Agtalinaedto Aya ti Panangallingag?

Nalabit a sililimed a dumdumngegda iti panagpapatangyo.

Nalabit nga ammoda ti maipapan iti sumagmamano a nasinged a palimedyo. Adda kadi planoyo iti sumaruno a ngudo ti lawas? Nalabit nga ammodan dayta. Asinoda? Isuda dagiti tattao nga ugalida ti mangallingag kadagiti panagpapatang iti de bateria a telepono. No kayatda, kabaelanda ti mangsalimetmet iti naisurat a rekord kadagita nga impormasion kas ti numero ti credit-cardyo, no sadinot’ pangpanggedanyo, ken ti sueldoyo. Kinapudnona, kanayon nga addaanda iti libro a pangilistaanda iti nagan dagiti tattao a naynay nga agusar iti de bateria a telepono.

Nalabit nga am-ammoyo wenno diyo am-ammo ida. Mabalin nga agnanaedda iti asidegyo wenno sumagmamano a milia manipud kadakayo. Iti kaaduan a pagilian, saan a maiparit iti linteg daytoy a pagesman, ken nakalaklaka nga aramiden dayta.a

Babaen iti sumagmamano a gasut a doliar, kabaelan ti maysa ti gumatang iti scanner radio ken mangikabit iti dayta iti antena nga adda iti ruar. Makaawat ti scanner kadagiti senial manipud iti nagduduma a kita dagiti de bateria nga alikamen iti komunikasion. Dadduma nga agessem itoy pilienda ti mangusar kadagiti maiyakar-akar nga scanners. Ti kinalag-anda ken kinabassitda mangpalaka iti pananglawlaw iti sangakarrubaan ken panangallingag.

Iti sidong ti nasayaat a kasasaad ti panawen, kabaelan ti operator nga addaan ti scanner ti dumngeg iti sistema ti panangawag ti asideg nga ospital, kadagiti panagsasarita iti departamento ti polisia, ken ti sistema ti inter-com iti pagtaengan. No maaramat dagiti de bateria a telepono, kas iti dadduma a parang iti teatro, nalaka la a sippawen ti scanner dagiti senial. Kabaelan dagiti dadduma nga agessem itoy ti mangallingag kadagiti panagsasarita iti aginggat’ 100 kilometros a kaadayo!

Aniat’ maaramidanyo a manglapped kadagitoy a manangallingag a mangraut iti panagsolsoloyo babaen kadagiti scannerda? Bassit laeng no dikay naannad iti panangusaryo kadagiti de bateria a telepono. Siempre, addada nangingina nga aruaten a mangsinga kadagiti awag iti telepono. Ngem kasapulan a maaddaankayo agraman dagiti tao nga awaganyo kadagita nga aruaten.

Nupay kasta, adda maysa a banag a maaramidanyo. No nalimed ti pagsaritaanyo, dikay agusar iti de bateria nga aruaten kas ti de bateria a telepono. Ket siguraduenyo nga agannad met koma ti awaganyo a tao. Ta no saan, maipanayag dagiti palimedyo, a mangur-uray laeng iti asinoman nga umallingag.

Maysa a banag a dikay maaramidan isut’ panangiwalin iti ugalida. Uray pagbalinenyo a narigat kadakuada ti umallingag kadakayo, nalaka laeng nga umallatiwda iti sabali. Agingga nga itultuloy dagiti tao ti gumatang iti de bateria nga alikamen ken dagitat’ usarenda a makisao kadagiti dadduma, umiso man wenno saan, agtalinaed ti panangallingag!

[Footnote]