iti pagbaludan, ngem diak simmayaat. Kinapudnona narangranggasak pay ngem idi. Dagus nga impabigbigko ti bagik nga agturay kadagiti nadumaduma a kalkalsada. Siasinoman a mangkarit kaniak dagdagus a makasarak iti kalabanna.

Naminsan maysa a grupo dagiti agtutubo ti nangparurod kaniak. Rinautko ida, a dinangrak ti sumagmamano sakbay ti panangpasardeng dagiti polis iti panagaapa, uray pay no nablo ti makannawan nga imak iti panagaapa maysa a lawas sakbayna.

Iti sabali manen a tiempo dua a gagayyem ken siak ti nangkarit iti maysa a grupo dagiti lallaki manipud iti kabangibang nga ili. Immaddang ti panguloda a sumabet kaniak nga addaan iti bareta a landok. Inikkatko ti armasna, ngem nakalapsut iti iggemko ken timmaray. Ti laeng pamay-an iti panangitultuloyna iti pannakilabanna isut’ panangisubli iti baretana a landok, nga isut’ inaramidko. Isut’ nagsubli, inikkatko manen ti armasna, nga iti daytoy a tiempo siniguradok a di makalapsut agingga a namalok.

Maysa a rabii, tapno “agragragsakak” laeng nagtakderak iti maysa a suli ti kalsada idiay Harlem, Siudad ti Nueva York, ket kinaritko ti siasinoman a makilaban. Dadduma ti nangawat iti tukonko, ket adu dagiti panaglalaban. Kas banagna, ti pakasarsaritaak a napeggad, naranggas a tao kimmaro. Kadagitoy a nadumaduma a panagdadangadang, nabarsakak kadagiti bote, alikamen a pangsukat kadagiti pilid, ken dagiti batuta ken naatake babaen kadagiti kutsilio ken dadduma nga armas. Ngem amin dagitoy awan ti naaramidanda a mamagbabawi kaniak manipud iti naranggas a daldalanko.

Kumaro ti Kinaranggas

Di nagbayag naammuak nga adu a kuarta ti mabirukan iti panaglako ti droga. Gapu ta agus-usarak a mismo, nagbalin a pamiliar kaniak ti kagimongan ti droga. Di nagbayag addaanakon kadagiti tattao nga aglaklako ti droga para kaniak, isu a mamagbalin kaniak nga ad-adda pay a naranggas.

Naminsan rinautmi ti sabali a negosiante iti droga, a manginanamakami a mangtakaw iti drogana. Naarmasan iti paltog ken kutsilio, linoobanmi ti pagtaenganna ket tinengngelmi ti tallo a lallaki ken maysa a babai bayat a sinukimatmi ti balay, nga agsapsapul kadagiti droga.

Iti sabali manen a tiempo maysa a gayyem ken siak, nga addaankami iti paltog ken nakasuot iti maskara iti ski, inkeddengmi a takawan ti maysa a baknang a lalaki tapno makagun-odkami kadagiti droga. Binantayanmi ti pagtaenganna, ngem pulos a di nagparparang, gapuna pimmanawkami. Awan duadua, no nagparang koma, naibanagmi koma dagiti panggepmi.

Gapuna, iti edad laeng a 20, nasarakakon ti bagik a nairaman iti kasta unay iti kinaranggas, dagiti droga, ken dagiti nakaro a krimen. Ti masanguanak, iti kasayaatanna, ket maysa a panagbiag iti pagbaludan—ket malidlidayak.

Masansan a pampanunotek no siasino ti mangikeddeng iti naimbag ken dakes. Kinunak a siasinoman nga addaan iti dakdakkel a pannakabalin iti kagimongan. Nagrasonak met a yantangay dagiti tattao ti mangikedkeddeng iti naimbag ken dakes, ket naan-anay nga awan iti panagraemko iti aniaman nga autoridad a tao, addaanak iti adu a kalintegan a kas iti siasinoman a mangikeddeng iti saludsod nga agpaay iti bagik met laeng. Ngem din agbayag makasarakak iti nasaysayaat a sungbat.

Maysa a Nasaysayaat a Pamay-an

Ti kabsatko a babai, a nangasawa iti maysa kadagiti gagayyemko a kaduak a nabalud idi, inawatna ti pannakipagadal kadagiti Saksi ni Jehova. Inramanna dagiti bambanag a nasursurona manipud iti Biblia iti tunggal maysa iti pamiliana—malaksid kaniak. Ti pamiliak ibagada kaniak a liklikak ti kabsatko a babai. Apay? Kunada a gapu ta ti laeng sarsaritaenna isut’ maipapan iti dayta “minamauyong a relihion.”

Managusiusoak. Ania koma ti mabalinna a sawen a mangupay iti kasta unay kadagiti tattao? Kayatko a maammuan, ngem ti kabsatko dina saritaen kaniak ti maipapan iti dayta. Apay? Impagarupna a dakesak unayen nga umimdeng iti aniaman maipapan iti Biblia.

Ngem maysa a rabii dinawatko iti kabsatko a babai a mangrabiiak iti pagtaenganna. Nakatugawak sadiay a mangmangan a kaduana ken ti asawana, ket kinunak: “Ibagam kaniak ti maipapan iti daytoy baro a relihion.” Inaramidda ti kasta—iti uneg ti innem nga oras! Adda pategna kaniak ta nagsubliak iti sumaganad a rabii tapno dumngeg iti ad-adu pay.

