Manipud Managbasatayo

Saksakit iti Pannangan Anian a panagtarigagayko a nabasa koma ti pamiliak adu a tawen ti napalabasen ti “Panangtulong kadagidiay Addaan ti Saksakit iti Pannangan.” (Pebrero 22, 1992) Makidangdangadangak iti anorexia iti 35 a tawenen, nanipud idi agtawenak iti 9. Siuumiso ken ababa ti panangisalaysay ti artikulo kadagiti kapapatgan nga isyu. Kinapudnona, naibagayo dagiti bambanag a naawatan laeng dagiti inay-ayatko kalpasan ti adu a tawtawen a panangbalakad! Ammok a ti artikulo tulongannanto dagiti adu a maseknan a gagayyem ken pampamilia dagiti agsagsagaba.

C. S., Estados Unidos

Di Pay Naipasngay nga Annak Tinagiragsakko dagiti artikulo ti siensia ken ti nakaparsuaan iti adu a tawtawenen. Nangnangruna a naginteresak iti artikulo a “Mangrugi iti Aanakan ti Panagsuro.” (Enero 22, 1992) Pudno a nakaskasdaaw ti nagsayaatan ken nakarikrikut ti pannakaaramidna nga utek. Ket ti ladawan ti walo-a-lawas a sikog makakayaw ti kinapintasna. Ti artikulo tinignayna ti kasta unay a naimpusuan a panangapresiarko iti nakaam-amak a pannakaaramidko!

J. J., Estados Unidos

Dagiti Motorsiklo Iti artikuloyo a “Dagiti Motorsiklo—Kasano Kapeggadda?” (Abril 8, 1992), binalakadanyo dagiti managlugan nga ikkanda ti naranga a tape dagiti helmetda. Mabalin a makapapatay daytoy a balakad no ti helmet ket naaramid iti polycarbonate wenno dagiti umasping a material, kas iti pannakaaramid dagiti adu. Dagiti pigket ken pintor dadaelenda daytoy a material, a pagbalinenna dayta a narasi. Iti aksidente, ti helmet mabalin a marumek, ket dina masalakniban ti naglugan. Ti nasaysayaat a balakad isut’ pananggatang ti maysa a helmet a narangrangen ti kolorna.

S. J. H., Inglatera

Inapresiarko daytoy a balakad maipapan iti talged. Nainsiriban ti panangbasa kadagiti instruksion ti nangpataud sakbay a mangaramid iti aniaman a panangbaliw.—ED.

Inapresiarko ti artikulo. Ti ama ti tallo nga anakko nabiit pay a natay idi natukkol ti maysa a paset ti motorsiklona, a nangibukbok iti krudo iti makinlikud a bukel. Isut’ awan ti puotna iti las-ud ti tallo a lawas kalpasan ti kasta unay nga operasion ti utek. Uray din ibagbaga, laglagipekto daytoy nga artikulo a maipaay iti masanguanan a reperensia no kayatto ti anakko ti aglugan iti motorsiklo.

M. G., Estados Unidos

Dagiti Ipes Nagbasbasaakon kadagiti magasinyo iti las-ud ti walo a tawen, ket kayatko ti mangipaay iti komendasion kadagiti nagduduma nga artikulo nga ipabpablaakyo a mainaig kadagiti trabaho iti balay. Ti tuktukoyek isu ti artikulo a “Ti Naandur nga Ipes.” (Enero 22, 1992) Malaksid ti nagsayaatan a pannakaisuratna, suruannatayo met dayta a mangikkat iti daytoy nga insekto. No surotek dagiti instruksion, awanton dagiti makasimron nga isasarungkarda iti pagtaengak.

A. F. A. A., Brazil

Elektroniko a Panangallingag Binasak a buyogen ti interes ti artikulo nga “Agtalinaedto Aya ti Panangallingag?” (Disiembre 8, 1991) Nupay kasta, makitak a makariribuk ti pannakaabuso dagiti scanner radio. Makarimon a panunoten a dumngeg dagiti tao iti panagsasarita dagiti dadduma a tao. Kabarbaroak pay laeng nga opereytor ti radio ket masansan a mangusarak iti scanner tapno denggek dagiti maiyallatiw a damag manipud kadagiti barko ken dagiti babassit a bilog. Ti addaan iti scanner mabalinna nga ispalen ti adda iti taaw nga umaw-awag ti tulong. Gapuna pangngaasiyo ta ilawlawagyo kadagiti managbasayo a saan nga amin a tattao nga addaan iti scanner ket manangallingagda.

R. P., Inglatera

Crossword Puzzle Agsipud ta ti ruaryo a Pebrero 8, 1992, naglaon ti umuna a crossword puzzle nga ipabpablaakyo iti nabayag bassiten a tiempo, kayatko nga ilawlawag no apay a dagiti puzzle ket nakapatpateg. Ti anakko a lalaki agsagsagaba iti saksakit iti pannangan a mamagbalin a narigat ti panagbasa ken panagsurat. Nupay kasta, nabaelanna a sinulbar dagiti crossword puzzle nga ipabpablaakyo. Daytoy ti mangiparikna kenkuana nga adda naaramidanna ket nakatulong kenkuana a nangammo iti panagsasaruno dagiti libro ti Biblia. Kas makitayo, adut’ magunggona iti kinagagetyo.

C. G., Alemania