Nabingbingay a Sangakabbalayan ti Relihion

Kadagiti amin a relihion iti lubong, Romano Katolicismo, Islam, ken Hinduismo ti kadadakkelan. Agdagup dagiti Romano Katoliko iti 985 a milion, wenno 18.8 porsiento iti dagup ti populasion ti lubong a 5.24 a bilion, bayat nga adda 912 a milion (17.4 porsiento) ti agkunkuna a Muslim, ken 686 a milion (13.1 porsiento) a Hindu—nasurok a mamindua iti kaadu ti 320 a milion a Budista.

“Kristianismo ti kaaduan a maal-alagad kadagiti amin a relihion,” kuna ti Asiaweek. “Ngem nakaron ti pannakasinasinana iti agbibinnusor a sekta—dagiti Protestante ken Katoliko idiay Makin-amianan nga Ireland ti kalalatakan a nabati a pangarigan—ta marigatan dagiti tao a mangpanunot no maymaysa met laeng dagitoy a relihion. . . . Basbassit ti pannakabingaybingay dagiti Muslim iti sekta ngem kadagiti Kristiano, ngem ti Sunni ken ti Shia ket dua a naiduma a grupo nga addaan iti pakasarsaritaan a saan a kankanayon nga agtunos.” Dagiti Sunni ti kadakkelan a grupo dagiti Muslim.

Mainayon pay, dakkel a paset ti populasion ti lubong ti agkunkuna nga awan relihionda. Ti kangrunaan a paset daytoy a populasion ket adda idiay Tsina, Makindaya nga Europa, ken ti Union Soviet. Dagidiay di interesado iti relihion agdagupda iti 896 a milion, ket 236 a milion met dagiti di mamati iti Dios.