Kalpasan daytoy maikadua nga ibibisita, nakumbinsirak a nasarakakon ti maysa a banag nga alagaden, maysa a pudno a panggep iti biag. Dagdagus, rinugiak ti timmabuno kadagiti gimong idiay Kingdom Hall dagiti Saksi ni Jehova ken mangisarita met kadagiti gagayyemko ti maipapan kadagiti maam-ammuak.

Nagtalinaed iti sumagmamano a tiempo ti estilo ti panagbiagko a di nabalbaliwan. Ngem intultuloyko ti nagadal ken nangammo ti maipapan iti inanamaen ni Jehova a Dios, ket siniguradok a diak palabsen dagiti gimgimong idiay Kingdom Hall, a sadiay ti pakaisalsalaysayan ti Biblia. Iti kastoy a pamay-an makagun-odak iti naespirituan a bileg a mangbalbaliw iti biagko, a sinaggaysa.

Umuna, indianko ti panaglako iti droga. Daytoy ti nangpapungtot iti dadduma kadagidiay kakaduak iti napalabas, ngem kaskasdi a naranggas pay laeng ti pakasarsaritaak isu a nangtaginayon kaniak a saan a madangdangran. Sumaganad, insardengko ti agusar iti droga ken indianko met ti imoral nga estilo ti panagbiagko. Ti maudi a banag a tinengngelko isut’ panagtabako. Iti uneg ti walo a bulan rimmang-ayak agingga iti punto a kualipikadoakon iti bautismo, ket nabautisaranak idi 1970.

Dimteng met laengen ti naan-anay a pannakaibanag ti sungbat iti saludsodko maipapan iti no siasino ti mangikeddeng iti naimbag ken dakes. Ti sungbat ket: ni Jehova, ti Mannangted-Biagtayo, addaan iti kalintegan, ken addaan met iti kalintegan a manginanama a dagiti parsuana agbiagda a maitunos iti dayta.

Kankanayon a pampanunotek ti panagaplikar ti ilustrasion idiay Isaias 65:25 iti piguratibo a pamay-an. Dayta a padto saritaenna ti maipapan iti umay a tiempo inton ti kinarungsot ti leon mabaliwanton nga agbalin a natalna agingga iti punto a manganton iti garami a kas ti baka a lalaki. Mariknak nga iti umasping a pamay-an, nagbalbaliwakon manipud iti nakarangranggas a tao a nagbalin nga addaan kinatalna ken maysa a natalna a panangmatmat iti biag.

Kaskasdi, addaanak ti dakes a pakasarsaritaan a masapul a maikkat babaen iti nasayaat a kababalin. Kas pangarigan, kankanayon a sarungkarak dagiti tattao kadagiti ruruangan a mangisalaysay kadakuada iti Biblia. Iti maysa a ruangan, maysa nga agtutubo a nangilukat iti ruangan ti nakabigbig kaniak ket nagbuteng, a pagarupna nga addaak sadiay a mangdangran. Dagus nga inlawlawagko kenkuana ti mensahe iti talna manipud iti Biblia, isu a nangpaulimek kenkuana ngem nabang-aran.

Di nagbayag kalpasan ti bautismok, nangasawaak iti maysa a Saksi ni Jehova. Nakalkaldaang, idi 1974 ti asawak inkeddengna a dinan kayat ti agaramid iti pagayatan ti Dios. Pinagpilinak: idianko ti pamay-an ti panagdayawko wenno panawannak, nga alaenna dagiti dua a babassit nga annakmi. Daytat’ karirigatan a tiempo iti biagko. Ngem diak mabalin a baybay-an ti panagdayawko iti Dios, ket intultuloyko ti nangaramid iti pagayatanna.

Maysa a Baro a Wagas iti Biag

Kaskasdi, ginunggonaannak ni Jehova iti panagtultuloyko a matalek kenkuana. Idi 1977, nasabetko ti maysa a nagsayaatan a Saksi, ket nagkasarkami. Isut’ addaan iti lima a tawen nga anak a lalaki. Di nagbayag ti asawak ken siak simrekkami iti amin-tiempo a ministerio, nga ipamaysami ti bagbagimi iti panangisuro kadagiti dadduma maipapan iti Dios ken dagiti pangpanggepna. Idi dimmakkelen ti anakmi, isut’ simrek met iti amin-tiempo a ministerio. Itan isut’ tumultulong kadagiti nadumaduma a rebbengen iti lokal a kongregasion.

Nanipud idin ti asawak ken siak ti naaddaan iti pribilehio nga agbiahe iti adu a paspaset iti lubong, nga agbulboluntario iti trabaho a panagbangon. Daytoy ramanenna ti itutulong a mangibangon kadagiti baro a pasilidades kadagiti nadumaduma a pagilian a mangsuportar iti sangalubongan a trabaho a panangisuro kadagiti Saksi ni Jehova.

No agawidkami, kanayonkami nga okupado iti lugarmi, a tumultulong kadagiti dadduma a makaammo ti maipapan iti Biblia ken tumultulong a mangibangon kadagiti baro a Kingdom Hall. Nagserbiak met iti Regional Building Committee iti makin-abagatan a paset ti Estados Unidos. Ket ti dati a kaduak iti pagbaludan—ti asawa ti kabsatko a babai—ken siak agserserbikami kas panglakayen iti maymaysa a kongregasion dagiti Saksi ni Jehova.

Agyamanak ken Jehova iti panangtulongna kaniak a mangtengngel iti biagko ken mangipaay iti dayta iti interamente a baro a pagturongan. Bayat ti panangpalubosko kenkuana a mangipakita kaniak no ania ti naimbag ken no ania ti dakes, sumayaat a sumayaat ti biagko.—Naipatulod.