Manipud Managbasatayo
Dagiti Judio ken Kristiano Matignayak a mangiyebkas iti panangapresiarko iti serie dagiti artikulo maipapan kadagiti Judio ken Kristiano. (Judio 22, 1991) Bilang ministro a Kristiano, masapul nga ibagak a mariknak a diak ammo ti sawek no kasano a salaysayen daytoy a banag kadagiti Judio. Ti artikulo impakitana a ditay dawdawaten a baybay-anda dagiti tawidda a Judio no di ket sukimaten laeng ni Jesus ken dagiti Mesianiko a padpadto iti lawag iti kinapudno, saan a babaen kadagiti natiritir a tradision ken ulbod a doktrina.
J. L., Estados Unidos
Mabalin a makaipaay ti artikulo iti impresion a dagiti krimen iti Kakristianuan ket maibilang a dakdakes ngem kadagidiay Judio. Saan aya a dagiti Judio ti nangilansa iti Anak ti Dios iti kayo a pagtutuokan?
N. L., Alemania
Ti pannakapapatay ni Jesu-Kristo, ti Anak ti Dios, ket pudno a dayta ti kadadakkelan a krimen iti natauan a historia. Nupay kasta, awan ti pammaneknek a kinondenar ti Dios dagiti indibidual a nangidaulo iti dayta a krimen. Maisupadi ketdi, “Ti Dios saan a mangidumduma kadagiti tao, no di ket uray ania a nasion dagiti agbuteng ken agaramid ti kinalinteg makaay-ayoda kenkuana.” (Aramid 10:34, 35) Yantangay awan ti maymaysa a nasionalidad a nakondenar iti imatang ti Dios, ti Kakristianuam masapul a sungbatanna ti rekordna a panangibukbok ti dara, panangidadanes, ken relihiuso a kinaaleng-alengna.—ED.
Panangraut ti Gang Pudno nga inapresiarko ti artikuloyo nga “Agimtuod dagiti Agtutubo . . . Kasanot’ Panangsalaknibkot’ Bagik iti Panangraut ti Gang?” (Hulio 22, 1991) Apag-isu ti isasangpetna iti tiempo nga agladladingitak gapu iti diak pannakaammo no kasano a tamingen ti kasasaad. Manipud ita agan-annadakton maipapan iti panagkawkawesko, panagbubuokko, ken kababalinko. Agyamanak unay iti tulongyo.
J. H., Japan
Ti Dakkel a Manangallilaw Pagyamanan iti panangipablaakyo iti artikulo a “Di Panagtimbeng ti Panga—Ti Dakkel a Manangallilaw.” (Hunio 22, 1991) Kankanayon nga agsakit ti ulo ti balasangko ket isut’ naagasan iti nadumaduma a pamay-an, ngem saan a masarakan ti gapuna. Intugotko ti artikulo iti dentista; nangala kadagiti X rays ket nasarakanna ti parikut. Itan makaaw-awaten ti balasangko iti umiso a pannakaagas. Saanak pay a Saksi ni Jehova, ngem tagtagiragsakek ti panagbasbasa iti Agriingkayo!
S. M. S., Brazil
Maysaak a dentista, ket daytoy nga artikulo maysanto a nagdakkelan a tulong kadagiti adu a tattao. Mammano ti makaammo nga adda daytoy a sakit, ket uray pay dagiti dentista no dadduma bassit laeng ti panangasikasoda iti dayta. Anian ti kinaumiso ti panagkunayo a ti laeng Namarsua ti addaan iti solusion kadagiti amin a saksakit!
E. F. G., Alemania
Panangidepensa ti Bagi Iti panangbasa iti artikulo a “Ti Panangidepensa ti Bagi—Aniat’ Pagpatinggaan ti Kristiano?” (Hulio 8, 1991), mabalin a makagun-od ti maysa iti impresion a ti martial arts parang-ayenna ti panagsagsagana a maipaay iti pannakirupak ken panangraut. Saan a kastoy ti kaso. Kaaduan a martial arts ipasagepsepna ti panangtengngel iti bagi, panangdisiplina iti bagi, ken ti pannakarikna iti kinanainkalintegan a nangnangruna ngem kadagiti dadduma nga ay-ayam.
T. M., Alemania
Nalabit pudno a ti martial arts mabalin nga adda pategna kadagiti makipaspaset. Nupay kasta, isuroda ti maysa no kasano ti mangdangran kadagiti padada a tao, ket daytoy saan a maitunos kadagiti prinsipio iti Biblia a masarakan idiay Isaias 2:4 ken Mateo 26:52.—ED.